شهفهق/ رێكخریاگهیل كومهڵگاى مهدهنى لهزوورم دهوڵهتهیل دامهزریا لهوهر خاتر پهرهداین وه ژیان و
لهوانهیش لهلیان لهسایهى سستمیگ دیموكراسى ژیهن، ك ئازادى ڕادهرخستن و دهس وهدهسكردن دهسڵات گریگه خوهى، ك یهیش كاریگ بنهڕهتیه ئهرا ئهو دهوڵهتهیل خاوهن ئهو سستمه.
تایبهتمهندهیل لهى باوهتهو رهسینه ئهوهك كومهڵگاى مهدهنى كومهڵگاى سیاسى نیه جویر ئهوهك سهرهتا لهلى فامستن، بهڵكوو كاریگ خودبهخشیه لهگشت مهیدانهیل كومهڵایهتى، ك چین وهرفراوانیگ گریگهو لهچالاكیهیل و لهوانهیش: یانهیل وهرزشى و كوومهڵهیل ههق ئادهدهمیزاد و رێكخریاگهیل وهرگرى یا دیفاع لهبان ههقهیل ژن و چالاكیهیل تر.
وهرجه 9 نیسان 2003، ریكخریاگهیل كوومهڵگاى مهدهنى لهعراق وجوود نهیاشت، تهنیا رژیم وهرین و رژیمهیل دكتاتۆرى تر هاوشیوهى نهود، ك هویچ دهرفهتیگ نهیا وجوود دهسڵاتیگ ركابهرى دهسڵات حكوومهت بكا، بیجگه ئهوهیش ڕى نهیا هویچ دهسڵاتیگ مهشق چالاكى خوهى بكا لهدهیشت چالاكیهیل حزب دهسڵاتدار، بیگومان یهیش نیهگونجیهیگ وهل سروشت ریكخریاگهیل كوومهڵگاى مهدهنى و ئامانج و میكانیزم یا ئالیهت كارهگهى.
وهگوورهى بهحس سهرچهوهیل ئاگادار ئهرا"شهفهق نیوز" ئاشكراى نزیكهى 13000 ریكخریاگ ناحكوومى كریاس، بیجگه كوومهڵ و ریكخریاگهیل كورد فهیلى، ك لهشوون ئهوهك شمارهیان رهسیه نزیكهى 30 ریكخریاگ ئیسه شمارهیان نزمهو بوى لهعراق ئهرا كهمتر له 10 ریكخریاگ.
شارهزایهیل ئویشن: رهسینهوه لهماناى كوومهڵگاى مهدهنى و ناوهڕووك راسكانیهگهى ئشارهت وه ئهوه ئهكا، ك سروشت مهدهنى لهڕوى بنیات دهزگایى و ریككهفتن ك لهدهوڵهت و كوومهڵگا ههس و لهوانهیش وجوود دهوڵهت ههق و قانوون ك دهوڵهتیگ دهزگایى تازهس، گشت ئهیانه گوزارشن له ئاست گهشهكردن و پهرهسهندن كوومهڵگاى مهدهنى، یهیش وه جووریگ ك ئهو دهوڵهته قهوارهیگ قانوونى سهروهخوهیى بهخشیگ و گوزارش لهكوومهڵگایگ ئهكا لهبان دیموكراسى و فرهیى سیاسى و ههقهیل ئادهمیزاد و دهس وهدهسكردن دهسڵات و سهرهوهرى مللهت.
لهباوهت كیشهو گرفتهیل ك تیهنه تویش ریكخریاگهیل كوومهڵگاى مهدهنى، سوندس میرزا جیگر سهرۆك ریكخریاگ ماڵ كورد ئویشیگ : مهسهلهگه تهركیز ئهكاده بان نهوین ژینگهیگ دهستوورى و بڕیارى و قانوونى و سیاسى گونجیاگ ئهرا كاركردن ریكخریاگهیل كوومهڵگاى مهدهنى لهعراق.
بیجگه ئهوهیش ئهرا "شهفهق نیوز"ئویشیگ : یهیش هووكاریگه له هووكارهیل گرنگ وهرتهنگهوكردن نهخش یا دهور ئى ریكخریاگهیل مهدهنیهو یهیش چووده پاڵ گرفت و كیشهیل تر جویر كهمى لهداهات دارایى و مهسهلهى تون و تیژى و تیرۆر و نهوین دهوڵهت دهزگاو قانوون، ك بویهسه بایس زیایبوین هووكارهیل فرهیگ لهڕوى وسیان دژ كاركردن ریكخریاگهیل كومهڵگاى مهدهنى.
لهباوهت كوومهڵهو ریكخریاگهیل كورد فهیلییش، میرزا ئویشیگ :ئهو ڕوى وهر یا مهساحه ك ئى ریكخریاگهیله لهتى جموجویل كهن فره تهنگهو لهههمان وهخت ژینگهى كار و سرووشتهگهیشى ناتهواوه، وهل ئهوهیشا ئى ریكخریاگهیله تایبهتن وه لایهن ئنسانى و هاوردنهوهى ئهو ههقهیله ك لهكوردهیل فهیلى زهفت كریا دویاى ئهوهك لایهنهیل حكوومى فهرامووشى كردن.
میرزا ئشارهت وهئهوهیش كرد، ك گوایا ریكخریاگهیل كوومهڵگاى مهدهنى لهبهرزترین ئاست مهركهزى دهس وهپیكرد ئهرا بهرزترین وازبوین یا ئنفتاح و ئازادى، وهلى تویهنیم بویشیم رهسیه ئاست شیوایشیو لهشوون ئاڵشتكارى 2003، ههر لهوهر ئهوهیش ئویشیم: سهرهتاى دامهزراننى كهم وكوڕى داشت. لهوهخت رژیم رمیاگیش دهزگایهیل كوومهڵگاى مهدهنى وهو ماناى راسكانیه وجوود نهیاشتنهو ئهگهر ریكخریاگهیل كوومهڵگاى مهدهنى وهشیوهى خاسیگ وجوود بیاشتان ئهوه بیگومان ئى بار نائاسایى و كیشهو گرفتهیله نهكهفتهو.
ویداد رهجهب سهرۆك ریكخریاگ هاناى كوردهیل فهیلى ئازاد، باس لهخاسى و خراوى ئى ریكخریاگهیل كوومهڵگاى مهدهنیه ئهكاو ئویشیگ : گشت كاریگ خاسى و خراوى خوهى دیریگ ، ئنجا ریكخریاگهیل كوومهڵگاى مهدهنییش ههمان شیوهس، لهباوهت خراویهگهى ئهوهسه ك كهمى ئاشكرایگ ههس لهههوڵداین ئنسانى و ئهوانهك تواناى كاركردن دیرن، لهوهر ئهوه كزى ئهو ریكخریاگهیله مینیگه بان داناین ستراتیجیهت و نهخشهى كار گونجیاگ لهبان ریڕهو هاوبهشى و پرس و هویروڕا، ك ئهویش وهبوونهى تازهیى لهو ئهزموون كاركردن مهدهنیه له عراق.
وهلى لهباوهت خاسى ریكخریاگهیل كوومهڵگاى مهدهنى، رهجهب ئهرا"شهفهق نیوز" ئویشیگ : مهسهلهگه كار دهسهجهمى و یهكسانى و ڕیز و حورمهت یهكترى و هویر و ڕاو یارمهتیداین هاووڵاتیهیل و نههیشتن تون وتیژى و پهخشكردن رووشنهویرى و ههق ژنهیل لهبهشداریكردن كار سیاسى و ئابوورى و كوومهڵایهتى و مهسهلهى هووشیاریداین لهباوهت ههق هاووڵاتیبوین گریگهو.
لهباوهت ئهو ئهو كارهیل خاسیشه ك لهلایهن ریكخریاگهیل كوومهڵگاى مهدهنى تایبهت وه كوردهیل فهیلى ئهنجام دریاس، ڕهجهب ئویشیگ : كار لهبان یهكهوگرتن كورد كریهیگ وهگوورهى پهیوهندى وهل یهكتریاو نهفوهرگرتن له هویرو ڕا و كاركردن وهشیوهیگ پیشكهفتگ و قانوونى، ك ئهندامهیل ئهو ریكخریاگهیله وهشیوهیگ خودبهخشى كار كهن لهوهر خاتر خزمهتكردن وه چینهگهیان.
لهڕوى خراوییشهو، ئهوه خهیگهڕوى و ئویشیگ " وهردهوامى و جددیهتیان كهمه لهكار و ئهو پرووژهیلیشه ك ئهنجامیدهن كهم وكوڕى و ناتهواوى دیریگ ، یهیش بیجگه ئهو كارهیله ك یهك شیوه دیرن جویر دامهزرانن ریكخریاگ هاوشیوه ك ههرچهنى جیاوازن لهیهكترى وهل ئهو ههمگه مهزڵوومیهت و داواكاریهیله ك بووده مایهى نائهنجامى و شیویان لهكارهیلیان.
بیجگه ئهوهك شمارهیل رهسمى ئشارهت ئهرا وجوود 8000 ریكخریاگ و دهزگاى كوومهڵگاى مهدهن ناچالاك كهن لهڕوى مهیدانى لهجهم 13000 ریكخریاگ قانوونى لهگشت كهرتهیل وهگوورهى قسهى چالاكوانهیل، وهلى كارهیلیان وه وهرزى یا مهوسمى تاریف كریهیگ ك ئهویش لهڕى وڕهسمهیل دینى و نیشتمانى.
لهى لایهنهو راپۆتهیل ئشارهت وه ئهوه كهن، ك ههزاران پرووسهى گهشهداین ههس، ك ریكخریاگهیل عراقى نهخشهى دامهزراننى داناو گهردیگه شوون شیوازهیل تازهیگ ئهرا تهمویلكردنى لهشوون ئهوهك دهوڵهتهیل یارمهتیدهر وسیان لهبان پیشكهشكردن دهسمیهت وهتهواوبوین ئهو ریككهفتنهیل ئمزاكریاگه ك وهرجه 2015 تازهو نیهكریهن.
ئهرا مهسهلهى تهمویلكردن ریكخریاگهیل كورد فهیلییش، چالاكوانهیل ئهو ریكخریاگهیله جهخت لهوه كهن ك" فرهجار تهمویلكردنیان لهو لایهنهیلیهسه ك زیاتر ریڕهو نهتهوهیى دیرن تا ئهوهك ئنسانى داشتوون، یا تهمویلكردنیان لهو لایهنهیلهو تیهیگ ك ریڕهو مهزهوهى جى وهجى كهن، ئنجا له ههردوگ حاڵهتهگهیش وهل ئى چینا نیهگونجیهیگ ك ئارهزوو هاوردنهوهى ههقهیلى ئهكا.
كهسهیلیگیش لهیوا دوینن، ك كوومهڵهو ریكخریاگهیل فهیلى تویهنست خوهى لهناونى ئهو شمارهى فره لهریكخریاگهیل كوومهڵگاى مهدهنیه لهعراق دهرخهیگ ك وه 13000 ریكخریاگ مهزهنه كریاو لهههمان وهخت شوون و ناویگ ئهرا خوهى تاڕادهیگ دیارى بكاو لهوانهیش" ریكخریاگ ماڵ كورد" ك بهش ریكخریاگهیل له وزارهت ههقهیل ئادهمیزاد لهناونى 10 ریكخریاگ كارا دارهى قهڵهم.
| < پێشتر | دواتر > |
|---|
