شهفهق/ وهڕێهوبهر ناحیهی مهنهلی ئاماژه وهوه ئهكا: له جهم حهفتا ئاوايی كوردنشین سنور مهنهلی ك
لهسهردهم رژيم بهعس لهساڵ 1975 ئاوارهی ئيران كريان، وه خاتر كردهوهيل تیرۆریستیهوه تهنيا سێ خێزان كورد تويهنستنه ئهرا زێد خوهیان گلهو بخوهن، وتیش: "وهرجله يه رێژهی كورد له مهنهلی (70%) بويه، وهلی ئيسه هاوكێشهگه چهواشه بويهسهو و رێژهی عهرهب (70%) زیاترهو بويه".
عهبدولحسێن عهباس، وهڕێهوبهر ناحیهی مهنهلی، له گفتگوويگی وهل سايت خهندان، نگهرانی خوهی نیشاندا له پشتگووشخستن ناوچهگهیان لهلایهن ههردو حكوومهت ناوهندو ههرێم، وتیش: "لهدويای پرۆسهی ئازادی عیراق، خێزانهيل كورد ناوچهگه ك له ساڵ 1975 ئاوارهی ئيران كرياوين تواستن گلهو بخوهن، وهلی عهرهبهيل شوڤێنی رێگری كردن و له یهك ئاوايی وه شهويگ پانزه پیاو ئاواييهگه شههید كردن".
وهڕێهوبهر ناحیهی مهنهلی خوهشحاڵی نیشتهجايهيل رهسهن ناوچهگه خستهڕوى له هاتن هێز پێشمهرگه ئهرا ناوچهی گهرمهسێر، داوايشكرد: له وهخت دروسبوين هێز هاوبهش وه ههمان شيوهى سهعدیهو جهلهولا ئهرا مقهيهتيكردن كوردو نیشتهجايهيل رهسهن مهنهلی، هێز پێشمهرگه رهوانهی ناوچهگهیان بكريهێد.
ناوبرياگ تهئكیدیش كرد: ئيسه كهمتر له (20%) نیشتهجايهيل مهنهلی له نهتهوهی كورد پێك تيهێد، بان (70%) نیشتهجايهيليشی له نهتهوهی عهرهبه، جاران رێژهی كورد له بان (70%) بوى، وهلی تیرۆریستهيل و عهرهبهيل شۆڤێنی هاوكێشهگه چهواشه كردن و له دويای پرۆسهی ئازادیيش لهو خێزانهیل گلهوخواردگه تهنيا سێ خێزانیان مهننهسهو".
س: خهندان
| < پێشتر | دواتر > |
|---|
