شهفهق/ له جواو تهسریحهیل قسهكهر وهناو هیزهیل ئهمریكى جهنراڵ جیفرى بیوكانن، تارق هاشمى جیگر
سهرۆك كوومار داوا له فراكسیۆنهیل سیاسى كرد كووتایى وه مهسهلهى حسانهى قانوونى وه مهشقدهرهیل ئهمریكى بارن ك شایهت دویاى كووتایى ئمساڵ بمینن. لهههمان وهخت فراكسیۆنهیل كوردستانییش لایهنگر داین حسانهن وه مهشقكارهیل، تهنیا ئئتلاف دهوڵهت قانوون نهود ك مهسهلهى حسانهداین رهتهو ئهكا چ قانوونى چ دبلۆماسى.
قسهكهر وهناو هیزهیل ئهمریكى جهنراڵ جیفرى بیوكانن، له تهسریحیگ رووژنامهگهرى تهكید لهبان خواست داین حسانهى قانوونى وه مهشقدهرهیل ئهمریكى كرد لهشوون دهرچگن هیزهیل وڵاتهگهى.
ههر لهى باوهتهو تارق هاشمى داواى یهكلاكردنهوهى كیشهى حسانهى قانوونى كرد ئهرا مهشقكارهیل ئهمریكى ئهوانهك مینن لهعراق لهشوون ساڵ 2011و تهئكید لهوهیش كرد ك سوپاى عراق ههوهجه وه مهشقكردن دیرن لهبان چهك و تهقهمهنیهیل ئهمریكى ك ملیارهها دۆلار خهرج عراق لهلى كهفتهو.
حهمید عادل بافى ئهندام فراكسیۆن كوردستانى له گفتوگوویگ ئهرا" شهفهق نیوز" وتگه: ئهنجوومهن نوێنهرهیل تائیسه تهماشاى ههڵویست حكوومهت مهركهزى نهكردگه له مهندن مهشقكارهیل ئهمریكى دویاى دهرچگن هیزهیل وڵاتهگهى له كووتایى ئمساڵ و تهئكیدیش لهوه كردگه ك هیزهیل عراقى ههوهجه وه مهندنهوهى بڕیگ له مهشقكارهیل دیرن.
بافى زیتر ئاشكراى كردگهو ئویشیگ : ئئتلاف فراكسیۆنهیل كوردستانى مكوڕن لهبان نههیشتن جیاوازیهیل لهگشت ئهو كیشهیله ك پهیوهسه وه مقهیهتیكردن ئاسایش وڵات و لهوانهیش حسانهى مهشقكارهیل.
لهلاى خوهیهو نوێنهر لهبان ئئتلاف دهوڵهت قانوون هادى یاسرى له گفتوگوویگ ئهرا "شهفهق نیوز" وتگه: نهبایهد حسانهى قانوونى یا دبلۆماسى بدریهیگه مهشقكارهیل ئهمریكى، چوینكه ئى كاره چهواشهى ئهو ریككهفتنهیل ئمزاكریاگهسه لهناونى عراق و وڵاتهیل یهكگرتگ ئهمریكا، لهههمان وهخت تهئكید لهوهیش كردگه ك حكوومهت مقهیهتیكهر ئاسایش پڕ ههوهجهیگ دابین ئهكا لهشوون دهرچگن هیزهیل ئهمریكى لهعراق له كووتایى ئمساڵ.
یاسرى زیاتر وتگه: لهسهردهم رژیم وهرین شمارهى فرهیگ له مهشقكار و شارهزایهیل سهربازى زوورم دهوڵهتهیل لهعراق وجوود داشتنهو خهریك ئهنجامداین كارهیل خوهیان بوینه وهبى حسانه.
بڕیاره وه گوورهى ئهو ریككهفتننامهى ئمزاكریاگه ك لهوهخت جۆرج بۆش وهل حكوومهت عراق له ساڵ 2008ئهنجام گرت، گشت هیزهیل ئهمریكى لهكووتایى ئمساڵ لهعراق دهربچن.
وهل ئهوهیشا ئشارهت وهئهوهیش كریهیگ ، ك گشت فراكسیۆنهیل سیاسى لهدانیشتن دویاخریان وه سهرپهرشتى سهرۆك كوومار جهلال تاڵهبانى ریككهفتن لهبان ئهوهك وڵات ههوهجه وه مهشقداین هیزهیلى دیریگ وه زویترین وهخت ك بایهسه حكوومهت تاوتوى ئى مهسهله بكاو بگهردیگه شوون ئهنجامداینى، یهیش لهوهختیگ ك ئهندامهیل ناو دانیشتنهگه داین حسانه وه مهشقكارهیل رهتهو كردن.
| < پێشتر | دواتر > |
|---|
