شهفهق/ سهرچاوهیگ خهوهردار ئهوه ئاشكراكرد ك بهڕێوهبهرایهتى شارهوانى خانهقین، وه هاوكارى وهل بهڕێوهبهرایهتى شارهوانى دیاله، ئمڕوو دوشهممه، 1300 پارچه زهوى نیشتهجابوین، بهشهوكرده بان سوودمهنهیل،
له وهختیگ ك فهرمانبهرهیل سهروه فهرمانگهیل ههرێم كوردستان نهگردهو.ئى سهرچاوه ئهرا (شهفهق) ئهوهیشه وت ك بهشهوكردن ئى زهویهیله وه ئامادهبوین قایمقام قهزاى خانهقین، وه تیر وپشك (قرعه) ئهنجام گرد و كهس وكار شههیدهیل و كهمئهندامهیل و كارمهندهیل هێزهیل ئاسایش ناوخۆ و ئهو فهرمانبهرهیل حكوومیه گردهو ك 20 ساڵ خزمهت لهو فهرمانگهیل دهوڵهته دیرن ك سهروه دیاله و حكوومهت مهركهزیین.
ئى سهرچاوه ك قهبوول نهكرد ناو خوهى ئاشكرا بكا زیاتریش وت ك فهرمانبهرهیل سهروه فهرمانگهیل ههرێم كوردستان، لهوهر هووكارهیلیگ نادیار، ناهمى كریانه لهى زهویهیله ك وهشیوهیگ ڕهسمى له فهرمانگهیل تۆماركردن عهقارى و تاپوو نویسریهن.
سهرچاوهگه ئهوهیشه ئاشكراكرد ك فهرمانبهرهیل سهر وه فهرمانگهیل ههرێم كوردستان داواكردن لهى زهویهیله بهش داشتوین حاڵیان حاڵ هاوكارهیلیان له فهرمانگهیل حكوومهت ناوهندى.
ئى فهرمانبهرهیله داواى ئهوهیشه كردن ك شمارهى ساڵهیل خزمهت كهمهو بكریهید تا ئهو ڕاده ك بهشهوكردن زهوى بگریدهیانهو، وهتایبهتى ك زوورمیان له چین جایڵهیلن ك له شوون ڕمیان ڕژیم وهرین دامهرزیانه و زویتریش زهوى (ڕهسمى) وهرنهگردنه.
شایان باسه ك ههر فهرمانبهریك پارچهیگ زهوى تاپوو دیرید قهرز عهقارى گردهوهى، ئهوه بیجگه دهنگ وباس ئهوهگ له ناوهندهیل حكوومى باس كریهید له نیاز حكوومهت ئهرا پیشكهشكردن قهرتیگ 100 مهعاشى وه فهرمانبهرهیلى.
| < پێشتر | دواتر > |
|---|
