شهفهق/ ئئتلاف دهوڵهت یاسا دویهكه ئعلان كرند ك حكوومهت كوهیت وهشیوهى رهسمى
دهعوهت سهروك حكوومهت عراقى نورى مالكى كردگه ئهرا سهردان ئهو وڵاته تا لهباوهت كیشهیل چارهسهرنهكریاگ دو لایهنه گفتوگوو بكریهێ و له بان یهیش تهئكید كردگه ك حكوومهت عراقى پابهنده وهچارهسهركردن كێشهى بهندهر موبارك و دهركردن عراق له ژێر بهند ههفتم. عهبدولمههدى خهفاجى ئهندام ئئتلاف دهوڵهت یاسا له تهسریحیگ ئهرا شهفهق نیوز وتگه: دهعوهتنامهگهى دهوڵهت كوهیت ئهرا نورى مالكى سهروك حكوومهت عراقى گام خاسیگه ئهرا چارهسهركردن كێشهیل ناونى ههردو وڵات و له حكوومهت عراقییش تواستگه لهى دهرفهته ئستفاده بكا ئهرا چارهسهركردن كێشهى بهندهر موبارهك و دهركردن عراق له ژیر بهند ههفتم جاڕنامهى ناودهوڵهتی.
خهفاجى لهبان یهیش تهئكید كردگه ك بایهد كێشهى بهندهر موبارهك و مهسهلهى دهركردن عراق له ژێر بهند ههفتم جوور یهك دۆسیه سهیر بكریهێ و سازش له یهكیگ له حهساو ئهوهكه نهكریهێ و یهیش خستگهسه روى ك كاریگهرى سلبى ههردو كێشهگه له بان ئابوورى عراق سابت بویه و یهیش بویهسه بایس گرژى له پهیوهندى ههردو لا.
| < پێشتر | دواتر > |
|---|
