شهفهق / لهژیر ناونیشان"رووژنامهگهرى عراقى لهسایهى یاساى ههق رووژنامهنویسهیل" كۆڕێگ ساز كرد.
لهو كۆڕه ك لههۆڵ دهزگاى رووشنهویرى و ڕهسانن كوردهیل فهیلى شهفهق وهڕیهو چى، شمارهى فرهیگ له رووژنامهنویس و رووشنهویرهیل ئاماده بوین، سهرهتا عهلى حسێن فهیلى سكرتێر لق بهغداى سهندیكاى ڕووژنامهنویسهیل كوردستان وتاریگ پێشكهش كرد و لهتى جهخت لهوه كرد ك یاساى ههق رووژنامهنویسهیل دیرهوهخت هات و ههمیش لهتى داواى رێكخستن لهناونى سهندیكاى رووژنامهنویسهیل عراقى و سهندیكاى رووژنامهنویسهیل كوردستان كرد ئهرا چارهسهر كیشهى خێزان ڕووژنامهنویسى.دویاتر سهرنویسهر رووژنامهى(الصباح الجدید)ئسماعیل زایر یاساى ههق رووژنامهنویسهیل وه گامیگ لهبان ڕى دامهزران شهرعى و یاسایى دانا لهوهر خاتر ئاڵشتكردن خراویهیل یاسا ئهرا خاسى، لهههمان وهخت ئاماژه وه ئهوهیش كرد ك داناین یاسا لهبان فشار مهردم بویه.
بیجگه ئهویش زیاد عجێلى وهڕیهوبهر دهسهى ئازادیهیل رووژنامهنویسى ئاشكراىهو كرد، ك یاساى ههقهیل رووژنامهنویس رهخنهیل ناودهوڵهتى وهرفراوانیگ وهخوهیهو دیه، ئاماژهیش كرد وه ئهوهك قانوون ئعلانیگه ئهرا نیازهیل نهك زهمانهتیگ ئهرا رووژنامهنویسهیل و ههقهیلیان له دهسكهفتن زانیارى.
ههر لهوهر ئهوهیش ئهنجوومهن نوێنهرهیل عراقى لهدانیشتن 17یهمین خوهى لهساڵ تهشریعى دویهم، دهنگداین خوهى ئاشكرا كرد وهسهرۆكایهتى سهرۆك ئهنجوومهن ئوسامه نوجێفى وه زوورم دهنگ لهبان پهسهنكردن یاساى ههق رووژنامهنویسهیل.
جى باسه، دو سهندیكا لهعراق ههس، یهكهمیان سهندیكاى رووژنامهنویسهیل سهر وه حكوومهت ناوهند ك لق دیریگ له ناوچهیل ناوڕاس و باشوور وڵات و دویهمیانیش سهر وهحكوومهت ههرێم كوردستانهو لقهیلى كهفتیهسه ناو خود ههرێم و بهغدا و ناوچهیل داوڕیاگ له ههرێم كوردستان.
| < پێشتر | دواتر > |
|---|
