شهفهق/ چالاكوانیگ ژن له خهتهرناكى ئهوه هوشیاركرد ك ئامارهیل ئاماژه وهپى دانه ك زیاتر له 3 میلیۆن
ژن ناندهر (معیله) ههس له عیراق.
سهنا وتوت له پهیوهندییگى وهل شهفهق ئهوهیشه وت ك:"ئهو بارووهزعه ك عیراق تویشى هاتیه نائاساییه، چوینكه یه سێ دهیهس تویش جهنگ و تون وتیژى و تیرۆر و تووقبردن و دهركردن و كووچوهپیكردن هاتیه، لهوهر ئهوه خێزانهیل فرهیگ پشت وهژنهیل بهسان له دابینكردنكردن خهرج و زندگانیان".
لهوهردهوامى قسهیلى وت:" ئهیه مهسهلهیگ فره خهتهرناكه، چوینكه دى ژن بویهسه ئهرك ههڵگر ناو ماڵ وئهوانهگ هانه ناوماڵ". و ئاماژهیش وهوهدا ك دهوڵهت:"بایهته ئهرك ئى خێزانهیله ههڵگرید و مهعاش مانگانه بووڕیدهو، ئهوه بیجگه كلكردن ژنهیل ئهرا خولهیل پیشخستن توانایان تا بتویهنن كاریگ ئهرا خوهیان بویننهو وهل توانایانهو بگونجیهید، و یهیشه داهات و خهرجیگ گونجیاى ئهرایان پهیاكهید تا بتویهنن نان خێزانهیلیان بیهن، ئهوه بیجگه وازكردن پرۆژهیل بویچگیگ ئهرا ئى خێزانهیله وه وهخشین بڕیگ پویل ك بیلیدان بتویهنن لهى جووره پرۆژهیل بویچگه واز بكهن".
شایان باسه ك وهزارهت كار و كاروبار كوومهڵایهتى ئهوه ئاشكراكرد ك زیاتر له سێ میلیۆن ژن ههس ك خوهیان و مناڵهیلیان ههوڵ و تهقهلادهن ئهرا مهنین له ژیان و لهى باوهته نهسار روبهیعى وهزیر كار وتیه:"شمارهى ژنهیل ناندهر له 3 میلیۆن ژن زیاتره، وهگوورهى ئامارهیل وهزارهت پلانسازى".
| < پێشتر | دواتر > |
|---|
