شهفهق/ فیلم كوڵ كوردی "رۆژین" له دهرهاوردن سینهماكار كورد چیمهن رهحیمی و له نويسانن تۆبی
نۆروهی، بهشداری له فیستیڤاڵ ناونهتهوهیی فیلم ههق ئادهميزاد له شار بهرشلۆنا له ئسپانیا ئهكا.
خانمه سینهماكار سنهیی و نیشتهجای لهندهن و دهراوهر فیلم كوڵ "رۆژین" چیمهن رهحیمی له ئهرا ئاژانسهيل خهوهر وت: فیلم كوڵ "رۆژین" له رووژهیل 8 تا 12ی حوزهیران/ یۆنیۆ2011 له فیستیڤاڵ ناونهتهوهیی فیلم "ههق ئادهميزاد" Human Rights بهرشلۆنا Barcelona له شار بهرشلۆنای ئسپانیا نمایش ئهكريهێ".
وتیش "فیلم كوڵ درامای رۆژین ماوهگهی 10 دهقهس و ساڵ 2010 لهلایهن كۆمپانیای بهریتانی پۆسیۆن رۆگێ پیكچێرس Poisson Rouge Pictures له شار لهندهن بهرههم هاتگه، وهسهرهات دويهته كورديگ ئهرا تهماشاكهر فيلمهگه باس ئهكا ك له وهخت ژیانی تويش بڕێگ گرفت بويه و وه ناچاری سهردان بهریتانیا ئهكا و له یهكيگ له هوتێلهيل ناودار شار لهندهن كار پهيا ئهكا".
رهحیمی له درێژهی قسيهيلهگهی وت" ئهی دويهته تهقالا ئهكا ڕازهيل گوزهيشتهی خوهی لههویرهو بواد، رووژيگ وه رێكهفت تويش میوانيگ هوتێلهگه ئهدێ و لهو رێ ئهوهو گوزهيشتهی خوهی و گشت ڕازهيلی ئهيادهو هويرێ و دوواره ئهو يادگارييهله یهخهی ئهو ژیانه نوويه ئهگرن، كێشهيل دهروينی ئهی دويهته كورد پهنابهره ئاڵۆز ئهدۆن و ڕويوهڕوی بڕیارێگ قورس ئهدێ".
ئاشكرايشيهوكرد" فیلم رۆژین ڕووشنايی ئهخادهو بان پرس ههق ئادهميزاد، ئهو پرسیاره ئهرا تهماشاكهر دروس ئهكا ك ئایا ئهدێ ئايم بتويهنێ زاڵ بدێده بان گوزهيشتهی خوهی و بتويهنێ گیان وهخشين داشتوود تهنانهت وهرانوهر وه تاوانبارهيل ههر چهن ك تاوان ههرگز له ياد ناچێ".
ئهوهيش خسته روی "ئهی فیلمه لهتهمووز/ یۆلیۆ 2010 خهڵات كرياگه، ئهی فیلمه له لایهن ناوهند فیلم سهروهخوهی ناسرياگ وه "ئیندێ فێست" Indie Fest له ئهمهریكا نمایشكرياگه و له لایهن پسپۆرهيل و شارهزایهیل ئهی ناوهنده خهڵات وهخشرياسهپێ. ئیندێ فێست ناوهنديگ ئاكادیمییه و له بڕێگ پسپۆڕ بوار سینهما پێكهاتگه ك دو جار له ساڵێگ جهمهو ئهدۆن و له سهرتاسهر جههان وه ههزاران فیلم ڕهسێده دهسیان و ئهوان ههر شهش مانگ جارێگ نزیك وه 80 تا 100 فیلم دهسنیشان ئهكهن و خهڵات ئهوهخشنه پيان".
ئهوهيش وت ك "بهشێگ له خهڵات ئهی ناوهنده ئهوهسه ك ناو فیلمهيل ههڵوژرياگ لهبان ماڵپهڕهگهیان دائهنێن و وهرپرسهیل سهدان فستیڤاڵ و فیلمساز له سهرتاسهر دنیا ناو ئهی فیلمهيله ئهوینن، چوينكه ماڵپهر فیلم سهروهخوهی ئیندێ فێست گرینگییگ تایبهت ديرێ و ئهدێده مایهی گرینگیداين وهو فیلمهیله ك ئهی ناوهنده ناویان ئهواد".
ئهی فیلمه تائيسه له چهندین فیستیڤاڵ ناونهتهوهیی فیلم له ئاست دنیا نمایشكرياگه، لهوانه:
ـ له فستیڤاڵ ناونهتهوهیی فیلم كوڵ "دی ئیندێ" The Indie له شار كالیفۆڕنیا له ویلایهت كالیفۆڕنیا له ویلایهتهيل یهكگرتگ ئهمهریكا
ـ له فیستیڤاڵ ناونهتهوهیی فیلم "ریندێریارد" له شار لهندهن و له ئسپانیا
ـ له یهكهمین خول فستیڤاڵ ناونهتهوهیی فیلم كوردی له ئیرلهند
ـ له فستیڤاڵ ناونهتهوهیی فیلم "كۆرتۆ"
ـ له فستیڤاڵ ناونهتهوهیی فیلم "تۆكیۆ" له ژاپۆن
ـ له فستیڤاڵ ناونهتهوهیی فیلم "ستێپ" Step له ئۆكرانیا
ـ له 22مین خول فستیڤاڵ ناونهتهوهیی فیلم "ئهستهنبووڵ" له توركیا
ـ له دويمین خول فیستیڤاڵ جوانهیل كورد له داڵاس له شار داڵاس له ویلایهت تێگزاس له ویلایهتهيل یهكگرتگ ئهمهریكا
ـ له فستیڤاڵ ناونهتهوهیی فیلم "ستپس" و "ستازدینۆر" له ویلایهتهيل یهكگرتگ ئهمهریكا
ـ له فستیڤاڵ ناونهتهوهیی فیلم "پۆنتینۆ" له ئیتاڵیا
ـ له بهش رووژههڵات ناوهڕاس له فستیڤاڵ ناونهتهوهیی فیلم "بهنگ" له شار نۆتینگهام له بهریتانیا.
| < پێشتر | دواتر > |
|---|
