شهفهق/ ئهندامیگ سهروهخوهى هاوپهیمانى كوردستانى دویهكه تهئكید كرد ك وهزع
ناودهوڵهتى و ههرێمى ئیسه رێ وهدامهزرانن دهوڵهت كوردى نیهێد و یهیش خستگهسه روى ك ئامانج ئیسهى كورد دامهزرانن ههرێمهیل فدرالى و جیوهجى كردن سهرجهم ماددهیل دهستوره وهتایبهت ماددهى 140. مهحمود عوسمان له تهسریحیگ ئهرا شهفهق نیوز وتگه: ئیمه جوور نهتهوهى كورد بهشبهشهوكریاگ ههق دیارى كردن چارهنویس خوهمان دیریم وهلى ههق چشتیگه و راسیهگانیش چشتیگ تر و یهیش ئاشكرا كردگه ك وهزع ئیسه ئهرا ئعلان كردن دهوڵهت كوردى گونجیاگ نیه.
عوسمان زیاتر ئاشكرایهو كردگه وهزع ناودهوڵهتى و ههرێمى و بیجگه ئهوهیش جوگرافیاى كوردستان وهربهسیگه لهوهردهم ئهو ئامانجه ك سهرجهم مللهت كورد خهو وهپیهو دوینێ و ههر داخوازییگ لهو باوهتیشه ههڵهس. ئهندامهگهى هاوپهیمانى كوردستانى یهیش خستگهسه روى ك توركیا و ئیران و تهنانهت ئهمریكایش پشتگیرى له دامهزرانن چنه دهوڵهتیگ لهى وهخته نیهكهن و بیجگه ئهوهیش شیویان وهزع سوریا و وهدیهاتن كیشهیل تازه.
جى باسه لهى دویاخره باس دامهزرانن دهوڵهت كوردى گوڕ گردگه و كۆسرهت رهسول جیگر یهكم سكرتێر یهكیهتى نیشتمانى كوردستان له شوون سهردانیگ ئهرا ئهمریكا وهرووژنامهى ئاسۆ وت: وهخت ئهوه رهسیه دهوڵهت كوردى ئعلان بكریهێ.
| < پێشتر | دواتر > |
|---|
