شهفهق/ وه قهوڵ لهیهكهودهریگ سیاسى كورد، نورى مالكى سهرۆك حكوومهت عراقى نیاز جیابوینهوهى
كورد له حكوومهت مهركهزى دهرخستگهو ئاشكراى ئهوه كردگه ك پهیوهندیهیل بهغداو ههولێر لهبان بنهماى بتهویگ دانهمهزریاگه، بهڵكوو ههمیشه پیكهاتگه له ڕوى وهڕوى بوینهو سهركردایهتیهیل كورد نهخش یا دهور كوردى لهبهغدا نهخش كورد له بهغدا پشتگووش خستنهو حكوومهت وهردهوامه له سیاسهت تهعریب لهناوچهیل كیشهدار و توایگ لهلایهن ئابووریهو دهسڵات خوهى زاڵ بكا لهبان حكوومهت ههرێم وه جیوهجى نهكردن ئهو شیوازه ك لهباوهت قانوون نهفت و غاز لهبانى ریككهفتوین.
لهیهكهودهر سیاسى نهدیم سهعید وهیسى له تهسریحیگ ئهرا"شهفهق نیوز" ئاشكراى كرد وه ئهوهك ئهو پهیوهدهندیه ك حكوومهت ههرێم بهسیگه حكوومهت عراقى ههمیشه پهیوهندى روى وهڕوى بوینهو رهفیقایهتى بویهو لهبان بنهماى خاس و بتهویگ نهویه، بیجگه ئهوهیش ئویشیگ: كورد لهبهغدا نهخش خاسیگ نهیاشتنهو لهوهر هووكار پشتگووشخستنیان لهلایهن سهركردایهتیهیل كوردیهو ئهو نهخشه وه یهكجارى ڕوى له كزى كردگه.
وهیسى ئاشكراى ئهوهیش كرد، ك لهباوهت مهسهلهى دارایى لوومهى حكوومهت مهركهزى كهن وهك لههویرهوبردن كیشهیل تر گرنگ جویر كیشهى كهركووك و ناوچهیل داوڕیاگ و كیشهدار و ماددهى 140 و قانوون نهفت و غاز، ك وه باوهڕ ئهو گوایا حكوومهت عراقه لهى لایهنهو دریغى كردگهو ژیر وهژیر ههوڵ وهردهوامى دهیگه سیاسهت تهعریب لهو ناوچهیله.
وهیسى ئشارهت وهو بهڵگهیلیشه كرد ك لهى دویاخره ماڵپهڕ ویكیلیكس بڵاویهو كرد لهبان ئهوهك حكوومهت مهركهزى وه چهو گومانهو نوڕیگه ههرێم كوردستان، یهكیگ لهو بهڵگهیلیشه ئاشكراى كردگه ك مالكى وتهسه سهفیر ئهمریكى ك كوردهیل نیاز سهروهخوهیى و جیایى درین.
وهیسى لهى باوهتهو زیاتر وت: حكوومهت بهغدا لهو كارهیله ك ئهنجامى دهیگ خاوهن بڕیار نیه، بهڵكوو بڕیار كووتایى ها دهس ئیران و بهڵگهیش ئهرا ئى كاره ئهوهسه ك ههر وهختى پهیوهندى ناونى حكوومهت ههرێم كوردستان وهل لایهن ئیرانى خراو بوود، راسهوخۆ كاریگهرى دیریگ لهبان شیواز پهیوهندى ناونى حكوومهت عراقى و حكوومهت ههرێم.
وهیسى لهى ڕویهو ڕهخنه له ههڵویست حكوومهت عراقى گرت لهبان ئهو زوڵمكاریهیل ئیران و توركیه ئهرا بان ناوچهیل مهرزى ههرێم كوردستان، ك لهتى ئویشیگ: عاره ئهرا حكوومهت عراقى بیدهنگه لهبان ئى دهسدریژیه ك ئیران و توركیه كهنهى ئهرا بان مهرز عراق له ههرێم كوردستان و لهههمان وهخت ئشارهت وهو توومهتهیله كرد ك ههمیشه حكوومهت عراقى خهیگهى پاڵ ههرێم كوردستان وه ئهوهك خوهى جویر بهشیگ لهعراق نیهناسیگ و ئیسهیش حكوومهت مهركهزى وهرپرسیاریهتى خوهى نیشان نیهیگ لهوهك لهكوردستان ڕویدهیگ لهئهنجام ئهو دهسدریژیهیل ئیران و توركیهو ههڵویست ئاشكرایگ لهى لایهنهو نهیریگ.
وهیسى ئشارهت وه ئهوهیش دا، ك حكوومهت مهركهزى گهردیگه شوون دهرفهتیگ ئهرا ئهوهك بڕیار لهبان قانوون نهفت و غز نهیهیگ وهو شیوازه ك حكوومهت ههرێم كوردستان توایگهى ك ههق خوهیه ئابوورى خوهى وهپى بتهو بكاو زیاتر سهروهخوهیى داشتوود، وهلى حكوومهت مهركهزى ههوڵ لهنابردن ئهو بڕیاره دهیگ.
لهباوهت ئهو سهردانیشه ك شاند ههرێم وه سهرۆكایهتى سهرۆك حكوومهت بهرههم ساڵح بڕیاره جى بگریگ وهگوورهى دانیشتن وهل وهرپرسهیل بهغدا، وهیسى ئویشیگ: تا ئیسه وهشیوهیگ رهسمى وهخت ئهو سهرداینه دیارى نهویه، ك ههرچهنى وهرجه ئهوهیش سهردانهیل فرهیگ ئهنجام دریاگهو كوردیش نوێنهرهیل فرهیگ دیریگ لهبهغدا، وهلى وهرپرسهیل كورد لهبهغدا نهتویهنستنه هویچ كاریگ لهى باوهتهو بكهن.
وهیسى لهیوا دوینیگ، ك گرفتهگه مهندهسه بان ئهقڵیهت ئدارهى دوسیهى كوردى لهبهغداو چوینیهتى مامڵهكردن حكوومهت مهركهزى وهل كیشهى كوردا. ههمیش ئویشیگ: بایهسه سهركردایهتى كورد ههڵویست خاس و ئاشكرایگ داشتوود، جویر ئهوهك لهى دویاخره مهسعود بارزانى سهرۆك ههرێم وت: بایهسه لهبانمان ئهو كیهشیله لهناونى ئیمهو حكوومهت مهركهزى یهكلاوه بكهیم و مهرزیگ دابنهیم ئهرا ئهو كیشهیله ك ساڵهیل فرهیگ دریژه كیشانهو چهوهڕى چارهسهرن و ئیمهیش لهناونى ماوهیگ و ماوهیگ تر نیهتوایم گرفت دروس بكهیم لهناونى ههرێم كوردستان و بهغدا.
لهباوهت ئاكام سهردانهگهیش، وهیسى وهپى گهشبین نیهو ئویشیگ : ئهو سهردانه چشت خاسیگ لهلى چهوهڕى نیهكریهیگ و جویر سهرداینهیل گوزهیشتهسهو تهنیا بڕیگ روى وهڕوى بوینهوه لهلى كهفیگهوهو هویچ تر، وهو ئومیده ك بهرنامهى ئهو سهرداینه ئشارهت وه ئهوهك لهو 19 خاڵه جیوهجى كریاگه بكا لهو داواكاریهیل كورده ك لایهنهیل حكوومهت عراقى ئمزاو ئاشكراى كردن، لهههمان وهخت خشته یا جهدوهلیگ وهختى دابنریهیگ ئهرا جیوهجیكردن ئهوهك لهو 19 خاڵه مهندگه.
وهیسى ئشارهت وه ههوهجهى كوردیش كرد وه ئهوهك نهخشهیل بهدیل و دویهم داشتوون لهحاڵهتیگ ئهگهر هات و جیوهجى نهخشهى یهكهم نهكریا پهنا بووهنه وهر نهخشهى دویهم. ئنجا ئهوهیش خستهڕوى، ك سهركردایهتى كوردى تائیسه لهچوارچیوهى ئهو روى وهڕوى بونهوه دهرنهچیه له مامڵهكردنى وهل مالكى و حكوومهت عراقى وهشیوهیگ گشتى.
بیجگه ئهوهیش وهیسى پیشنیاریگ دیریگ ئهرا سهركردایهتى كوردى، ك لهو دژایهتى و كیشهیله نهف وهربگریگ ك شیواز پهیوهندى ناونى قهوارهیل سیاسى دامهزرنهر حكوومهت شیونیگ، وهتایبهت ك كورد وهرهقهى فشارهیل فرهیگ دیرن و كریهیگ باریهنه كار و تائیسه وهكار ناوریانه.
لهبان ئهگهر یا ئحتمال سهرنهكهفتن سهردان شانده كوردیهگهیش ئهرا بهغدا لهوهر خاتر دهسكهفتن ئاكامهیل خاسیگ و ئهوهك كورد بایهسه ئهنجامى بهیگ، وهیسى ئویشیگ: كورد تویهنیگ فشار باریگه بان لیست مالكى ك لهبنهڕهتهو سهرنهكهفت وه زوورم دهنگهیل له ههڵوژاردنهیل گوزهیشت، بهڵكوو لیست عهلاوى سهركهفت، ك كورد لهى ڕویهو تویهنیگ سیاسهت باریگه كار ئهرا دویرهوخستن مالكى له دهسڵات وه كوورهى ئهنجامداین هاوپهیمانى وهل لایهنهیل تر، یا وهزیرهیل كورد له حكوومهت عراقى له كارهیلیان بكیشیگهو جویر وهرهقهى فشار دژ ئهو حكوومهته.
م م ص
| < پێشتر | دواتر > |
|---|
