شهفهق/ شمارهیگ ئابووریناس لهوه یهكڕا بوین ك عیراق ههوهجهى ها وه زیاتر له 700 میلیار دۆلار ئهرا
ئاوهدانكردن ژیرخانهیلى و ههڵسانن واقع ئابوورى وڵات، و لهبان ئهوهیشه جهختكردن ك داهاتهیل نهفت بهش ئى ئۆپهراسیۆنه نیهكهید.
سهلمان موسهوى ئهندام لوجنهى ئابوورى و وهبهرهاوردن پهرلهمانى له قسهیلى ئهرا شهفهق لهى باوهته وت:"كهرت نهفتى نزیكهى 91% داهات وڵات دابین كهید، لهوهر ئهوه بایهته ئهوباقى كهرتهیل ئابوورى كارا و چالاكهو بكریهید ئهرا پاڵپشتى كردنى". و ئهوهیشه ئاشكراكرد ك:"وڵاتهگهمان ههوهجهى ها وه 700 میلیار دۆلار ئهرا دوباره ئاوهدانكردن ژیرخانهگهى و ههڵسیان واقعه ئابووریهگهى، و ئهگهریش وه بودجهى گشتى پشت بووهسیمن زیاتر له 50 ساڵ توایمن ئهرا دوبارهئاوهدانكردن وڵات".
زیاتریش وت ك:"ئاڕاستهى حازریمان ئهوهسه ك وهبهرهاوردن له كهرت تایبهت كاراوه بكهیمن له ناو و له دهیشت وڵات، و لهى باوهته وڵاتهیل پویل بهخش ئامادهیى خوهیان نیشاندان ئهرا پیشكهشكردن قهرتهیلیگ وه قازانج یا نهفیگ كهم و ماوهیگ دویر و دریژ". و ئهوهیشه وت ك:"ئى دهوڵهتهیل پویل بهخشه داوا له عیراق كهن، كهرت تایبهت كاراوه بكهید وهخاتر مقهیهتى كردن قهرتهیلیان".
موسهوى لهبان ئهوهیشه جهختكرد ك:"پویلهیل عیراق ك له سهندوق پهرهوهپیداین نهتهوهیل یهكگرتى گیرهاوریاوین ، وهختى بخریهنه ناو بانكهیل ئهمریكى نهف خاسیگ دیرن و یهیشه ههنگامیگه له ریڕهو ڕاس و دروسیگ وهرهو تین و گوڕداین وه كهرت وهبهرهاوردن".
زویتر ئهنجوومهن وهزیرهیل بڕیاردا ڕاپۆرتهگهى حكوومهت عیراق پهسهن بكهید له باوهت وهرگردن سهندوقهگهى پهرهوهپیداین عیراق وهگوورهى بڕیار ئهنجوومهن ئاسایش شماره 1956 ساڵ 2010 ك له لایهن لوجنهى مقهیهتى كردن پویلهیل عیراق پیشكهشكریاس، و لهى باوهته حسابیگ تایبهت وهناو حكوومهت عیراق له ئهمریكا وازكریهید ئهرا پیشوازیكردن له گشت داهاتهیل و پویلهیل دهوڵهت عیراق و لهلایهن بانك مهركهزى عیراقى وهڕیهوبریهید؛ وهبى سهرپهرشتى ناودهوڵهتى و ئى ڕاپۆرته خریهیده وهردهس ئهندامهیل ئهنجوومهن ئاسایش ناودهوڵهتى ئهرا تاوتوێكردن یا مناقهشه كردنى تا بكریهیده بڕیاریگ ك له 1 تهممووز ساڵ 2011 كاروهپى بكریهید.
موسهوى ئاماژهیش وهوهدا ك :"قانوون تهعرفهى گومركى گونجیاى ترین چارهسهره ئهرا پشتبهسانن وه بهرههمهیل ناوخوهیى و قورتاربوین له كاڵایهیل هاورده ك بازاڕهیلمان داگیر كردنه، و وهى زویهیله ئى قانوونه جیوهجى كریهید ئهرا هانداین كهرت تایبهت ك هاوبهش سهرهكییگه له پیشخستن پهرهوهپیداین ئابوورى".
زویتر حكوومهت عیراق له سهرهتاى ئى ساڵ حازریه نیاز ئهوه نیشاندا ك تواید قانوون تهعریفهى گومركى نوو له 6 ئادار گوزهیشتهوه جیوهجى بكهید، وهو مهرجه ك باج هاوردن بچهسپنیده بان ههزاران كاڵاى هاورده وه ڕێژهیل 5 تا 100% ، وهلى وهزارهت دارایى ئهوه ئاشكراكرد ك ئى قانوونه تاوهختیگتر دویاخریا لهترس ئهوه ك نرخهیل بازاڕهیل عیراق بهرزهو بوود.
سهلمان موسهوى لهباوهت ئهو كهمیه ك ناوچهیل پیشهسازیه وهپیهو ناڵنن، وت:"ڕیككهفتن سهرهتاییگ وهل وهزارهت كارهباوه گریهدریاس ئهرا ئهوهگ له سهعات ههیشت شهوهكى تا سهعات چوار ئیواره كارهبا بیهیده ناوچهیل پیشهسازى ".
شایان باسه ك بهغداى پایتهخت بڕیان وهردهوام كارهبا وهخوهیهو دوینى ك فرهجار ڕهسیده ڕووژانه 18 سهعات، و یهیشه وهخهراوى شكیاسه بان ژیان ڕووژانهى هاوڵاتیهیل.
لهلاى خوهیهو سائر فهیلى ئهندام دهسهى وهبهرهاوردن عیراق له قسهیلى ئهرا شهفهق وت:"عیراق ههوهجهى ها زیاتر له 700 میلیار دۆلار ئهرا دوباره ئاوهدانكردن ژیرخانهیلى و حكوومهتیش نیهتویهنید له داهات نهفت گشت پرۆژهیلى پویلدار بكهید، لهوهر ئهوه هویچ چارهیگتر نهیرى لهوه زیاتر ك پشت وه وهبهرهاوردن له كهرت تایبت بووهسى".
ئهوهیشى ڕووشنهوكرد ك :"یهكیگ له گرنگترین بڕگهیل وهبهرهاوردن ئهوهسه ك كهرت بهرههمهاوهر و خزمهتگوزارى پیشبخریهید ك لهى وهخت حازریه پهكى كهفتیه و ئهرا كاراكردن و تین وگوڕ داین وهپى ههوهجهى هاوه كهرت تایبهت و كهرت گشتییش". و لهبان ئهوهیشه جهختكرد ك:"كهرت بهرههمهاوهر له عیراق فره وهرهو دویا چویه و بایهته ئهرا ئهوه كار بكریهید ك دوباره ههڵسیهید؛ ئهویش وه كاراكردن كهرت وهبهرهاوردن".
شایان باسه ك نورى مالكى سهرۆك وهزیرهیل له كۆڕیگ گفتوگووكردن لهباوهت دیدگاى وڵاتهیل پویبهخش ئهرا بارووهزع عیراق ك له لایهن دهسهى ڕاوێژكارهیل نویسنگهگهى خوهى ڕیكى خریا، داواى ئهوه كرد ك وهردهوامى بدریهیده پیشكهشكردن كوومهك و پشتگیرى ئهرا عیراق تا ئهو وهختهگ ئۆپهراسیۆن بیناكردن و ئاوهدانكردنى كووتایى وهپى تیهید، و ئاماژهیش وهوهدا ك داهاتهیل كهرت نهفت و غاز بهش نیهكهید ئهرا ئاوهدانكردن ژیرخانهیل، و عیراق ههوهجهى ها كار فرهیگ تاگهر بایدهو ئهرا پله وپایهى ناودهوڵهتى جارنى خوهى.
ئهوهیشه مهنیه بویشیهید ك وڵاتهیل پویلبهخش وه عیراق بڕیاردان چهودێرى میكانیزمهیل و بڕیارهیل حكوومهت بكهن ئهرا خاسهوكردن ئابوورى عیراق تا بووده ئابوورییگ بى لایهن و سهروهخوهى ك پشت وه وهتایبهتكردن یا خصخصه بهسید و پشتگیرى كردن له كهرت گشتى و خاسهوكردن كاركردن كۆمپانیایهیل گشتى.
| < پێشتر | دواتر > |
|---|
