شهفهق/ دزیگ هونهرمهند كورد خانهقینى حهسهن ههیاس ناچار كرد، پیشوهخته ئهلبوومه نووهگهى ساڵ
2011 ـهى بخهیده بازاڕ وهرجلهوهگ دویاڕتووش بخهیده بانى، له شوون ئهوهگ ئهو سهیاره دزى ك ئهو ئهلبوومه لهتى بوى.
هونهرمهند حهسهن ههیاس له دیمانهیگ وهل ماڵپهڕ شهفهق ئى ههواڵه پشتڕاسهو كرد و وهى شیوه جوواو پرسیارهیلمان دا:
*شهفهق:(كرماشان دیرم) ئهلبووم نوو هونهمهند حهسهن ههیاسه و تازه خریاسه بازاڕ، چوین وهئهنجام ڕهسى؟
* حهسهن ههیاس: وه ڕاسى ئى ئهلبوومه ئهزموون( تهجروبه)یگ نووه له ژیان هونهرییم، ئهویش وه هاوكارى وهل شاعر پایهبهرز شار گێڵان غهرب كوردستان خوهرههڵات سهعید عهبادهتیان ك شعریگ وهناونیشان (كرماشان دیرم) نویسایه و منیش كردمهسهى مهقام و گورانى سهرهكى ئهلبوومهگهى ساڵ 2011 و بویه ناونیشانى.
* شهفهق: باوهت شعرهگهى (كرماشان دیرم) چهس؟
*ههیاس: ئى شعره وه شیوهزووان كوردى كهڵهوڕیه و باس لهو شارهیل كوردیه كهید ك ههڵكهفتنهسه كوردستان ڕووژههڵات له لایهنهیل كهلهپوورى و ڕووشنهویرى و جوانى سروشت و میوان نهوازى و خوهشڕهفتارى و ئازایى مهردهگهیان".
* شهفهق: ئهلبووم ساڵ 2011 چهن گورانى هاتى؟
*ههیاس: ئهلبووم (كرماشان دیرم) پیكهاتیه له 8 تراك ك 5 گورانى و 3 مهقامه و گشتى وهشیوهزووان كوردى كهڵهوڕیه؛ وهلى لهوهر ڕویداى چهوهڕى نهكریاییگ ناچار بویمن پیشوهخته بخهیمنهى بازاڕ .
* شهفهق:ئایا تویهنید وه كورتى پوختهى ئهو ڕویدایه ئهرامان باس بكهید؟
*ههیاس: كوڵ و كوڵبڕ ، له شوون ئهوهگ تراكهگان ئى ئهلبوومه وهشیوهیگ سهرهتایى تۆماركردیمن و گشتى خستویمنه ناو (فلاش میمۆرى)یگ تا دویاخر دوباره بژنهفیمنهى و ئهگهر ههر كهم و كوڕییگ لهتى بوود خاسى بكهیمن... ئهوه بوى ك ئى فلاش میمۆریه له ناو سهیارهگهى مۆسیقاژهن (ئیمان ئهحمهدى) بوى و دزیگ هاتوید سهیارهگهى دزوید و له شوون ههوڵ و تهقهلایگ فره سهیارهگه وه ساق و سهلیمى دوینریاوه وهلى تاكه چشتیگ ك لهتى نهمهنوید ئهو فلاش میمۆریه بوى ك ئهلبوومهگه لهتى بوى، ئیمهیش له ترس ئهوهگ وهبى مووڵهت خوهمان بخریهیده بازاڕ، یا بكهفیده دهس كهسیگ تر، و وهك ئهوهگ وهل یهكیگ له گورانیهیل كۆنم وهپى باید ك كابرایگ هاتوید دوباره تۆمارى كردوید و كلیپیگ ئهراى كردوید، هاتیمن زوى زوى خستیمنهى بازاڕ، و خوهشبهختانه ئهوقهره كهم كوڕى لهتى نهوى ك كاریگهرى داشتوود لهبان كارهگهمان وهگشتى.
* شهفهق: ئایا هویچ گۆڕانكارییگ له ستایل گورانیچڕین حهسهن ههیاس لهى ئهلبوومه وهدى كریهید؟
*ههیاس: من ههر لهسهرهتاى ژیان هونهریمهوه ستایلیگ تایبهت وهخوهم ههڵوژانمه و نیهتوام لهلى بیهمه لا و ئهویش ریتم سلۆ وه كار تیهرم له گورانیهگانم وهل جووریگ له سووزدارى لهئاوازهگانیان ك زیاتر مهردم خوهمان دووسى دیرن و وهلیا كهفنه جووش و خرووش... وهلى وهل ئهوهیشهوه من ههمیشه یا گورانییگ یا دووان ههڵپهڕكه و ڕیتم خێرا خهمه ناو ئهلبوومهگانم و لهى ئهلبوومیشه یهك گورانى ههڵپهڕكه هاتى ئهراخاتر بڕیگ لهو خوهشهویسهیله ك گورانى ههڵپهركه دووس دیرن و وهى جووره ههوڵدهیمن ئهرا ڕازى كردن زهوقهیل جیاجیاى ههوادارهیل دهنگ حهسهن ههیاس؛ چوینكه ئهوهڵ و ئاخر ئامانجمان خزمهتكردن مهردم خوهمانه.
* شهفهق: وهڕاى تو چ قوناغیگ فره سهخته له ئهنجامداین كاریگ هونهرى جوور گورانى چڕین؟
*ههیاس : وهڕاسى ئهوهگ لهلاى من فره سهخته قوناغ ئاوازداناینه، چوینكه ئهرا خوهشبهختى شاعرمان فرهس و گورانیچڕ دهنگخوشمانیش فرهس، وهلى وه نسبهت خوهم ئاوازداناین سهختترین بازنهى بهرههمهاوردن گورانیه.
* شهفهق: لهى وهخته خهریك چهید له لایهن هونهریهوه؟
*ههیاس: لهى وهخت سهرقاڵ ئامادهكارییم ئهرا ئهلبووم ساڵ 2012 ولهى باوهته چهن شعریگ نوو هاوهدهسمهوه خهریك داناین ئاوازم ئهرایان.
ئهوه مهنیه بویشیم ك هونهرمهند حهسهن ههیاس له ساڵ 1965 له شار خانهقین پهیا بویه و ههرله مناڵیهو ههوادار گورانى چڕین بویه و له ساڵ 1990 یهكم بهرههم هونهرى خوهى تۆماركردیه ك كاسێتیگ بوى ولهتى گورانى(چهبى دى، چهكردید) ناوباگى خاسیگ پهیاكرد و له شوون ئهوه و ئهرا پهیاكردن لوقمهى ژیان ڕوى كرده شار بهغدا و لهورا وهل گرووپیگ جایڵ خوین گهرم تیپیگ هونهرى كوردى وهناو (تیپ شیرین) دامهزران و بهشدارى گهورایگ كرد له دوباره زینیهوكردن داب و نهریت كوردهوارى له ناو كوومهڵگاى كوردى له شار بهغدا له شوون ئهوهگ ڕووشنهویرى و داب ونهریت عهرهبى زاڵ بویه بان ژیانیان، و ئنجا چهن بهرههمیگتر وه ئهنجام ڕهسان و یهكیگ له كارهیل ههره گرنگى مهقامیگ بوى له ژیرناونیشان (ههى خانهقینم) ك بویه زووان حاڵ ئهو مهردم خانهقینیه ك وه زوور له شارهگهیان دهركریان و لهتى باس له تاسهى دیدار شارهگهو ناوچهیل ئاوایینشین دهوروبهرى كردیاد.. له شوون ڕمیان ڕژیم وهرین دوباره چویهو ئهرا شار خانهقین و وهردهوامى دا وه كاروان هونهرى خوهى.
دیدار: ماجد سورهمیرى
| < پێشتر |
|---|
