شهفهق/ له شوون ئهوهگ ئوسامه نوجێفى سهرۆك ئهنجوومهن نوێنهرهیل عیراق ههڕهشهى ئهوه دا ك سوننه
پهنا بهنه جیاوهبوین، ڕا و ئهراى چوینهیل لهى باوهته جیاواز بوین، لهلاى خوهیهو لیست عیراقیه دامهزرانن ههر ههرێمیگ له بان بنهماى تایهفى یا ڕهگهزى ڕهتهوكرد، لهولایشهو هاوپهیمانى نیشتمانى و ئئتلاف فراكسیۆنهیل كوردستانى هاوڕان وهل عیراقیه وهلى ئهوان مهرج ڕاپرسى مللى دانان ئهرا دامهزرانن ههر ههرێمیگ.
مهحهمهد خالدى ئهندام لیست عیراقیه له قسهیلى ئهرا (شهفهق) لهى باوهته وت:"لهماوهى گوزهیشته داواكاریهیل فرهیگ سهرههڵدان له بڕیگ له پارێزگایهیل ڕووژئاوایى ئهرا دامهزرانن ههرێمیگ فیدرالى" و ئاماژهیش وهوهدا ك:"ئى قسهیل دویاخره ك نجێفى كردهیان له باوهت دامهزرانن ههرێمیگ سوننى ئهوه نیشان دهید ك ترسى لهى حاڵهته ههس نهك وه ئهوهزى ئهوهگ بڕى كهس لهلى ڕهسینهو".
خالدى زیاتریش وت:"مهردم پارێزگایهیل سوننى وهوه شعوور كهن ك حكوومهت ناوهندى هویچ دهسڵاتیگ ئهرا ئهنجوومهنهیل مهحهللى نهیشتیه، لهوهر ئهوهسه ك نوجێفى داواكردیه دهسڵاتهیلیان فراوانهو بكریهید وهخاتر ڕهسین وه سستهم لامهركهزى له وهڕیهوبردن كاروبار پارێزگایهیلیان وهگوورهى دهستوور". و ئهوهیشه ڕووشنهوكرد ك:"سهركردهیل لیست عیراقیه وههویچ شیوهیگ قهبوول نیهكهن ههرێمیگ سوننى دامهرزیهید، چوینكه ئى كردهوه له خزمهت بهرژهوهندى مللهت و یهكپارچهیى خاكهگهى نیه".
ههر لهى باوهته ئهشواق جاف نوێنهر ئئتلاف فراكسیۆنهیل كوردستانى له قسهیلى ئهرا (شهفهق) وت:"قسهیل نوجێفى له باوهت دامهزرانن ههرێمیگ سوننى له شوون ههستكردن وهوه هات ك كاروان ئۆپهراسیۆن سیاسى و دامهزرانن حكوومهت حازرى ك وه هاوبهشى نیشتمانى ناوى نریهید، هویچ مهنفهعهتیگ ئهرا وڵات نهیرى" و لهبان ئهوهیشه جهختكرد ك :"بڕیگ له سیاسهتمهدارهیل ئهوه دوینن ك دامهزرانن ههرێمهیل له وڵات وه خاسترین چارهسهر گونجیاى ئهرا چارهسهركردن ناكووكیهیل و كێشهیل گیركردى لهناوبهین فراكسیۆنهیل".
جاف زیاتریش وت:"دامهزرانن ههرێمیگ لهبان بنهماى تایهفى و ڕهگهزى ها وهدهس مللهت ك بایهته وه ڕیگهى ڕاپرسى لهى كاره بهشدار بوود". و داوایشكرد ك چهو بووڕنه ههرێم كوردستان جوور نموونهیگ ك گشت پیكهاتهیل و مهزهوهیل مللهت عیراق لهتى ژیهید".
لهو پارێزگایهیله ك ئاماژه وه داواى فیدرالى كردنه ههریهك له سهلاحهدین و بهسره وهل دوبهرهكى لهناوبهین كاروهدهسهیل پارێزگاى ئهنبار.
شایان وتنه ك دهستوور عیراق ههق دهیده ههر پارێزگایگ یا زیاتر ك ههرێمیگ دامهزرنن وه دو شیوه، یهكمیان پیشكهشكردن داواكارییگ ئهرا ڕاپرسى له لایهن سێ كوت ئهندامهیل ئهنجوومهن ئهو پارێزگا ك تواید ههرێمیگ دامهرزنید، یا یهك له سهر دهى دهنگدهرهیل ههر پارێزگایگ داواى بكهن.
لهلاى خوهیهو ئیمان ئهسهدى ئهندام ئئتلاف عیراقى وهسهركردایهتى حهكیم له قسهیلى ئهرا (شهفهق) وت:"دهقیگ له دهستوور ههس ك دامهزرانن ههر ههرێمیگ بایهته لهبان بنهماى تایهفى و ڕهگهزى نهود " و ئهوهیشه ڕووشنهوكرد ك:"ههر ههرێمیگ بایهته له بان بنهماى جوگرافى دامهرزیهید وه شیوهیگ ك ههرێمیگ له ناوڕاس و ههرێمیگ باشوور و ههرێمیگ له ڕووژئاوا داشتویمن وهل ههرێم كوردستان".
ئهسهدى زیاتریش وت ك:"گشت پارێزگایهیل، پیكهاتهیل و لایهنهیل و مهزهوهیل جیاجیاى مللهت لهتیان وهیهكهو ژیهن، و دامهزرانن ههرێمیگ له بان بنهماى تایهفى و ڕهگهزى تهنیا پهیڕهویكهرهیل یهك مهزهو یا یهك لایهن سوود لهلى وهرگرن، لهسهر حساب ئهو لایهنهیل و مهزهوهیلتر و یهیشه هویچ وهختیگ قهبوول نیهكریهید، چوینكه سستهم فیدرالى ههق یهكسانى و حاشاكردن له تایهفهگهرى و ڕهگهزپهرستى مسۆگهر ئهكا". و جهخت لهبان ئهوهیشه كرد ك :"دامهزرانن ههر ههرێمیگ بایهته وه ڕاپرسى مللهت سهربگرى".
شایان وتنه ك سستهم فیدرالى سستمیگه دهسڵات كووتایى لهتى بهشهوكریاسه بان ناوهند و لایهنهیل ترهك، و، وه ئهوهزى سستهم ناوهندى، سهروهرى لهتى بهشهوبووده بان دو ناوچه یا زیاتر، وه شیوهیگ ك ههر یهك لهى ناوچهیله وهتهنیا دهسڵات خوهى داشتوود وه بى دهخالهتكردن ئهو ولایهتهیلترهك.
| < پێشتر | دواتر > |
|---|
