شهفهق/ شایهت فرهیگ له ئیمه ناو زریاب هونهرمهند و شاعر نهژنهفتویم و زانیارى لهباوهت ئى كهسایهتى
بههرهداره نهزانیم، وهلى زریاب قهدرو حورمهت و ناودارى فرهیگ دیریگ لهلاى ئههل هونهر و هونهر دووسهیل، ههر لهوهر ئهوهیش دوینید ئى ناوه لهشوونهیل فرهیگ لهوڵاتهیل عهرهبى كریاسه دروشم و ناونیشان نویسینگهى مۆسیقایى و مووزهخانهو گرووپهیل هونهر مۆسیقاو پارك و تهنانهت بویهسه ناونیشان ماڵپهڕ ئهلكترۆنى و مهردمان فرهیگ شانازى وه بههرهو هونهرگهى كهن.
سهرهتا با بزانیم زریاب كییه؟ ئى كهسایهتى هونهرى و مۆسیقاژهن و دهنگ خوهشه، ناو تهواوى" ئهوبولحهسهن عهلى كوڕ نافع فهیلى"ه.
زریاب لهشار بهغداى سهردهم هاروون ژیاگهو لهژیر دهس مۆسیقاژهن ناودار ئسحاق موصلى دهرس مۆسیقا خوهندگهو هووكارهى ئالهى عود بویه، ئالهت عود لهبنهڕهتهو چوار تهل یا وهتهر داشتگه، وهلى لهبان دهس زریاب كریاسه پهنج تهل.
بیجگه ئهوهیش شیوازیگ تر تازه لههونهر شعرى داناگهو پهیوهسهى كردهسه گورانیهو جویر قسهیلیگ ریكخریاگ لهبان كیشه یا وهزن تایبهت. تویهنیم بویشیم زریاب یهكهمین كهسیگ بویه له جیگیركردن شیوهى وتن سروود گورانى.
نویسهر ناودار مهدى كاكهیى، زیاتر تهئكید لهبان ئى كهسایهتیه كردگهو چیهسه بندروس بنهڕهت و كارهیلى و ئویشیگ : زریاب فهیلى یهكهمین كهسیگ بویه ك تیكهڵ گورانى و سروود كردگه لهبان مۆسیقاو ههر ئهویش بنهڕهت یایگرتن گورانى داناگه ئهرا تازهكارهیل هونهر گورانى. وهل ئهوهیشا زریاب دهف زهنجیرهدار و تیمهیل مۆسیقایش جویر مۆسیقاژهن و سروود خوهنهیل داناگهو ههر خوهیشى یهكهمین كهسیگ بویه ك شانۆ یا مهسرهح بویچگ جویر شوون دانیشتن تیم یا فرقهیل مۆسیقا دروسكردگه. ماناى ئهوهسه زریاب فهیلى دهس باڵایگ داشتگه لههونهر مۆسیقاو جویر دانهر یا موبدع و دروسكهر ئالهتهیل مۆسیقییش تیهریهیگه هساو. وهلى دیاره بهدبهختى و ئاوارهیى كورد فهیلى تاریخ كویهنیگ داشتگهو لهى وڵات پڕ دوچهوهكى و جیاكاریه بهش زریابیش لهغوربهت و دهروهدهرى تاریخیگ تیهڵیگ داشتگه، چوینكه دویرى و ئاوارهیى لهوڵات شوونهواریگ پڕ له خهم خفهت خهیگه دهروین ئادهمیزادو ههمیشه هیلیگهى هس وهنارهحهتى و ناخوهشى بكا.
ئاوارهبوین زریاب هونهرمهندو دویرهوكهفتنى لهوڵات خوهى ههڵبهته هووكاریگ داشتگهو دیاره وهشیوهیگ تر تهعریب و تههجیر كریاگهو لهزێد و ماواى خوهى دویرهو خریاگه!!
سهرچهوهیل فرهیگ كووكن لهبان ئهوهك زریاب، ههم هونهر و بههرهى مۆسیقاگهى و ههم دهنگه خوهشهگهى بویهسه بایس ئهوهك قهدهرى لهیوا ههڵكهفیگ ولهوڵات دهربكریهیگ و گووشهنشین غوربهت بوینیگه چهو. ههر لهوهر ئهوهیش رووژیگ لهرووژان هاروون داوا لهئسحاق موسڵى ئهكا گورانیچڕ تازهى دهنگخوهش و هونهر تازهیگ وهپى ئاشنا بكا، ئسحاقیش زریاب فهیلى وهل خوهیا بهیگ و چنه لاى هاروون، ئنجا هاروون وهختى دهنگ خوهش و زوڵاڵ زریاب ژنهفیگ له خوهشییا ئویشیگه ئسحاق حورمهتى بگریگ و مقهیهتى بوود، وهلى ئسحاق یهكسهر حهسویدى وه زریاب بهیگ و خوسهو كینهت لهلى گریگه دڵ، ههر لهوهر ئهوهیش ههڕهشه لهلى ئهكا یا ئهوهسه لهبهغدا دهربچید یا كوشمهد.
زریاب لهئاكام ئهو ههڕهشه بهغدا هیلیگه جى و سهر خوهى ئهڵگریگ وهرهو ئهندلوس وڵات عهبدولڕهحمن دویهم، خهلیفهى ئهو وڵاتیشه وهگشت قهدر و حورمهتیگ پیشوازى گهرمیگ لهلى كهن و بووده یهكیگ له كهسهیل نزیك له خهلیفهى ئهندهلوس و ههر لهوهر ئهوهیش وه" زریاب قورتبى" ناسریا.
جى داخه ك ئى جووره بههرهدار و هونهرمهندیگ كهم وینه بكهفیگه وهر ههڕهشهى كوشتن و لهناوبردن بیلید جویر زاناو شارهزایهیل تر كورد فهیلى و لهوانهیش زاناى ناودار محهمهد سهیوانى ك زانایگ شوونهوارناس كورد فهیلى و زایندهى شار بهغدا بوى ك دراسهت فراوانیگ لهبان شوونهوارهیل سۆمهر و ئهكهد و ئوور و لهكش و ئاشوور و بابل و وهركاو حهزهر كردو شارهزایى لهزووان بسمارى سۆمهرى و زووانهیل تر داشت، وهلى ئهوه بوى رژیم دكتاتۆر بهعس لهجیاى ئهوهك ریز و حورمهت لهلى بنهیگ و پلهو پایهى خاسیگ وهپى بهیگ ، وهنك ناهمى و ههناسهى سهرد لهماڵ خوهى دهریكرد و ئاوارهى غوربهتى كرد و دویر لهباوان و زێد و ماواى وه ڕهنج بیوهر و فهقیرى روحى سپارده خاك.
زریاب هونهرمهندیش لهجیاى ئهوهك باڵهخانهو شوون تایبهتیگ ئهرا هونهرهگهى دروس بكریهیگ و فهرههنگ و ئهدهبه هونهریهگهى لهتى نهف لهلى وهربگیریهیگ ، چارهنویسى كهفته وهر حهسویدى گهناكهرهیل و ناچارى لهیوا لهلى كرد ڕوى بكهیگه وڵاتهیل تر و كلتوور و فهرههنگ و هونهره جوانهگهى له وڵاتهیل تر شوونهوار داشتوود ئهرا نهوهیل ئایندهو هوونهر دووسهیل.
بڕیگ سهرچهوه ئشارهت وه ئهوه كردنه زریاب لهساڵ 777زایینى لهشار بهغدا هاتهسه دونیاو لهساڵ 852زایینى له "قورتبه" ماڵئاوایى یهكجارى لهدونیاى هونهر كردگه. وهلى جویر ئهوهك سهرهتا ئشارهت وهپى كردیم ئالهت عود تائیسهیش شوونهوار دهس ئهو بویهو مهقامهیل فرهیگیش ك وهرجه ئهو نهزانریاگه تیكهڵ مۆسیقاى كردگهو شیواز ئیقاعیش ههر لهبان دهس ئهو بویه لهڕوى گونجانن شعرو مۆسیقا. ك لهتاو ههڕهشهو كوشتن هونهر و بههرهگهى جیواز كرد ئهرا كوومهڵگاى ئهندهلوسى و تهنانهت وڵاتهیل خوهرئاوایش لهو هونهر و كلتوور و فهرههنگه نهف وهرگرتن و دى وهى جووره تویهنیم بویشیم كورد فهیلى ئاوارهى "قورتبه"یش كریاگهو له زێد و باوان خوهى دویرهو خریاگه.
ئا: جهمال ئهركهوازی
سهرچهوه:
* مهدى كاكهیى/ ناودارهیل كورد فهیلى
* ویكیپیدیا
| < پێشتر | دواتر > |
|---|
