شهفهق/ سهرۆك ههرێم كوردستان له دیداریگ وهل سادات پیرخدر و سهنتهره ڕووشنهویرى و
كوومهڵایهتیهگهیان، وت: نیهود نویسهرهیل، خهتهیل قرمز بشكنن، و مهلایهیل دینییش نیهود وهكهیف خوهیان فهتواى تهكفیر و كوشتن مهردم بیهن.
بارزانى زیاتریش وت كوردستان وڵاتیگ دهوڵهمهنه و لهسایهى خهبات پێشمهرگه و خوین شههیدهیل؛ ئمڕوو ڕهسیهسه قوناغیگ پیشكهفتى و دهسكهفتهیل گهورایگ وهدهس هاوردیه، لهوهر ئهوه مقهیهتى كردن ئهو دهسكهفتهیله ئهرك سهرشان گشت تاكیگ كوردستانه، وهبى جیاوازى له هویر و ڕا و ئهراى چوینهیل سیاسى.
لهباوهت بهراورد كردن بارووهزع كوردستان وهل ئهوهگ له تونس ڕوى دا سهرۆك بارزانى وت : ئیمه باوهڕ وه پرۆسهى ههڵوژاردن دیریمن و نیهود خوهمان وهل ئهوهگ له تونس ڕوى دا بهراورد بكهیمن، ئیمه وه تانك و زریپووشهو نههاتیمنهسه سهر كورسى دهسڵات، بهڵكوو وهڕیگهى ههڵوژاردنهوه، له ئایندهیش ههر كهسى وه ههڵوژاردن بایده سهر كورسى دهسڵات بماركى بوود.
وڵات وڵات گشت كهسیگه و موڵك تاكه گرووپیگ یا تاكه كهسیگ نیه، من زانم ئیوه لهناو خوهدانهو سهر وهچهن گرووپیگ سیاسیین، وهلى له مهسهلهیل نهتهوهیى یهكین و یهیشه مایهى شانازیه.
سهرۆك ههرێم كوردستان زیاتریش وت: ئۆپۆزیسیۆن ههق خوهیه ڕهخنه یا ئنتقاد له دهسڵات بگرى، وهلى له چوارچیوهى قانوون و لهههمان وهختیش دهسڵات ههق خوهیه وهرگرى یا دیفاع له خوهى بكهید، وهلى له ههمان چوارچیوهى ئهو قانوونه، و جیاوازى نیهود بڕهسیده ڕادهى دوشمنكارى.
دهسڵات و ئۆپۆزیسیۆن ههردوگیان ڕووڵهى مللهتن و بایهته وهیهكهوه ههوڵ بیهن برایهتى له ناوبهینیان لهكیس نهچوود، چوینكه ئهگهر ماڵ كورد یهكى نهود وهزعهگه شیویهید و ناحهزهیلیش سوود لهو دهرفهته وهرگرن.
بارزانى ئهوهیشه وت ك : نویسهرهیل ئازادن لهوهگ نویسننهى وهلى نیهود كڕ یا خهت قرمز له نویساننهگانیان بشكنن و قسه له لهسهر موقهدهسات بكهن، مهلاى دینییش ههق خوهیه مهردم ئیرشاد بكهید وهلى نیهود وهكهیف خوهى فهتواى تهكفیر و كوشتن مهردم بیهید، لهوهر ئهوه بایهته ههردوگلا ڕیز له یهكترى بگرن و مقهیهتى هاوسهنگیهگه بكهن و نهیلن شیرازهى كوومهڵگهى كوردستانى بشیویهید.
سهرۆك ههرێم كوردستان ئاماژهیش وهوهدا ك لهبارنامهگهى ئهوه دانایه ك مهلایهیل دینى و نویسهرهیل و گشت پارت و لایهنهیل سیاسى جهمهو بكهید تاگهر ئهو جیاوازى و درزه له ناوبهین ههرولا نهیلید.
PNA
| < پێشتر | دواتر > |
|---|
