شهفهق/ سكرتێر دهسهى مهركهزى حزب شیوعى پهرده لهبان ئهوه لادا، ك گوایا فهرمان سهركردایهتى گشتى
هیزهیل چهكدار لهباوهت چووڵكردن بارهگایهیل حزب شیوعى عراقى لهبهغدا گوزارش له ناڕهحهتى وهرپرسهیل ئهكا وهرانوهر ههڵویست یا مهوقف حزبهگه ك گوایا پشتگیر مهردم بویه لهوهخت خودنیشانداین و داواكردن ههقهیل ڕهوایان.
حهمید مهجید مووسا له كۆنگرهیگ ڕووژنامهگهرى ك لهبارهگاى رووژنامهى (ڕى مللهت) له 9 / 3 / 2011 ساز كریا وت: ناڕهحهتى فرهیگ لهلایهن وهرپرسهیل حكوومهتهوه كریهیگه دى دهرههق وه حزب شیوعى عراقى لهبان ئهو زانیارى ههواڵگیریه درووكانیه ك ئویشیگ گوایا حزب شیوعى وهرپرس بویه لهبان دهرچگن مهردم لهو خودنیشانداینهیل دویاخره ك لهپاریزگایهیل عراقى ڕویدا.
حهمید مووسا زیاتر ئاشكرا كرد و وت: زویتر ئیمه وهرجه دهرچگن خودنیشاندهرهیل سهرهساو وهرپرسهیل كردیمن و وتیمنه پیان: ئیمه هایم وهل مهردما له داواكردن ههقهیل رهوایان و ئمڕوو ئهوان ناڵنن وهدهس ئهو گهناتهكاریهوه ك گشت دهزگایهیل دهوڵهت گرتهسهوه جویر نهوین خزمهتگوزارى و تهنگهوكردن مهرز ئازادیهیل، ههر لهوهر ئهوهیش ئیمه ههمیشه پشتگیر مللهتیم لهوهخت دهرچگن ئهرا خودنیشانداین و داواكردن ئهو ههقهیلیانه ك لهدهستوور چهسپیاگهو لهههمان وهخت مللهت له گشت حزبهیل گهوراترن.
وهل ئهوهیشا سكرتێر حزب شیوعى وت: ئیمه ههڵویست و قهیوهندى مهردمیمان نیهوهسیمنه ئهوهك له تونس با مسر ڕویدا، وهلى ئیمه زویتر له یاداشتهیل حزب جهخت لهبان خاسسازى و چارهسهر ههڵویست دهزگایهیل سیاسى و قورتاربوین له بهشبهشكردن(محاصصه) كردیم وهگشت شیوهیگیهوهو قهوڵ دایمنه مهردم ههقهیلیان جى وهجى بكهیم، ئنجا ئیمهیش راسگوویم وهل خوهماناو دویریم له دوڕویى یا دوزووانى لهههڵویست و قسهیلمان.
حهمید مهجید مووسا جهخت لهوهیش كرد ك حزبهگهى لایهنگر و پشتگیر ئهو مهردمهسه ك خودنیشانداین ئهنجامدان و داواى خسسازى و نههیشتن گهناتهكارى كردن و وت: وهردهوام هایم وهل مللهتا لهگشت داواكارییگ ك دهستوور ڕى وهپى داگه، چوینكه دیموكراسى تهنیا ماناى ههڵوژاردنهیل نیه، بهڵكوو دیموكراسى فره لهوه گهوراترهو نیهوگ پهیمانهى وه ئهوه بكهیم.
لهباوهت ئهوهك بهعزه كهسهیلیگ تاوانبار لایهنهیلیگ سیاسى كردنهو گوایا دهس داشتنه لهڕویداین ئهو خودنیشانداینهیله، حهمید مووسا پرسیار كرد و وت: ئایا چشتیگ ههس لهدهیشت سیاسهت؟ ئنجا ئهوهك ئویشیگ ئهو خودنشانداینه دهس سیاسهت لهپشتى بویه، ئویشیمهپى: بهڵى ئهو خودنیشانداینهیله سیاسى بوى و حزب شیوعییش ههق خوهیه لهگشت ریكخریاگهیل كومهڵگاى مهدهنى ك خوهیان نیشان بیهن چوینكه بهشیگن له مللهت.
لهباوهت بارهگا یا مهقهڕهیل حزبیش لهبهغدا ناوبریاگ وت: لهساڵ 2004 هوه داواى ئهوه كردیمنه هس وه وجوودمان بكهن لهى شوونهیلهو دویاخر ئیمه وهرپرس نیمن لهبان ههرچشتیگ ڕوى بهیگ ، ئنجا وهختى وزارهت دارایى كرایهى بارهگایهیلمان دانا پویلهگهى فره بوى و لهتوانامان نهوى ئهو پویله بیهیم و ئیمهیش مهسهلهگه خستیمنه لاى سهرچهوهیل قانوونى و تائیسهیش جواویگ وهپیمان نهدریاگه.
وهل ئهوهیشا حهمید مووسا زیاتر ئاشكراى كرد و وت: ئیمه موڵكهیل فرهیگ دیریم ك رژیم وهرین زهفتیان كرد وه بڕیاریگ سیاسى و چهنهها جار داواى هاوردنهوهى ئهو موڵكهیله كردیمنه وهگوورهى ئهو قانوونه ك ئهنجوومهن نوێنهرهیل دهنگ لهبانى دا، وهلى تا رووژ ئمڕوو هویچ ئهنجامیگ ناتهسه دهس ئهرا هاوردنهوهى ئهو موڵكهیلمانهو ههمیشه چهودیرى كارهگه كهیم لهڕى دهزگاى داواكارى موڵكیهت و ساڵهیل فرهیگه ههر چهوهڕى كهیم. لهباوهت ئهوهك ئهگهر بایگ و حزب شیوعى لهو بارهگا یا مهقهڕهیلیانه لهلایهن دهوڵهتهوه دهربكریهن چه كهن؟ حهمید مووسا وهى جووره جواو داو وت: ئیمه ترس لهوه نهیریم لهبارهگایهیل خوهمان دهرمان بكهن، چوینكه شیوعیهیل بارهگایان ها لهناو دڵ مهردم.
| < پێشتر | دواتر > |
|---|
