شهفهق/ ئئتلاف دهوڵهت یاسا دویهكه ئاشكرایهو كرد ك حكوومهت عراق خهریك
گفتوگووه وهل چهن وڵات ئهوروپى ئهرا وهرگردن ئهندامهیل رێكخریاگ موجاهدین خهلق ئیرانى و له ههمان وهختیش بڕێگ لهلایهنهیل وهیه تاوانبار كردگه ك تهقالا كهن ئى رێكخریاگه له عراق بمینێ تا جوور وهرهقهى فشاریگ دژ وهئیران وهكارى بوهن.سادق لهبان ئهندام ئئتلاف دهوڵهت یاسا له تهسریحیگ ئهرا شهفهق نیوز وتگه: حكوومهت عراقى رازى نیه هویچ رێكخریاگیگ ئۆپۆزسیۆن وڵاتهیل هاوسا له خاك وڵات بمینێ لهوانهیش رێكخریاگ موجاهدین خهلق ئیران ك دهس له شههید كردن رووڵهیل عراق داشتگه و له بان یهیش تهئكید كردگه حكوومهت تهقالا ئهكا ئى رێكخریاگه له عراق دهر بكا.
یهیش ئاشكرا كردگه ك حكوومهت عراق خهریك دیالۆگه وهل چهن وڵاتیگ ئهوروپى تا ئهندامهیل ئهو رێكخریاگه قهبول بكهن لهوهر ئهوهگ عراق ناتویهنێ ئهندامهیل ئهو رێكخریاگه لهیه زیاتر میواندارى بكا و له لایگترهو چهن لایهن ئهخوازن لهى رێكخریاگه جوور وهرهقهى فشاریگ دژ وه وڵاتهیل هاوسا ئستفاده بكهن.
| < پێشتر | دواتر > |
|---|
