شهفهق/ هێمن حەسەن
یەکهوگرتگ، وهل ئەوەی ک سەردەمانێگە ئەى مللهتە وهو خاتره تهقالا ئهكا و ئهرا هەریەک لە قوناغەیل ئازادی، رزگاری، دیموکراتی و سەروەخۆیی لافاوێگ خوين داس و روڵەیل ئى مللەته خوهیان کردنهسە قوروانی ئهرا وەدەسهاوردن ئەو ئامانجەيل پیرۆزە.
لە سهختترین وهختە هەسیارەگان، لەژێر فشار خوينمژترین دیکتاتۆر مێژوو، لەسەردەمەيل تيهریک، لەو قوناغەيله ک قاپی پەیوەندیەيلمان وەل جههان دەيشت وهڕويمان بهسياويد، لەسەردەم ئەنفال و کیماواران، کورد جوور نەتەوەیگ ئازادی خواز هەرگیز دەسههڵگر خواست و مافەيل ڕەوای نەويە و لهڕێ ئهو ئامانجه خهبات كردگه. ههرچهنيش فره گرانیش ئهرای تهواو بويد و قوروانی فرهیش ئهرای داويد.
وهلی ئەوەی ك جی سەرنجە ئەوەسە، لەى وهختەيله لە سەردەم جههانگیری، لە دنیای پێشکەفت' تەکنۆلۆجیا، لە سەردەم زهڕین دنیای دیموکراسی کورد دوای سەروەخۆیی خوهی ناکا! سەروەخۆییگ ک هەزاران قوروانی و دەریایگ خوين ئهرای بەخشیە، بەڵکم وە چەواشەوە مهردم بێگانە دڵیان ئهرامان سزيهێ و جاروبار لهيرەو لەوره خهنهو هويرمان ک ئيسه وهختيه ك ئيوەی کورد داوای سەروەخۆیی خوهدان بکەين و ئيمەش پشتیوانى لهليدان کەیمن. نموونەی ئەو مهردمانيشه ڤلادیمیر ژرینوڤسكی جێگر سەرۆک پەڕلەمان ڕوسیا و سەرۆک پارت لیبراڵ ئەو وڵاتە و پرۆفیسۆر ئەمریکی ویلیهم بیكواندت لە زانکۆی ڤێرجینیا و نويسەر ناودار عێراقی حەسەن عەلەوی و چەن کەسایەتیيگ تر ناودار ک وهی دوياخرهيلە فره وهئاشكرايی ئشارە وە سەروەخۆیی کوردستان کردنەو وە وهختيگ گونجياگ زاننهی ئهرا وەدەسهاوردن ئەو هەق ڕەوا ئهرا مللهت کورد.
لە لایگ ترەو هویر تەنگی بڕێگ لە عەرەبە شۆڤێنیەگان تەنانەت بەرزهوکردن ئاڵای کورد لەبان فەرمانگەو خوهندنگەیل هەرێم کوردستان وە تاوان زانن. هەروەو جووره لەو وڵاتهيلە ک کوردستان لهبهينيان بەشهو کرياس تا ئەى وهختيشە ههقهيل سەرەتایى کورد وە وەر چهو ڕای گشتی و دنیاوە خهنه ژير پا و ئامادە نین تەنانەت لە چوارچیوەی ههقهيل ئادهميزاد مامەڵە وهل خواست و داوايهیل کوردا بکەن.
وهيخاترە لەناونى ئەى دوجەمسەرە بايهد ئيمەی کورد خوهمان یەکلایی بکەیمنەو. یا ئەوەگ خوهدوەدەسەوداين لەوەراوەر فکر شۆڤێنیەت و دیکتاتۆریەت قبوڵ بکەیمن، ک ئەيەيش وهل دنیای مۆدێرن ئەمڕوو گونجياگ نیە، یا ئەوەگ بێ سڵهوکردن لە کاردانەوەی نەیارەيلمان خوهمان ئامادە بکەیمن ئهرا جاڕداين سەروەخۆیی لان کەم لە باشوور کوردستان ک ئەيەيش ههقيگ ڕەوای هەر مللهت و نەتەوەیگە.
| < پێشتر | دواتر > |
|---|
