شهفهق/ ئهو ئاماژهداینه له لایهن ئوسامه نوجێفى سهرۆك ئهنجوومهن نوێنهرهیل له واشنتۆن لهباوهت جیاوهبوین
عهرهبهیل سوننى و ڕهسین وه دامهزرانن ههرێمیگ، بویه مایهى كارداینهوه یا رد فعل له لایهن چهن لایهنیگ ك دیاریترینیان ئئتلاف فراكسیۆن كوردستانیه، و ئى ئاماژهكردنه دوباره ماددهى 140 هاورده وهرباس.
چون لایهنیگ كوردى مهرج ئهوه دانهن ك كووتایى وه جیوهجیكردن بڕگهیل ماددهى 140 باید ئهرا ئهوهگ دهس بكریهید دامهزرانن ههرێمیگ نوو له عیراق، وهلى لوجنهى ماددهى 140 لهبان ئهوه جهخت كهید ك ڕیكارهیلى هیمان له قوناغ یهكم مهنیه و هویچ پیشكهفتنیگ وهخوهیهو نهیه.
نهرمین عوسمان جیگر سهرۆك لوجنهى ماددهى 140 له قسهیلى ئهرا (شهفهق) وت"ماددهى 140 هیمان هاله قوناغهیل سهرهتایى لهوهر بایهخ نهداین ههر سێ سهرۆكایهتى وه داواكاریهیل لوجنهگهمان، و ههر لهیوا لهوهر تهگهرهخستن چهن لایهنیگ ك باوهڕ وهى مادده نهیرن".
عوسمان ئهوهیشه وت ك"له ساڵ 2007 ڕاپۆرتیگ پیشكهش كردیمنه ههر سێ سهرۆكایهتى لهباوهت ناوچهیل داوڕیاى له ههرێم كوردستان ، و ڕاپۆرتهگهمان چهن نهخشه یا خهریتهى كۆنه و نوو وهلیهو كلكردیمن " و ئهوهیشه ڕووشنهوكرد ك "ههر سێ سهرۆكایهتى هویچ بایهخیگ نهیانه ڕاپۆرتهگهمان لهوهر داناین ڤیتۆ له بان ههواڵهكردن ماددهى 140 ئهرا ئهنجوومهن نوێنهرهیل له لایهن تارق هاشمى جیگر سهرۆك كۆمار".
شایان وتنه ك جمشت نووهوكردن (حركه تجدید) ك تارق هاشمى جیگر سهرۆك كۆمار سهرۆكایهتیى ئهكا ئهوه ڕهتهوكرد ك ئاگاى لهو ڤیتۆ بوود ك سهرۆكهگهى لهبان ههواڵهكردن داواكاریهیل لوجنهى ماددهى 140 ئهرا ئهنجوومهن نوێنهرهیل.
شاكر كتاب قسهكهر وهناو جمشتهگه له قسهیلى ئهرا (شهفهق) لهى باوهته وت"هویچ ئاگایگ نهیریمن لهوهگ ڕوى دا له گفتوگوو ناوبهین ئهنجوومهن سهرۆكایهتى لهباوهت ماددهى 140 دهستوور، وباخهوهر نهكریایمنه لهباوهت ڕاسیهگهى ئهو ڤیتۆ لهباوهت ماددهگه".
لهلاى خوهیهو پسپۆر قانوونناس تارق حهرب له قسهیلى ئهرا (شهفهق) وت"دامهزرانن ههرێمیگ له ههردوگ پارێزگاى موسڵ و دیاله وه چهواشهى جیوهجیكردن ماددهى 140 دهستووره چوینكه بووده مایهى دابڕین ناوچهیلیگ له ههرێمیگتر، و ههرێمیش جوور پارێزگا نیه".
حهرب له بان ئهوهیشه جهختكرد ك "ماددهى 140 وه رهد بوین وهخت كووتایى وهپى نیهتیهید، و هیمان هاله قوناغهیل یهكم جیوهجیكردنى و ئهوهگ بتواید ئى مادده ههڵوهشنیدهو بایهته دهستوورهگه هامار یا تهعدیل بكا".
شایان وتنه ك نوێنهر ههرێم كوردستان له لوجنهى باڵاى جیوهجیكردن ماددهى 140 دهستوور ههمیشهیى عیراق ، و سهرۆك دهسهى گشتى ناوچهیل جیناكووكى له ناوبهین بهغدا و ههولێر ، زویتر ئهوه ئاشكراكرد ك ههر سێ سهرۆكایهتى كهمتهرخهم بوین و گووش نهیانه جیوهجیكردن ماددهى 140 دهستوورى و تا ئیسه هویچ ههوڵیگ جددى نهیانه ئهرا جیوهجیكردنى.
مهحهمهد ئسحان له قسهیلى ئهرا ڕووژنامهنویسهیل ئهوه ئاشكراكرد ك پیشنیار و داواكاریهیلیان سێ جار ئهرا ههرسێ سهرۆكایهتى كلكردنه تا بڕیاریگ له باوهت ئهو گیروگرفتهیله دهر بكهن ك چارهسهركردنیان ها وهدهس ئهو سهرۆكایهتیهیله، وهلى هویچ جوواویگ وهرنهگردنه.
ئحسان زیاتریش ئهوهیشه ڕووشنهوكرد ك ئهو قهزا و ناحیهیله ك ڕژیم وهرین لهو پارێزگایهیل داوڕیهیان ك ئهرا مهمهر سیاسى گۆڕانكارى دیمۆگرافى خستهبانیان و خستهیانه بان پارێزگایهیلترهك ، سهرۆك كۆمار تویهنید وهو دهسڵاته ك دریاسه پى مهرسوومیگ كۆمارى دهربكهید ئهرا ئهوهگ دوباره بخریهنه بان پارێزگایهیل ڕهسهن خوهیان.
| < پێشتر | دواتر > |
|---|
