شهفهق/ فراكسیۆنهیل سیاسى عیراقى ئهوه ئاشكراكردن ك ههر دهسپیشخهرى نوویگ له لایهن سهرۆك ههرێم
كوردستان مهسعوود بارزانى ئهرا چارهسهركردن ئهو ناكووكیهیله ك كهفتیهسه ناوبهینیان، جیى پشتگیرى كردن گشت لایگه، و لهبان ئهوهیشه جهختكردن ك ههوهجهى گهورایگ ههس ئهرا تین و گوڕ داین وه چوارچیوهیل گفتوگوو ئهرا جیوهجیكردن ئهوهگ له ههولێر لهبانى ڕیككهفتوین.
عهلى عهللاق ئهندام ئئتلاف دهوڵهت قانوون ك بهشیگه له هاوپهیمانى نیشتمانى له قسهیلى ئهرا ماڵپهڕ شهفهق لهى باوهته ئویشید:"فراكسیۆنهگهمان هاوهل ههر دهسپیشخهرییگ ئهرا تین و گوڕ داین وه گفتوگووهیل ناوبهین فراكسیۆنهیل سیاسى بهشدار له كابینهى حكوومى وهخاتر ڕهسین وه لهیهكحالیبوینیگ لهباوهت كێشهیل گیركردى". و ئهوهیشه ڕووشنهوكرد ك:"یهكیگ له كێشهیل گیركردى لهناوبهین فراكسیۆنهیل سیاسى مهسهلهى یهكلاكردن ناوناین وهزیرهیل ئاسایشیه، و ئهو بڕگهیله ك له ڕیككهفتنهگهى ههولێر مهنیهسهوه، و ههر دهسپیشخهرییگ ئهرا چارهسهركردن ئى كێشهیله هاله بهرژهوهندى وڵاتهگهمان".
عهللاق ئهوهیشه وهدرووخست ك:"قهیرانیگ سیاسى له ناوبهین فراكسیۆنهیل سیاسى وجوود داشتوود". و ئهوهگ له مهیدان سیاسى ڕوى دهید وه:"ناكووكى لهباوهت چهن كێشهیگ گیرخواردى ك خهریكه وهرهو چارهسهركردن چن وهڕیگهى گفتوگووكردن" وهسفكرد.
شایان وتنه ك سهرۆك ههرێم كوردستان مهسعود بارزانى له ڕووژ دوشهممهى وهرین چهوى كهفته كاندیدكریاى وهرین سهرۆكایهتى كۆمار ولایهتهیل یهكگرتى ئهمریكا سیناتۆر جۆن مهكێن وهل وهفدیگ له كۆنگرێس ئهمریكى، و ههردوگلا له باوهت نزیكهو بوین مهوقهى خودكیشان هێزهیل ئهمریكى له عیراق له كووتایى ئى ساڵ حازریه قسهكردن، و قوناغ پاش خودكیشانهگه تاوتوێ كردن و سهرۆك بارزانى لهى دیداره لهبان ئهوه جهختكرد ك ئهو پهڕ ههوڵ و تهقهلا دهید ئهرا ئهوهگ هێزهیل سیاسى عیراقى له یهكترى نزیكهو بكهید له شوون ئهو قهیرانه ك كهفتهناو پهیوهندى ناوبهین چهن فراكسیۆن گهورا.
ههرلهى باوهته نوێنهر لیست عیراقیه ناهده داینى له قسهیلى ئهرا ماڵپهڕ شهفهق وت:"فراكسیۆنهیل سیاسى ههوهجهیان ها وه دهسپیشخهرى نوویگ ئهرا نزیكهوكردن را و ئهراى چوینهیلیان و چارهسهركردن كێشهیل جیناكووكى ناوبهینیان". و ئهوهیشه ڕووشنهوكرد ك :"حكوومهت هاوبهشى نیشتمانى ههر له سهرهتاى دامهزراننى و له ههر قوناغیگ ههوهجهى ها وه تین وگوڕ داین وه مێز گفتوگوو لهناوبهین لایهنهیل بهشدار لهى حكوومهته" و یهیشه وهمایهى داخ خواردن زانست.
ئى نوێنهره داواى ئهوهیشه ك:"فراكسیۆنهیل سیاسى زیاتر پابهند بوون لهو حاڵهته ك ههر دهسپیشخهرى نوویگ بایده وهرهو". و وتیش ك:"سهركردهیل فراكسیۆنهیل سیاسى بایهته له كیشمهكیش و بوختكردن وهیهكترى دویرهو بكهفن و ڕوى بكهنه خزمهتكردن مللهت عیراق و ههوڵداین ئهرا خاسهكردن واقع زندگانى و خزمهتگوزارى مهردم".
شایان وتنه ك له ماوهى چهن ڕووژ گوزهیشته ههریهك له نورى مالكى سهرۆك وهزیرهیل و سهركردهى لیست عیراقیه وه ڕیگهى پهیام نویسیاى ئهرا یهكترى، ڕهخنه لهیهكترى گردن و بوخت وهیهكترى كردن.
شوان مهحهمهد تاهه نوێنهر ئئتلاف فراكسیۆنهیل كوردستانى له پهیوهندییگى وهل شهفهق لهى باوهته وت ك:"سهرۆك ههرێم كوردستان مهسعود بارزانى وهردهوامه له پهیوهندى كردن وهل لایهنهیل بهشدار له ئۆپهراسیۆن سیاسى و ههمیشه ئاگاى ها لاى ئۆپهراسیۆن سیاسى وڵات". و زیاتریش وت ك:"ریككهفتنهیل ههولێر له چوارچیوهى دهسپیشخهریهگهى سهرۆك بارزانى، زوورم خاڵهیلى جیوهجى كریان، جوور دامهزرانن حكوومهت هاوبهشى نیشتمانى، و ئهوهگیش مهنیهسهو جووریگه له جیاوازى له ڕا و ئهراى چوین ناوبهین فراكسیۆنهیل سیاسى".
ئهوهیشه ڕووشنهوكرد ك:"بارووهزع سیاسى له عیراق فره تهپهو بویه و قهیران متمانه پهیا بویه له ناوبهین فراكسیۆنهیل بهشدار له ئۆپهراسیۆن سیاسى له كابینهى حكوومى، و ئمڕوو ههوهجه ها وه بتهوكردن چواچیوهیل تهفاهم و گفتوگوو لهناوبهینیان وهخاتر دهرهباز بوین لهى قهیرانه".
شایان باسه ك سهرۆك وهزیرهیل و سهرۆك فراكسیۆن دهوڵهت قانوون نورى مالكى له ههفتهى وهرین ناو كاندیدكریایهیلى ئهرا پۆستهیل وهزارهتهیل ئاسایشى پیشكهشكرد ك ههریهك لهیانهن: سهعدون دلێمى ئهرا وهزارهت وهرگرى یا دیفاع، و تهوفیق یاسرى ئهرا وهزارهت ناوخۆ یا داخلیه و ریاز غهریب ئهرا وهزارهت ئاسایش نیشتمانى.
ئهوهیش مهنیه بویشیم ك لیست عیراقیه وهسهرۆكایهتى ئهیاد عهلاوى لهوه وشیار كرد ك زووران و كیشمهكیش سیاسى نوویگ بهرپابوود ئهگهر ئى ناوهیل كاندیدكریایه ئهرا وهزارهتهیل ئاسایشى خریانه ڕى و دهنگ دریاپیان.
یاسر عماد
| < پێشتر | دواتر > |
|---|
