شهفهق/ نورى مالكى سهرۆك حكوومهت ئمڕوو یهكشهممه له بان ئهوه جهختكرد ك وڵات ههوهجهى ها
دهرسداین بنهمایهیل ماف ئادهمیزاد له گشت قوناغهیل خوهنین، و لهو لایشهو وهزیر ماف ئادهمیزاد ئهوه ئاشكراكرد ك عیراق باوهڕ داسه 77% له ڕاسپاردهیل وهرین نهتهوهیل یهكگرتى لهباوهت ماف ئادهمیزاد.
ئمڕوو یهكشهممه له بهغدا چالاكیهیل كۆنفرانس ئستشارى نیشتمانى ماف ئادهمیزاد وهسهرپهرشتى نورى مالكى سهرۆك حكوومهت عیراق دهس وهپیكرد وه بهشداریكردن ڕیكخریایهیل مهدهنى له بهغدا و پارێزگایهیل و له نواى گشتیان ڕیكخریاى ماڵ كورد، ئهوه بیجگه ڕیكخریایهیل ههرێم كوردستان و لوجنهى ماف ئادهمیزاد له ئهنجوومهن نوێنهرهیل.
مالكى له وتارهگهى لهى كۆنفرانسه ك له بارهگاى ئهنجوومهن نوێنهرهیل عیراق گریهدریا وهگوورهى سهرچاوهیگ (شهفهق) له كۆنفرانسهگه ئامادهبوى، وت:"عیراق ههوهجهى هاوه دهرسداین ماددهى بنهمایهیل ماف ئادهمیزاد و بكریهیده بهشیگ له ماددهى ڕووشنهویرى نیشتمانى له گشت قوناخهیل خوهنین".
مالكى زیاتریش وت:" باس كردن ماف ئادهمیزاد له سایهى ڕژیمهیل سهركوتكهر مهحاڵ بوى، جوور ئهوهگ له سهردهم ئهو دیكتاتۆریهتهیل ڕویدا ك ههمیشه باس له ئازادى و ماف ئادهمیزاد و دیموكراسى كهن، وهلى له ڕاسى خوهیان ئادهمیزاد سهركوت كهن و فشار خهنه بان ئازادى".
لهلاى خوهیهو مهحهمهد شیاع سودانى وهزیر ماف ئادهمیزاد له وتارهگهى لهى كۆنفرانسه وت :"عیراق وه ڕێژهى 77% ڕاسپاردهیل وهرین ماف ئادهمیزاد پهسهن كردیه".
لهو لایشهو سهلیم جبورى سهرۆك لوجنهى ماف ئادهمیزاد له ئهنجوومهن نوێنهرهیل داوا كرد ك :"بایهته ڕیكخریایهیل كوومهڵگاى مهدهنى بهشدارى بكهن له جهختكردن لهبان ڕووشنهویرى ماف ئادهمیزاد له عیراق".
ئاد ملكهرد نوێنهر سكرتێر گشتى نهتهوهیل یهكگرتى له عیراق چالاكیهیل كۆنفرانسهگه وه "ڕویداى گرنگیگ ئهرا بتهوكردن ماف ئادهمیزاد له عیراق" وهسفكرد.
ملكهرد زیاتریش وت:"ئى كۆنفرانسه یهكمه ك گشت پیكهاتهیل كوومهڵگا لهتى گردهو بویه ئهرا تاوتوێكردن یا مناقهشهى ماف ئادهمیزاد ئهرا ڕهسین وه ڕیككهفتن لهبان ڕیڕهوكاریگ وهل بارووهزع عیراق بگونجیهید".
نوێنهر سكرتێر نهتهوهیل یهكگرتى له عیراق لهبان ئهوهیشه جهختكرد ك :"ڕهشنویس پلان كارنیشتمانى ئهرا ماف ئادهمیزاد له عیراق وه یهكیگ لهو 135 راسپارده دریهیده قهڵهم ك عیراق وهپیان قهبوول كردیه جوور بهشیگ له وهوهرباسخستن(ئستعراز) ناودهوڵهتى گشتلاگریگ ئهرا ئهو كۆنفرانسه ك له جنیڤ له شوبات ساڵ وهرین دانریا".
شایان باسه ك ئهنجوومهن ماف ئادهمیزاد سهر وه نهتهوهیل یهكگرتى ك بارهگاگهى هاله جنێڤ، له شوبات وهرین له ڕاپۆرتیگ ڕهسمى ك عیراق پیشكهشى كرده ئهنجوومهنهگه، لهباوهت واقع ماف ئادهمیزاد خستهى ڕوى، له چوارچیوهى میكانیزم وهدهرخستن وهرزانهى گشتلاگر ئهنجوومهن ئهرا تۆمارگه یا سجلات ماف ئادهمیزاد .
عیراق لهو ڕاپۆرتیه جهختكرد له بان وهدیهاتن گۆڕانكارى خاسیگ له مهیدان بتهوكردن واقع ماف ئادهمیزاد و كهمهوكردن و ڕیگردن له تهعدا وشكانن ماف ك هووكارى ئهرا مهترسیهیل گهورایگ بردهوه و لهوانهیش پاشمهنیهیل گوزهیشته.
| < پێشتر | دواتر > |
|---|
