شهفهق/ ریاز هانى بههار
فیشترهو كردگه، دى نوڕید مهردم دهسڵات ئى كیشمهكیشهیله نهیرن ك لهوهر خاتر پویل و تهخت و دهسڵات لهلایهن وهرپرسهیلهو ئهنجام دریهێد، ههر ئهوهیش لهیوا كردگه رووژ وهڕووژ نیگهرانى زیاتر پهیا بوود وهرهو تهقینهوهو زووان سهرد لهگفتوگوو نهك رهسینهوهو زووان گفتوگوو گهرم، ك مهترسى له مهسهلهى چینایهتى و مهزهوى و ترس ئهیاكه لهواكهى تر لههس هووڵاتى پهیا كردگه، ك لهجیاى ئهوهك وه دڵ و گیان گوزران هاوبهش دروس بكریهى، نووڕید مهترسى قهبولنهكردن یهكترى هاتهسه وجوود.
بیجگه ئهوهیش مهترسى دهخاڵهتكردن دهس دهرهكى له كاروبار عراق ك ستهمه سهقامگیرى لهساى ئى جووره وهزعیگ وهتایبهت ئهو تهقینهوهیل ئهمنیه لهشوونهیل جیاجیا و متمانهى مهردم لهبان ژیان و گوزرانیان و ڕخهوبردن هاووڵاتیهیل وه پیشبینیهیل رهسانن یا ئعلامى و سیاسى گهرم، ك لهوهر ئى هووكارهیلهسه هاووڵاتیهیل مهترسى پهیا كردنه لهئاكام ئهو ناكووكى و بهشبهشبوین و كیشهیل سیاسیه ك بویهسه مایهى وهردهوامبوین قهیران و كاریگهرى دروس كردگه لهبان رزق و حاڵ و سهقامگیرى و گومان ئهوه لهلایان دروس بوود سهرلهنوو خوهیان ئامادهى ڕهوكردن ناوخوهیى بكهن و دویریش نیه كووچكردن وهرفراوان ئهرا دهیش وڵاتیش لهلى بكهفێدهو لهوهر خاتر ئهوهك بتویهنن دریژه بیهنه ژیان خوهیان و دویر بوون لهههواڵ گورج تهقینهوهو كوشت و كوشتار و ئهو كردهوهیله پڕ مهترسیداره ك لهژیان رووژانهى عراقیهیل روى دهێد.
مهسهلهى ها لهورا ك جهنگ عراقى – عراقى زیاترهو بوود و ریككهفتن ناونیان وهرتهنگهو بوود، یهیش لهوهختیگ ههڕهشه كریهێده بان سهروهرى عراق وهگشت جووریگ . ههر لهوهر ئهوهیش ئاساییه بهعزیگ له دهوڵهتهیل ئستلال ئى وهزعه بكهن و نهیلین عراق سهقامگیرى وهخوهیهو بوینێد وه گوورهى ئهو كردهوهیله ك شایهت لهههر وهختیگ ئهنجامى بیهن لهوهر خاتر دروسكردن مهسهلهى چینایهتى و مهزهوى، ئنجا لهیرا تویهنیم بویشیم بایهسه لهبان گشت لایهنهیل عراقى ههڵهپهڵه پهنا بوونه وهر یهكهوگرتن و زووان گفتوگوو لهبان ئهو كیشهو ناكوكیهیله ك لهناونیان وجوود دیرێد تا وهو جووره بتویهنن ڕزهیلیان یهكهو بخهن لهكهشیگ سیاسى و لهڕوى رهسانن یا ئعلامى و ئاسایش و سهربازى و ئابوورى و دبلۆماسى لهوهر خاتر روى وهڕوى بوینهوهى ههر پلان و نهخشهیگ ك ئامانجى وجوود عراقى بوود جویر قهوارهو دهوڵهت و مللهت.
لهى هاوكیشه، دووسى و ئاشتى لهناونى عراقیهیل چ ئمڕوو چ سوو، یهكیگه له خاڵهیل ستراتیجى عراقى لهوهر خاتر مقهیهتیكردن عراق لهجهنگ و كیشمهكیش، چوینكه ئهگهر كارهگه وهچهواشه بوود، ئهوه بیگومان دهروازهیگه ئهرا رویدان جهنگ و مهسهلهى تایفى و مهزهوى و ئاشتى لهتى مهحاڵه.
| < پێشتر | دواتر > |
|---|
