شهفهق/ پارت دیموكرات كوردستان ئاشكرایهو كردگه ك مهسهلهى سهرلهنوو وهدهسهو
گردن سهروكایهتى حكوومهت ههرێم له هاوپهیمانهگهى یهكیهتى نیشتمانى له سهرهتاى ئمساڵ یهكلاوه بویه و له بان یهیش تهئكید كریاگه جیگر سهروك حزب نێچیرڤان بارزانى تهنیا كاندیده ئهرا وهرگردن پۆست سهروك كابینهى ههفتم حكوومهت ههرێم كوردستان. جهعفهر ئبراهیم قسهكهر وهناو پارت دیموكرات كوردستان له تهسریحیگ ئهرا شهفهق نیوز وتگه: پارتى مهسهلهى وهرگردنهوهى پۆست سهروك حكوومهت له یهكیهتى نیشتمانى له وهخت دیاریكریاگ یهكلاوه كردگه و له بان یهیش تهئكید كردگه ك ئى بڕیاره وههاوكارى و ههماههنگى وهل یهكیهتى نیشتمانى هاوپهیمان دهرچگه.
ئبراهیم یهیش ئاشكرا كردگه ك حزبهگهى نێچیرڤان بارزانى جیگر سهروك حزب ئهرا سهروكایهتى حكوومهت ئاینده كاندید كردگه.
جى باسه ههردو حزب سهرهكى لهههرێم كوردستان له ساڵ 2008 رێككهفتنیگ ئمزا كردنه ك وهگورهیى ئهو رێككهفتنه ههركام لهو دو حزبه ئهرا ماوهى دو ساڵ سهروكایهتى حكوومهت و پهرلهمان بگرنه دهس.
| < پێشتر | دواتر > |
|---|
