شهفهق/ ماجد سوێرهمهیرى
لهو كهسهیله ك لهبان كهشتیهیل توركى كاروان ئاشتى ك وهرهو غهزه چوین ئهرا شكانن گهمارۆ یا حسار له بان مهردم غهزه له فلستین كورد بوین.
له میانهى ئى دیداره بیشكچى ئهوهیشه خسته ڕوى ك ڕاى گشتى جههانى گهڕنى بازه و دودڵ و دو ڕویه، چوینكه له لایگهو فره ههستیار یا حهساسه له باوهت كێشهى فلستینیهیل، لهوهختیگ كێشهى كورد وه تهواوهتى پشتگووش خهید و خاسیش زانى ك داواكاریهیل كورد ڕهوان و ئازادى مللهتهگهیان توان له چوارچیوهى ئهو دهوڵهتهیله ك خاكهگهى بهشهوكردنه، وهلى وهنسبهت فلستینیهیل، یانه پهرلهمان و حكوومهت و پهرچهم خوهیان دیرن و یهیشه مهعناى ئهوهسه ك كاروبار خوهیان بهنه ڕییهو، وئامانج كووتاییانیش لهناوبردن دهوڵهت ئسرائیله.
لهباوهت سیاسهت توركیا و چه تواید بكهید بیشكچى ئویشى: توركیا تواید بووده هێزیگ ههرێمى كارا، وهلى نیهتویهنى ئى كاره بكهید ئهگهر چهن ههنگامیگ دیموكراتى وهرهو كوردهیل ههڵنهگرى تا بڕهسیده ئاشتى و چارهسهركردن عادڵانهى كیشه ڕهواگهى.
له باوهت ههڵوێست مسڵمانهیل توركیا وهل ههردوگ كیشهى كورد و فلستینى و ئهو جیاوازیه له ناوبهین ههردوگ ههڵویست بیشكچى وت: ئهیه پهیوهندى وه سیاسهت دهوڵهت توركیاوه دیرى ك ههوڵ دهید ئهرا لاوازكردن كوردهیل وه هێزداركردن هویرهیل دینى له ناوهندهیل كوردى، وهى جووره كوردهیل نهیار ههمیشه هانه ژیر ههڕهشه و نیگهرانى وهلى هیزهیل دینى ئسلامى ههمیشه كوومهك و پشتگیرى دهوڵهت وهرگرن و مهلایهیل كوردیش ئویشن ئیمه پهیوهندى وه كوردایهتى نهیریمن، ئهیهیشه دهوڵهت توایدهى و له ههمان وهخت دهوڵهت لهلیان تواید پشتگیرى له كیشهیل مسڵمانهیل عهرهب بكهن.
له باوهت ڕیكخریاى ماف و ئازادى و كوومهكهیل ئنسانى (IHH) ك وه بى لایهن خوهى دهیده قهڵهم و ئهو كهشتیهیله كوومهك كردنه ئهرا غهزه كلكرد ك تویش ئهو پهلامار ئسرائیلیه هات و دهیان كهس لهتى كوشیان و زهخمدار بوین، بیشكچى وت: ئى ڕیكخریایه له لایهن پارت داد و پهرهپیدان یا عهدالهت و تهنمیهوه پشتگیرى لهلى كریایه، وهلى پهرلهمانتهرهیل ئى پارته ههوڵ نهیان ئهرا قورتاركردن ئى كهشتیه له ڕخ كاردانهوه یا رهد فعل ئسرائیلى قهوهتدارتریگ ، لهوهیشه زیاتر ئویشن ك زیاتر له نیمهى سهرنشینهیل كهشتیهگه ك له دهریاى مهڕمهڕه سوارى بوین له نهوهیل سهلاحهدین ئهیوبیین، وه ڕاسییش 7 كهس له 9 كهس لهو كوشیایهیله كورد بوین، ههر لهوهر ئهوهیشه بوى ك مهردم فرهیگ ڕشیانه ناو جادهیل شارهیل دیار بهكر و ئهستهمول و شارهیلیگ تر دویاى ئهوهگ خهوهر پهلامارهگه ڕهسیه پیان.
| < پێشتر | دواتر > |
|---|
