شهفهق/ چەن ماڵپەڕیگ ئنگلیزی و عەرەبی بڵاویهوكردن ك (سەدام حوسێن كامل)
كوڕە گەوراگەی رەغد دویهت سەدام و حوسێن كامل زاوا و ئامووزای، شەیدای خانمە هەسارەی پۆپ ئەمریكی (بریتنی سپێرز)ـە جوور گشت ئەندامهیل خێزانەگەیان. مناڵ و نەوەیل دیكتاتۆر وهرین عێراق ك لە 2003هو لە ئوردن پەنابەرن، لە 13 كەسن ك بریتین لە مناڵەیل رەغد: حەریر، وەهج، بەنان، عەلی، سەدام. هەمیش مناڵەیل رەنای دویهت سەدام: نەبع، ئەحمەد، سەعد، كوڕێگ عودەی ك ناوی (مەسعود تۆرۆن)ـە، وهل كوڕێگ قوسەی وەناو (مستەفا)، هەمیش نەوەیگ سەمیرە شابەندەر، دویەمین ژن سەدام ك ناوی (سەیف)ـە.
ئوردن ماف پەنابەری داگەسە هەردو دویهتەگەی سەدام (رەغد و رەنا)، ئەوان وهل هەر 9 مناڵەگەیان لە كۆشكیگ ژیهن ك شای وهرین ئوردن شا حوسێن لهتی ئەژیا و كەفتگەسە رووژهەڵات عەممان پایتەخت.
چوار لە نەوەیل سەدام، دو مناڵ رەغد و دو مناڵ رەنا، ساڵ گوزهیشتهى خوهنستن وە ئوتومبێلیگ BMW نوقرهیی رەنگ، گشت رووژیگ وەل سێ ئوتومبێل پاسەوان، لە گەراج كۆشكێگ سێ قاتی چهرمگ وەرەو خوهندنگای شوەیفات چیان، مهدرهسهگە كەفتگەسە جادهی تهیارەخانە لە پایتەخت ئوردن. كوڕیگ تر رەنای دویهت سەدامیش لە مهدرهسهیگ كوڕهیل لە عەممان دەرس خوهنێ.
قوسەی كوڕە بویچكەگەی سەدام كوڕێگ داشت وەناو مستەفا ك لە عومر 14 ساڵان، لەوهخت پهلامار هێزەیل ئەمریكا ئهرا بان ئەو ماڵه ك لهتی بوین لە موسڵ، وهل باوگی و عودەی تاتگی كوشیا.
لهشوون 25 ساڵ مەسعود تۆرۆن، نەوەی سەدام حوسێن پەیا بویە و داوای میراتەگەی لە حكوومەت عێراق ئەكا. مەسعود لە وەردەم كامێراگان ئعلان كرد ك وە شكایهتیگ داوای میراتەگەی ئەكا.
تۆرۆن وت ئیسه داڵگی تویش نەخوهشی شێرپەنجە هاتگە، ئهرا ئەوەگ خەرج فرهی دهرمان كردنهگهی دهر بكا، شكایهتیگ لەدژ حكوومەت عێراق تومار ئەكا و لهتی داوای میرات "عودەی" باوگی و تەنانەت سەدام باپیریشی ئەكا.
تۆرۆن وتیش ك ئەو تا عومر 15 ساڵان نەزانستگە نەوەی سەدام حوسێنە.
مەسعود تۆرۆن نەوەی سەدام حوسێنە، داڵگی هاووڵاتییگ وە رەگەز توركە و ناوی (سەڤیم)ـە، لە ساڵ 1980 جوور شاجوان بەغدا هەڵوژریا. عودەی خوازیهی و مەسعود تۆرۆن لهو ژنه ئهرایه بوی، لە ساڵ 1981 سەڤیم ئهرا توركیا فهرار كرد.
لهشوون چەنهها ساڵ لە بێدەنگی، لە پڕا و لە دیمانەیگ وەل رووژنامەی (یەنی شەفەق) توركی، داڵگ مەسعود تورۆن، ك ناوی (سەڤیم تۆرۆن)ـە وت "لە ساڵ 1980ئهرا سەردان میمگیگ توركمانم سەردان عێراق كردم ك خاون هوتێلیگە لە بەغدای پایتەخت".
لە ئاهەنگیگ شەوانەی هوتێلەگە داوا لە خانمهیل ئامادەبوی ئاهەنگەگە كریا، ئهرا بەشداریكردن لە پێشبڕكێ شاجوانى بانە نوا. سەڤیم ئویشێ "منیش وهل چەنهها كەس تر چیمە ناو پێشبڕكێیەگە، لەو ئاهەنگە جوور شاجوان دەسنیشان كریام، وە رێكەفت عودەی كوڕ سەدام لەو ئاهەنگە بوى.
لهشوون نانینهسهر تاج شاجوانی، عودەی داوا لهلیم كرد ك بنیشمه لای. دویاى پیرۆزبایی، وت ك وهپیم سەرسامه. لهشوون ئهوه چەن جاریگ یەكترى دیمن، دویاخر وەگورهی شەرع و یاسا بویمە هاوسەری". سەڤیم ئویشێ " ماوەی سێ مانگ جوور هەر خانمێگ بنەماڵەی دەسەڵاتدار لەناو كۆشك و ئۆتۆمبیلهیل جیاواز و كەنیزە و دەربار و دیاری ژیام.."، ئویشێدیش "خوهشی و شادیم فره دریژه نەكیشا و لهشوون ئەو سێ مانگە عودەی بویە ئنسانیگ تر و دڵڕەقانە وهلما رەفتار كردیاد و سووكایەتی وهپیم كردیاد و دیادە لیم، ئەو وهخته دو گیانیش بویم".
ئەو ژن توركە هەمیش ئویشێ "دى نەتویهنستم تهحهمول ئەو حاڵە بكهم، وهوخاترە بڕیار دام وە ژێرهوژێر بچمەو ئهرا توركیا، لەوره فره تهقالای تیرۆركردنم كریا، وهلی دەزگایهیل ئاسایش نههیشتنهیان تیرۆرم بكهن".
ژنە توركەگەی عودەی لەوره كوڕێگ ئهرای بوود و ناو باوگ خوهی نهێده قهی (مەسعود تۆرۆن). كوڕە دوڕەگە توركەگەی عودەی ئویشێ "ساڵهیل فرهیگ لە ترس و دڵەڕاوكى ژیایمن، لێوا هویرهو كردیایمن ك موخابەرات عێراق لە گشت شوین و وهختیگ ها شوونمان. ژیانم دووزەخێگ بوى ئهرا خوهی".
سەبارەت وە چوینیەتی ئاشكرابوین ئەوان، مەسعود ئویشێ لەوەرئەوەگ كتاویگ وە ناونیشان "خەسویرە توركەگەی سەدام حوسێن"ەو دەرچى، دی لهشوون ئەوە یەكسەر موخابەرات عێراق كەفتە جموجویل "ئهرا ئەوەگ هەردگمان بكوشن و لە كووڵمانهو بكەن".
ئویشێدیش "دی ئمڕوو دویای ئەوەگ دڵنیا بویمن وهزعهگه ئارامهو بویەسەو و ترس نەمهنگە، ئاشكرایهو كهم ك من كوڕ شەرعی عودەی سەدام حوسێنم، وهیخاترە ههق خوهمە وە گورەی یاسا داوای میرات باوگم لە حكوومەت عێراق بكەم، چوینكە من میراتگر شەرعی ئەوم".
سەبارەت وەوەگ ك ئایا تویهنێ ئەو قسە ئسبات بكا، مەسعود وە متمانەوە وت" بەڵێ. بەڵگەنامە و گەواهینامە دیریمن ك لە سەدا سەد قسەگانم ئسبات ئهكهن. ئەوانەیش لە وهخت گونجیاگ ئاشكریان ئەكەم".
عودەی سەدام حوسێن، لە ساڵ 1964 لەداڵگبویە، كۆلیژ ئەندازیاری وە پلەی ئمتیاز تەواو كردگە و لە زانست سیاسی دكتۆرای فەخری لەبارەی (سیاسەت ئەمریكا لە وهراوەر عێراق) وەرگرد. تەنیا كەسێگ بوى لە عێراق بیجگە لە دەوڵەت، خاون رووژنامە و تەلەڤزیۆن تایبەت وە خوهی بوى.
عودەی سێ ژن وەئاشكرا هاوردگە وەبێ ئەوەگ مناڵ ئهرای بوود، یەكەمین ژنی دویهت عزەت دووری بوى ك وەرجله ئهوهگ بچوودە شەو یهكهم سویرهگهی ئهرا ماڵ باوانی كلی كرد. دویەمین ژنی ئامووزای خوهی و دویهت بەرزان تكریتی تاتگی بوى، ئەویش تەڵاقدا و دەریكرد. سێیەمین ژنی "هیبە"ی دویهت عەلی حەسەن مەجید (عەلی كیمیاوی) بوى. وهلی ئیسه سەڤیم ئویشێ ك ئەویش ژن عودەی بویە.
| < پێشتر | دواتر > |
|---|
