شهفهق/ ههرچهنى ك پسپۆرهیل نهفتى ناوخۆیى و ههرێمى وشیار لهوه كردن ك عیراق پشت وه هاوردن غاز
له ولاچتهیل هاوسا ئهرا وهكارخستن وێستگه یا مهحهتهیل كارهبا وه سووتهمهنى غازى، وهلى وهزارهت كارهبا وهى دویاخره ئهوه ئاشكهراكرد ك ڕیككهفتنیگ سهرهتایى وهل ئیران ئمزاكردیه ئهرا هاوردن غاز سروشتى ئهرا وهكارهاوردنى له بهرههمهاوردن كارهبا.
وهزارهتهگه ئهوهیشه وت ك وهگوورهى یاداشت تهفاهم له ناوبهین عیر اق و ئیران ، ئیران لویلهیگ ئهرا عیراق كلكهید و غاز وهپى دهیدهپى ئهرا وهكارخستن دو وێستگه یا مهحهتهى بهههمهاوردن كارهبا له بهغدا.. ئى لویله وه كێڵگه یا حهقل مهنسورهوه رهد بوود له نزیك سنوور عیراق و ئیران له پارێزگاى دیاله، و غازهگهى وهرهو مهحهتهى كارهباى شار سهدر چوود له باكوور بهغدا و ئهرا مهحهتهیگتر له پهڕ باكوورى شارهگه ، و ئى لویله وه 18 مانگ تهواوكریهید.
پهرلهمانتاریگ ئهندام له لوجنهى نهفت و غاز پهرلهمانى ئهوه ئاشكهرا كرد ك:"ئمزاكردن بۆند یا عهقدیگ بنهڕهتى له ناوبهین وهزارهت كارهبا و لایهن ئیرانى هاله چوارچیوهى ههڵهپهڵهكردن له چارهسهر كردن قهیران كارهبا ك له عیراق پهرهسهنیه".
فهرهاد ئهترووشى له قسهیلى ئهرا شهفهق وت:"ئیرات پسپۆرى یا خبرهتیگ گهورا دیرید له دهركردن و كلكردن غاز ك ئهرا وهكارخستن مهحهتهیل كارهبا خاسه ، وهلى عیراق ئهوپهڕ بایهخ دایهسه دهركردن و كلكردن نهفت، و ڕوى وهڕوى سهختیهیل گهورایگ بویه له دهركردن ئهو غازه ك له ناوخۆ ههوهجه وهپى دیرید".
لهباوهت ئاكامهیل ئابوورى و مهنفهعهت ئى بۆند ئمزاكریایه، ئهترووشى ئهوه ڕووشنهوكرد ك:"ئهو ڕووشنهوكردنهیله ك وهزیرهیل نهفت و كارهبا پیشكهشى كردنهسه پیمان ئهوه ئهرامان ئاشكراكرد ك لهى وهخته ، هاوردن غاز له ئیران لهوه ههرزان تره ك عیراق دهرى بكریهید و له لایهن ئابووریهو خاستره و بڕیگ فرهى پویل و خهرج له كیسهى عیراق هیلیدهو ك بایهته ئهرا دهركردن ئهو غازه خهرجى بكهید، له ههمان وهختیش غاز یهدهك له عیراق پاریزید".
وهلى پسپۆرهیل بوار وزه لهبان ئهوه جهختكردن ك عیراق یهدهك یا سپێر غازى فره گهورا دیرید، ك خهیدهى پلهیل بهرز ڕیزبهندى گرنگترین 10 دهوڵهت بهرههمهاوهر له جههان، لهوهختیگ داواكارى لهبان ئى مادده زیایهو بویه ئهرا بهرههمهاوردن وزهى كارهبا و شرینهوكردن ئاو وهتایبهتى له باشوور عیراق.
پسپۆر ئابوورى باسم جهمیل ئهنتۆن لهلاى خوهیهو له قسهیلى ئهرا شهفهق وت:"نهوین ڕیكخستن یا تهنسیق له ناوبهین ههردوگ وهزارهت كارهبا و نهفت سیماى سهرهكى كاركردن ههردوگیان بوى لهماوهى گوزهیشته ههرچهنى ك جیگر سهرۆك وهزیرهیل له كاروبار وزه حوسێن شههرستانى سهرپهرشتى كردویده بان ههردوگ وهزارهتهگه".
ئهنتۆن گوزارش له ئهراى چوین خوهى كرد ك ئهو بۆند ئمزاكریایه ئهرا هاوردن غاز له ئیران لهوهر جوور و تایبهتمهندیهیل غاز ئیرانیه ك ئهرا وێستگهیل بهرههمهاوردن كارهبا خاسه، لهوهختیگ ك عیراق هیمان تویش قهیرانیگ گهورا هاتیه له بهرههمهاوردن وزهى كارهبا و ئهنتۆن لهى باوهته پرسى:"ئایا هووكار هاوردن غاو ئیرانى ئهوهسه ك بهههمهاوردن غاز له عیراق هیمان مهنفهعهتى كهمتره ؟ تا گهنى پلانسازیه ك پاڵ ناسه وهارهت كارهبا ئهرا ئمزاكردن ئى بۆنده؟ و زیاتریش وت ك:"ڕووژهیل هاتى جوواو ئى پرسیاره دهن".
شایان باسه ك پسپۆرهیل بوار پیشهسازى غاز له عیراق ئویشن ك عیراق تواناى بهرههمهاوردن زیاتر له 6000 ملیۆن پاى سێجاى پێوانهیى (قدم مكعب قیاسى) دیرى لهو غازه ك وهل دهركردن نهفتهو دهرچوود، و بهش ههوهجهى بازار ناوخۆ كهید. و ههمیش ئویشن ك زیاتر له 70% له غاز عیراق ههر لهو جوورهسه ك وهل نهفتهو دهرچوود ، ك ڕووژانه نزیكهى 700 ملیۆن پا لهلى سزیهید، ك بهش ههوهجهى ڕووژانهى عیراق كهید ، وهلى بڕ فرهیگ له ئیران و وڵاتهیل هاوسیا سینید و تیهرید، له وهختیگ ك تویهنید بووده گهوراترین كلكهر غاز له ناوچهگه و له جههان وهگشتى.
| < پێشتر | دواتر > |
|---|
