شهفهق/ مهسهلهى خاڵكوتان یهكیگه له نهریتهیل كویهن جوانكارى ك تاریخ دویرو دریژیگ دیریگ لهژیان
ئادهمیزاد، وهتایبهت ئهرا ژن و دویهتهیل جویر تهڵاو مجهوههرات گرانقیمهت بویه لهوهختیگ وهو خاڵه دڵ خوهیان وهپى خوهش كردنهو خوهیان وهپى ڕازاننهسهو، ئیمهیش جویر مللهت كورد لهكوردهوارى خوهمان خاڵكوتانن لهڕوخسارو لهش وهتایبهت لهبان گووناو دهموچهو دیاره دهور فرهیگ داشتگه لهجوانكارى، ههر لهوهر ئهوهیش ئى خاڵه وه نیشانهى مهیلكیشان و جوانیكردن سیماو ڕوخسار زانستیانهى.
ئیمه لهیرا نیهتوینیم مهسهلهى خاڵكوتانن وه دیاردهیگ دابنهیم، چوینكه لهبنهڕهتهو نهریتیگهو لهناو مللهتهیل تریش ئى كاره ههر وجوود داشتگهو دیریگ ، ئنجا لهناو ژنهیل كورد و تهنانهت لهلاى كوڕهیل جایهڵ جوانیش تائیسهیش ههر وجوود دیریگ وهتایبهت لهناو مهردم ئاواینشین ك هیمان ههر مقهیهتى لهو نهریته كریهیگ ، وهلى كوڕهیل زیاتر لهبان باڵ و دهسهیلیان ئهو خاڵه كوتن، ئنجا دوینید فرهجار خاڵهگه وهشیوهى نویسانن لهلاى كوڕهیل كریهیگه دى جویر نویسانن" ناو دووس و دهزویران، خوهشهویس، ناو دایگ ، ناو برا....هتد). یا دوینیم بڕیگ لهجایهڵ جوانهیلمان زیاتر وشهى"ئاخ" وهكار هاوردنهو كوتانهسهى لهشیان، ك یهیش جویر وهفادارى و گوزارش وهردهوامیگهو ههمیشه كهس وهرانوهر وهو خاڵهیله تیهرنه یاد.
وهههر حاڵ ئى دیارده لهناو مهردم كوومهڵگاى كوردهوارى لهخیزانیگ ئهرا خیزانیگ تر جیاوازه، چوینكه خیزان لهیوا ههس رازى نین كوڕ و دویهتهیلیان لهو خاڵهیله بكوتن و جویر عهیبهگهى زاننهى، وهتایبهت لاوردن ئهو خاڵه لهئاینده فره ستهمه، چوینكه سهرهتا وه دهرزى كوتیهیگ و زهحمهته دویاخر لاوریهیگ ، ك ههرچهنى تاڕادهیگ وه زاخ و دهرمانهیل تر كاڵهو كریهیگ ، وهلى شوونهوارى ههر مینیگ و پزیشكهیلیش وه دیارهدهى مهترسیداریگ ئشارهت وهپى كهن. وهلى ئیسه لهدنیاى پیشكهفتگ و ئاڵشتكارى و تازهگهرى جووریگ تر لهنویسانن پهیا بویهو شوون خاڵ گرتهسهو، وهتایبهت لهوڵاتهیل كهنداو یا خهلیج ولهوڵاتهیل عهرهبى، ك ئهویش وهپى ئویشن"تاتۆ" و لهڕى بازرگانهیلهو هاوریاسه ئهو وڵاتهیلهو نرخهگهیشى نزیكهى پهنجا دۆلاره، ك تاڕادهیگ ئهرزانهو زوورم ژنهیل تویهنن بسیننهى و بارنهى كار، ئنجا وهگوورهى زانیارى، ئى جووره نهخش و نویساننه ئاو تهڵا تیكهڵى كریاگهو یهیش زیاتر هیلیگ ژنهیل مهیل ئهڕاى داشتوون و تا ماوهى ههفتهیگ نیهكوشیهیگهو، ئنجا لهگشت یادو بوونهیلیگ تیهریهیگه كار.
ریگهیگ تر ههس ئهرا خاڵكوتان ك ئهویش وهپى ئویشن" خاڵ لیزهرى"، یهیش جووریگه ئهرا خاڵكوتان لهقهى لهش و لهگشت شوونیگ لهجههان پهره سهندگهو بویهسه باو. وهل ئهوهیشا دوینیم وهرزشكارهیل و پاڵهوانهیل جههان و مشتبازهیل لهش خوهیان وهپى نهخشهكیش كهن و شانازى وهپیهو كهن. وهى جووره نهریت خاڵكوتان رهسیه "تاتۆ"ى عهیار 24و جووریگ تر لهجوانكارى سهردهم هاورده وجوود.
جهماڵ ئهركهوازى
| < پێشتر | دواتر > |
|---|
