شهفهق/ مهسهلهى خاسسازى وهڕیهوبردن وه یهكیگ له ههوهجهیل خواست دانریهێد ئهرا چارهسهر ئهوگرفتهیله ك دام و دهزگایهیل دهوڵهت وهدهسیهو ناڵنن، ك گهردین لهشوون كردهوهیل پاوهجى لهڕى وهكارهاوردن نهرمى و پرسكارى بنهڕهت رهسینه ئهرا خاسسازى و ئهو چشتهیله ك خزمهت رهسنیگه هاووڵاتى و ههوهجهیلیان جیوهجى ئهكا.
لهیرا تاریفیگ ناودهوڵهتى ههس ئهرا نهرمى وه ئهوهك" ریڕهو دروسكردن زهمینهیگ ك ئهو زانیاریهیله لهتى پهیوس بوود وه بار سیاسى و بڕیار و كارهیل، چشت دیارى و خاس و فامریاگیگهو لهههمان وهخت وازبوین یا ئنتفتاحیگه ئهرا گشت لایهنهیل پهیوهندیدار.
وهلى پرسكارى ماناى" تواناى كهسهیل و ریكخریاگهیل ناحكوومیه له چهودیریكردن و پرس و پرسكارى وهرپرسهیل و كارمهندهیل گشتى جویر یهك وهگوورهى هووكارهیل گونجیاگ وهبى ئهوهك كارهگه پهك بكهفیگ .
بیگومان ئاشكراس ك حكوومهت ههرێم كوردستان وه تهواوى هس وهگرنگى نهرمى و پرسكارى و نهخشیان له خاسسازى وهڕیهوبردن و دهسكردن وه پرووژهى پهرهوهپیداین لهههرێم كردگه، ئهیه بیجگه نهخشى له روى وهڕوى بوینهوهى گهناتهكارى وهڕیهوبردن ك فشار ریكخریاگهیل كوومهڵگاى مهدهنى و مهردم و بڕیگ لایهنهیل سیاسى دهیگ لهلى دویر بگرن.
دكتۆر كاوه محهمهد فهرهج قهرهداغى، مامۆستاى یارمهتیدهر له زانكۆ یا جامعهى سلێمانى لهههرێم كوردستان له گفتوگوویگ ئهرا" شهفهق نیوز" ئویشیگ: لهبان راسپاردهى ریكخریاگ(ساید)و لهههمان وهخت وهسهرپهرشى و جیوهجیكردن ریكخریاگ(ئیدۆ) لهههرێم كوردستان تهكلیف وه ئهنجامداین ئاماریگ كریایم لهباوهت نهرمى و پرسكارى و نهخشى له خاسسازى وهڕیهوبردن لهههرێم كوردستان و ڕادهى پهیوهسبوین ئهو نهرمى و پرسكاریه له وهڕیهوبردن دهزگایهیل حكوومهت، ك ئهوه دهركهفت شمارهى فرهیگ له هاووڵاتیهیل كوردستان نهرمى و پرسكارى له كارهیل حكوومى ناكهنه دى.
قهرهداغى زیاتر ئویشیگ: ئهو ئاماره ك لهى باوهتهو هاته دهس، لهشوونهیل جیاجیاو لهناونى 218 خیزان كورد ئهنجام دریاگهو 110 خیزان لهلیان نیشتهجى ههولێرهو 108خیزانیش له سلێمانى، ك یهیش وهگوورهى پهیمانهى ریكخریاگ نهرمى جههانى و متمانهى 21 پرسیار ك پهیوهسه وه نهرمى و 10 پرسیاریش پهیوهسه وه پرسكارى و 15پرسیار تریش پهیوهس بوى وه خاسسازى ئدارى.
قهرهداغى ههمیش وت: مهسهلهى ئاماركردن لهبان نهرمى و پرسكارى و خاسسازى له حكوومهت ههرێم كوردستان ئاشكراى ئهوه كرد ك ئهو چشتهیله تاڕادهیگ كهفنه وهرچهو. لهههمان وهخت ئهوهیش خسته هویر، ك لهلایهن سهركردهیل باڵا هویچ رینماییگ نیه، ك ئهویش وهسهبهب رووشنهویرى شاردنهوهى زانیاریه.
لهباوهت دروشم باو ك ئویشیگ ئهیه لهكوورا هاوردید؟ئهو شارهزایهیله ك خهریك ئهنجامداین ئامارن رهسینهسه ئهو راده ك ئى مهسهلهیشه تهنیا قسهیلیگه كریهیگ و ههر لههووكارهیل رهسانن باس كریهیگ، وهنا جواو تهواویگ نهیریگ .
قهرهداغى ئویشیگ : جیاوازییگ ههس لهناونى نهرمى و پرسكارى و لهناونى نهرمى و خاسسازى وهڕیهوبردن و لهناونى پرسكارى و خاسسازى ئدارى، یهیش لهوهختیگ ك نهرمى و پرسكارى وه یهكهو كاریگهرى دیرن لهبان خاسسازى ئدارى، لهههمان وهخت ئشارهت وه ئهوهیش كرد ك ئامانج له بهحسهگه لهوهر خاتر كهمهوكردن ماوهى ناونى حكوومهت ههرێم كوردستان و هاووڵاتیهیل ئهوهسه حكوومهت ئاگادار بوود له ههوهجهو خواست هاووڵاتى و جواو ئهڕاى داشتوودو چارهسهریگ بوینیگهو لهناونى ههردوگلا لهوهر خاسهوكردن بار ئدارى و كوومهڵایهتى.
ههر لهباوهت ئى مهسهله قهرهداغى ئویشیگ: وهگوورهى ئهو ئاماره ك ئهنجام دریاگه لهباوهت بڕگهیل نهرمى ك 21 پرسیار گرتهسه خوهى، ئهوه دهركهفتگه ك نسبهى 76% لهوانهك ئامار لهبانیان كریاس وه" ڕازى نیم" و" وه تهواوى رازى نیم" جواوهو دانه لهوهخت پرسكردن وهپیان لهباوهت ئهوهك ئایا كاروبار دهزگایهیل حكوومى چوینهو دویره له ڕۆتین؟ ئنجا نسبهى رازى نهوین له باقى پرسیارهیلیش لهباوهت نهرمى دهزگایهیل لهناونى51-56% بوى.
قهرهداغى زیاتر ئویشیگ: ئامارهگه پهیوهندى ناونى چهمك نهرمى و پرسكارى وه نسبهى 59% دهرخستگهو ناونى نهرمى و خاسسازى وهنسبهى 84% و ناونى نهرمى و خاسسازى ئدارى وهنسبهى 75%، لهههمان وهخت ئاشكراى ئهوهیش كردگه، ك ئهگهر بایگ و مهسهلهى نهرمى جیوهجى بوى، ئهوه بیگومان وهنسبهى 84% كاریگهرى دیریگ لهبان خاسسازى ئدارى، وهلى ئهگهر مهسهلهى پرسكارى جیوهجى بوى ئهوه كاریگهرى لهبان خاسسازى ئدارى وهنسبهى 75% دیریگ ، ئنجا ئهڕامان دهركهفت ك نهرمى وهنسبهى 70% كاریگهرى دیریگ لهبام پرسكارى و ئهگهر نهرمى جیوهجى كریا ئهوه وهنسبهى 57% كاریگهرى دیریگ لهبان خاسسازى، وهل ئهوهیشا چهمك پرسكارى لهبان خاسسازى وهنسبهى 64% كاریگهره.
ههر وهى خاتریشه، داوا له حكوومهت ههرێم ئهكا" لژنهى دهسپاكى و دادگایهیل ئدارى چالاكهو بكاو كهس گونجیاگ بخاده شوون گونجیاگ و گشت ئهو قانوونهیله ك حوكم مهسهلهى ئدارى كهن لهناوخود ههرێم زینگیهو بكا لهگشت ڕوییگهو، وهل ئهوهیشا بایهسه هووكارهیل رهسانن یا ئعلامیش هووشدارى بیهنه هاووڵاتیهیل له ئهرك و ههقهیل و چوینیهتى پشتگیرى حكوومهت ههرێم كوردستان ئهرا ناسین ئهو قانوون بڕیارهیله ك دهریان ئهكا. ئنجا ئایا ئهو ئاماره ئامانجهیله تیهریگه دى له دهسنیشانكردن سروشت وهڕیهوبردن كار له دهزگایهیل حكوومهت ههرێم كوردستان و دهرخستن دیاردهیل كیشهو گرفت و خهمسهردى ئهو دهزگایهیله لهوهر خاتر داناین چارهسهر خاس و گونجیاگ ك وه جووریگ ئارهزووهیل هاووڵاتى لهڕوى كارهیلیان بارێده دى و بانه تهنگ ههوهجهیلیان؟
| < پێشتر | دواتر > |
|---|
