شهفهق/ ههزاران كهس لههاووڵاتیهیل شار خانهقین، رووژ یهكشهممه لهمهیدان سهرهكى ناوڕاس شارهگه له
خودنیشانداینیگ گردهوبوین لهوهر خاتر ئهوهك گوزارش و پهیام خوهیان برهسنن لهبان رهتهوكردن بریار حكوومهت لهباوهت داگرتن ئاڵاى كوردستان لهبان دهزگایهیل رهسمى.
پهیامنیر" شهفهق نیوز" ك ئامادهى ئهو خودنیشانداینه بویه، وتگه: ئهو خودنیشانداین گهورا له دهمهو شهوهكى رووژ یهكشهممه له مهیدان كرندى لهناوڕهس شار خانهقین دهس وهپیكردگهو ههزاران هاووڵاتى لهگشت چین و تایفهیگ لهتى بهشدارى كردنه، ك ئهویش وه ئامادهبوین قایمقام شارهگهو بڕیگ لهوهرپرسهیل حزبى و نوێنهرهیل عراقى و نوێنهرهیل ریكخریاگ كوومهڵگاى مهدهنى و لایهنهیل تر.
بیجگه ئهوهیش وتگه: ئهو مهردمه ك ئاڵاى كودستان بهرزهو كردنه، دروشم یا شعارهیلیگ دژ ئهو بڕیار حكوومهته داشتنه ك فهرمان داگرتن ئاڵاگه داگه لهبان دهزگایهیل رهسمى و دویاى ئهوهیش سروود نیشتمانى كوردى"ئهى رهقیب" خوهنستنهو خوهشهویسى خوهیان ئهرا ئاڵاى كوردستان نیشان دانه.
لهوهیش زیاتر وتگه: محهمهد مهلا حهسهن قایمقام شارهگهو مهحموود سهنگاوى سهركردهیگ له یهكێتى نیشتمانى كوردستان و وهرپرس ناوهند ریكخستن گهرمیان و وهرپرس لق 15ى پارت دیموكرات كوردستان ئهكبهر حهیدهر سورهمێرى و ههردوگ ئهندام له ئهنجوومهن نوێنهرهیل عراق محهمهد فهرهج و حهسهن جهاد ئهمین و شمارهیگ له وهرپرسهیل شارهگه ئامادهى ئهو خودنیشانداینه بوینه.
قایمقام شار خانهقییش له وتاریگ لهو ڕى وڕهسمه وتگه: ئدارهى شارهگه هاوكار و پشتگیره وهگشت توانایگهو ئهرا گشت ئهو داخوازیهیله ك هاوڵاتیهیل لهگشت چینیگ لهوهر خاترى لهشارهگه ئهو خودنیشانداینه ئهنجام دانهو وتگه: ئدارى شار گشت ئهو داخوازیهیله جیواز ئهكا ئهرا لایهنهیل پهیوهندیدار چوینكه خواستهیل ڕهوایگه.
لهلاى خوهیهو، مهحموود سهنگاوى سهركردهیگ له یهكێتى نیشتمانى كوردستانى تهئكید لهوه كردگه، ك مهردم خانهقین ههزاران قوربانى دانه لهوهر خاتر ئهوهك ئاڵاى كوردستان لهبان شارهگهیان بلهریهیگ ، زیاتریش وتگه: ئیمه نیهلیم بهعسى و شۆڤێنى و كینهت له دڵهیل و دوشمنهیل پرووسهى دیموكراسى پهرچهم كوردستان لهى ناوچهیله داگرنه خوار.
سهنگاوى ههمیش وتگه: ئیمه ئمڕوو دوینیم ك كوردو عهرهب و توركمان و گشت لایهنهیل دینى و مهزهوى هاتنه ئهرا بهرزهوكردن ئاڵاى كوردستان لهى ناوچهیلهو ئاڵاى كوردستانیش لهدهستوور عراقى چهسپیاگهو كهس نیهتویهنیگ باریگهى خوار و هویچ هیزیگ شۆڤێنى نیهتویهنیگ دهوڵهت مهركهزى دامهزرنیگ زوڵم له روڵهیل ئى وڵاته بكا وهگشت پیكهاتهیلى.
سهنگاوى ئشارهت وه ئهوهیش كردگه، ك" روى وهر دیموكراسى شوون گشت جههان ئهكادهوه لهژیر ناونیشان ئازادى و ژیان هاوبهش لهناونى مللهتهیل ناوچهگهو هویچ دهرفهتیگ نیه ئهرا هاتنهوهى دكتاتۆریهت، چوینكه مللهتهیل جههان باوهڕ وه دیموكراسى دیرن، لهههمان وهخت وتگه: ئهو مهردمانه ك خراوى دهرههق دین پاك ئسلام نیشاندهن و خهو وههاتنهوهى بهعس دوینن ئهرا دهسڵات تائیسهیش ههر دژایهتى ئاڵاى كوردستان و ژیان هاوبهش كهن لهناوچهگه.
سهنگاوى لهى ڕویهو زیاتر وتگه: سهركردهیل بهعس چینهسه ناو زبڵخانهیل تاریخ و ئهوانیش ههمان چارهنویس دیرن، چوینكه دیموكراسى و ئازادى و فدراڵى مێخ خوهى لهناوچهگه ناسه چاڵ.
دویاخریش سهنگاوى وتگه: خانهقین قهزایگ كوردستانیهو بایهسه ئاڵاى كوردستانیش لهشان ئاڵاى عراق بهرز بوود و لهگشت ناحیهیل سهر وهقهزاگهیش بهرزهو بكریهى.
له تهسریحیگ ئهرا" شهفهق نیوز" ئهكبهر حهیدهر سورهمێرى سهركرده له پارت دیموكرات كوردستان و وهرپرس لق 15ى پارتهگه، وتگه: ئى مهردمان فره ك ئى خودنیشانداینه بهرپا كردنه، رهتهوكردنیگه ئهرا ئهو بریار تهكڕهوى حكوومهته. لهههمان وهخت تهئكید لهوهیش كردگه، ك هاووڵاتیهیل ئاگر خوهیان دانه لهبان ئى بڕیاره، ك ئایا جواو مالكى ئهرا ئى مهردمه چهس؟
سورهمێرى ئشارهت وه ئهوهیش كردگه، ك مهردم كوردستانى لهشارهگه ههر لهخوهیانهو ئى خودنیشانداینه ریكخستنهو ئیمه جویر حزبهیل كوردستانى بهشیگیم لهى مهردمهو بڕیار دایم بهشدارى وهلیانا بكهیم و پشتیان بگریم.
شایهن باسه زیاتر وتگه: ناوچهى خانهقین یهكیگه لهناوچهیل داوڕیاى و كیشه لهسهر لهناونى ههولێر و بهغدا وهگوورهى دهستوور عراقى له ماددهى 142، ك زوورم مهردمهگهى كوردهو عهرهب و توركمانیش لهتى ژیهیگ .
| < پێشتر | دواتر > |
|---|
