شهفهق/ له مهكووهیل تونڕهو عراقى لهبان تووڕ ئهنتهرنێت، ئهندامهیلیگ پشتگیرى خوهیان ئهرا ئۆپۆزسیۆن
سوورى ئاشكرا كردنه ئهرا رمانن رژیم بهشار ئهسهدو هانه تهما چهك و چهكدار كل بكهن.
سهرۆك وهزیرهیل نورى مالكى زویتر ئامادهیى بهغدا دهرخست ئهرا پیشوازیكردن له لایهنهیل ئۆپۆزسیۆن سوورى ئهرا رهسین وهچارهسهریگ ك داواكاریهیل مللهت سوورى باریگه دى وهجووریگ دویر بوود له تون و تیژى و جهنگ ناوخوهیى.
وهگوورهى راپۆرتهیل فرهنسى ك لهبان ئى مهكووهیل تونڕهوه وهرگیریاگه جویر "حهنین"و" انسار مجاهدین" ئهوه دهركهفته، ك رهخنه لهرژیم ئهسهد لهسووریا گیریهێد وهگوورهى ئهو تووماركریاگهیل یا تهسجیلهیل ڤیدۆییه ك رویداگهیل لهتى گیریاگه لهو وڵاته.
یهكیگ لهو بڵاوكریاگهیله لهبان ماڵپهڕ "حهنین" باوهتیگ گرتهسه خوهى لهژیر ناونیشان"چه لهئیمه خواسته وهرانوهر برایهیل و شووڕشكارهیل لهسووریا" لهباوهتیگ پیشكهشكردن پشتگیرى ئهرا برایهیلدان وهگوورهى تواناییدان، ئهى برایهیل مجاهد لهعراق ك ئیوه خاوهن شارهزایى و ئهزموونین.
ههر لهو بڵاوهو كریاگه گوزارشیگ نیشاندریاگه ك وتگه: جهاد لهعراق یا سووریا ئهى برایهیل لهوهر خاتر یهك ئامانجه، ك ئهویش بارهزهوكردن ئاڵاى یهكگرتن و ئاڵاى ئهڵڵاهو ئهكبهره، ههمیش لهى باوهتهو ئشارهت كریاگه وه ئهوهك" ئهى برایهیل جهاد جاریگ تر بانگهوازدان ئهكا".
رژیم سوورى سهر وهتایفهى كهمینهى عهلهویه، ك لقیگه لهمهزهو شیعى، وهل ئهوانهك داواى خاسسازى كهن زوورمیان سهر وه مهزهو سونى و بڕیگیانیش له خهتهیل سهلهفیین.
بڵاوكریاگیگ تر باوهتیگ گرتهسه خوهى ك كابرایگ وهناو عوبهیدوڵڵا نویساسهى لهژیر ناونیشان" نهخش ریكخریاگهیل جهادكارهیل عراقى لهوهك لهسووریا رویدهێد" ك وتگه: مهردمانیگ ئویشن ئى ریكخریاگهیل جهادكاره لهعراق ههوڵ و تهقلا دهن، وهلى من ئویشم ئهو ریكخریاگهیله توانایى گهورایگ دیرن لهسووریا لهگشت بوارهیل. ههر لهوهر ئهوهیش وتگه: داوا لهو برایهیلمانه كهم ك لهعراقهو هاتنه ئهرا سووریا ئهرا دامهزرانن گرووپهیل پشتگیریكردن له برایهیلمان لهمللهت سوورى، پشتگیرى له ئۆپۆزسیۆن سوورى بكهن، چوینكه ئهوان خاوهن شارهزایى و ئهزموونن و زانیارى و پشتگیرى لۆجستى دیرن.
له مهكوو ئهنسار مجاهدین، كابرایگ وهناو ئهبى زههرا زوبهیدى، ك كابرایگ عراقیه، ئامووژگارى دهێده ئۆپۆزسیۆن سوورى وه" سهندن چهك و چهكداركردن و پهلامارداین ئهمبارهیل چهك" ك ئویشێده ئۆپۆزسیۆن سوورى ئهیه تهنیا دهرفهتیگه ئهرا رمانن رژیم ستهمكار لهسووریا.
ههڵویست گرووپهیل تونڕهو عراقى وهچهواشهى ههڵویست حكوومهت لهبهغدا هات ك حكوومهت پشتگیرى رژیم سوورى كرد، ك هووكار ئى مهسهلهیشه مهردمانیگ وه هووكارهیل تایفى زاننهى.
شیهوكهر سیاسى و رهساننكار كازم مقدادى ئهرا شهفهق نیوز وتگه: ههڵویستهیل حكوومهت تایفى لهئاكام مهسهلهى كوشتن و بڕین بهحرهین سهرههڵدا ك له حكوومهتیگ سونیهو پهیا بوى وهگوورهى پشتگیریكردن له رژیم سوورى شیعى.
وهل ئهوهیشا كابرایگ وهناو ئهبولفهزڵ معدى لهباوهتیگ ك لهبان ماڵپهڕ ئهنسار موجاهدین بڵاوهو كریاگه، وتگه: دیاره مللهت سوورى خوهى وهتهنیا نیهتویهنیگ وهرانوهر ستهمكارهیل بگرێدو لهى حاڵهتیشه جهاد بویه ئهرك لهبان ناوچهیل ههرێمى دهوروهر سووریا.
شیهوكهرهیل و چهودیرهیل سیاسى باوهڕیان لهیواسه ئهو رویداگهیله ك لهسووریا رویدهن بووده هووكار ئهوهك بهرهى جیواز بكریهى ئهرا ناو خاك سووریا لهلایهن گرووپهیل تونڕهو لهعراق، ك زوورمیان سهر وه خهتهیل سهلهفیین و كار لهبان رمانن رژیم بهشار ئهسهد كهن.
بیجگه ئهوهیش چهودیرهیل وتنه: ئهو ههڵویستهیله ك وهرپرسهیل حكوومهت عراق نیشانیدهن زهرهد فرهیگ رهسنێده وهزع عراق، وهل ئهوهیشا ههر ئاڵشتكارییگ له سووریا كاریگهرى فرهیگ دیرێد لهبان وهزع عراق. مهردمانیگیش وتنه: ئهوسا سووریا چهكدار تونڕهو كلكردگه ئهرا عراق لهوهر ئهوهك كارهیل خراوهكارى ئهنجام بیهن لهعراق، وهلى ئیسه كارهگه چهواشه بویهسهوهو لهعراقهو چهكدار وهرهو سووریا چوود دویاى ئهو رویداگهیل فره ك لهسووریا رویدهن.
| < پێشتر | دواتر > |
|---|
