شهفهق/ ئمڕوو یهكشهممه نوێنهریگ ئهندام لههاوپهیمانى فراكسیونهیل كوردستانى، داوا له حكوومهت كرد
مووچهیگ مانگانه دابنهێد ئهرا ئهو خوهنكارهیله ك خوهندن تهواو كردنهو بیكارن، لهوهر ئهوهك ههوهجهى فرهیگ وهپى دیرن.
چین جایهڵ جوانهیل وهتایبهت دهرچگهیل پهیمانگاو كۆلیژهیل ناڵنن وهدهس نهوین دهرفهت كار و بیكارى، ك ئهویش لهئهنجام كهمى وهزیفهو كار حكوومى و پهیاكردن كار له كهرت سهرمایهگوزارى لهوڵات.
نهجیبه نهجیب له گفنوگوویگ ئهرا(شهفهق)وت: شمارهى دهرچگهیل پهیمانگاو كولیژهیل ساڵ وهساڵ روى له زیابوین كهن و كار حكوومییش بهس نیه ئهرا پڕهوكردن ههوهجهیل، ههر لهوهر ئهوهیش بایهسه ستراتیجیهتیگ له حكوومهتهوه بوود ئهرا چارهسهر ئى مهسهلهو داوا لهحكوومهت كرد وهداناین بڕه پویلیگ مانگانه ك كهمتر نهود له 150 ههزار دینار عراقى ئهرا ئهوانهك خوهندن تهواو كردنهو بیكارن.
لهلایگ تریشهوه، چهودیرهیل لهیوا دوینن ك گرفت بیكارى چارهسهر نیهود ئهگهر كهرتهیل تایبهت كارا نهكریهن و سهرمایهدارهیل و كومپانیایهیل سهرمایهگوزارى دهس نهكهنه پرووسهى بنیاتناین لهوڵات.
شایهن باسه، دهسهى باڵاى وهكارناین كارمهندهیل لهههرێم كوردستان لهسهرهتاى ئى مانگه ئاشكراى داین بڕ 150 ههزار مانگانه كرد ئهرا دهرچگهیل كۆلیژ و پهیمانگایهیل لهوانهك بیكارن.
| < پێشتر | دواتر > |
|---|
