شهفهق/ ئیمهى كورد ئهگهر بتویهنیم هووشمان باریمنه سهر و هویر لهو فهن وفیڵهیله بكهیم ك ئهنجام دریهیگ
وهرانوهر وهههقهیل رهوامان، ئهو وهخته تویهنیم خوهمان لهو كیشهو گرفتهیله قورتار بكهیم ك رووژگاریگه وهدهسیهو ناڵنیم. ئیمه جویر ئهو شێخه وهپیمان هات ك خهوهر قیامهت داو قسهیلى ناتهجى و باوهڕ خوهى وهپى لهدهسدا. سادهیى مللهت كورد هاو لهورا زوى وهقسهو قهوڵ خهڵهتیهیگ و دویاخریش ههرچى پهل كوتیگ دهسى وههویچ نیهڕهسیگ.
تویهنیم بویشیم كورد له مهیدان هونهر و ئهدهب و تا ڕادهیگ زانستیش، گام خاسیگ ناگهو پیشكهفتن وهرچهویگ وهخوهیهو دیه، لهڕوى ئاوهدانى و خزمهتگوزاریى و پهیوهندى دهرهكییش شیوهى نیمچه وهرفراوانیگ دیه، وهلى لهڕوى سیاسهت و پرووسهى سیاسیهو نهڕهسیهسه ئهو ڕاده ك بتویهنیگ خوهى لهناو گرفت كیشهى چهسپیاگ و داگیركهرانه باریگه دهیشت و ههق خوهى وهل خوهیا باریگ.
ئیمه زانیم ك هیمان شوونهوار پیاوهیل رژیم و شۆڤێنیهت دهور دیریگ له دروسكردن كیشمهكیش و ناكووكى لهناونى چین و لایهنهیل، هیمان دهزگایهیل دهوڵهت پڕن له كینهتدار و داخ لهدڵهیل، نزیكهى ههیشت ساڵه كووتایى وه دهسڵات بهعس هاتگهو سهكردهو دارودهسهى ئهو رژیمه خریانه ناو تهلبهن زندان و ڕوى وهڕوى بوینهوهى بڕیار دادگاو سهر مارهگه پانهو بوى، وهلى هیمان دویچگ ئهو ماره پهلهپرتى ئهكاو لهجموجویل نهكهفتگه. یهیش ماناى ئهوه نیه ئیمهى كورد گشت ماوهیگ دیاریكردیاگ ئهرا جیوهجیكردن ههر ماددهو بڕگهیگ وهپیمان تازهوه بكهن و گشت دویاخستنیگ قهبوول بكهیم. راسه مهردم ههرێم كوردستان تاڕادهیگ لهئازادى و بهختهوهرى ژیهن و شیواز ژیانیان لهڕوى ئاسایش و پیشكهفتنهو جیاوازه لهژیان مهردم شار و ناوچهیل تر ناوڕاس و باشوور عراق و لهكهش و ههواى گونجیاگیگ ژیهن ئهرا خوهشگوزرانى، وهلى ئهگهر بایگ و هویریگ له خوهمان بكهیم و دراسهت بار جوگرافى و ناوچهیل داوریاگ وهتایبهت ماددهى 140 دهستوور بكهیم، ئهوه بیگومان ئهو ئازادیه ك ئمڕوو كورد دیریگهى لهههرێم كوردستان عراق نیمهو ناتهواوه!! ئازادى ها لهورا خاك و نیشتماند لهڕوى جوگرافییشهو ئازاد بوود. هیمان كوردستانمان لاشهى بى دڵیگهو لهبان رهحمهت خودا ژیهیگ ، تائیسهیش پاى داگیركهر لهخاكمان نهوڕیاگهو شارو شاروچكهیل فرهیگمان چهوهڕى هاتنهوه كهن ئهرا باوهش نیشتمان، كهركووكمان جویر ئهوهك بارزانى نهمر ناوى نا(دڵ كوردستان)چارهنویسى نادیارهو خانهقى و مهنهلى و مهخموور و شهنگاڵ.....هتد، چهوڕى ههوڵ و تهقلاى سهركردهو مهردم كوردن، جى وهجیبوین ماددهى 140 دهستوور ئازادى كوردستانه، دیاریكردن مهرز ئدارى راسكانیمان نیشانهى سهروهخوهییمانه. ئایا دى ههڵگریگ لهیه زیاتر چهوهڕى بكهیم شۆڤێنیهیل بیگانه وازى وه ئهقڵمان بكهن؟ تا كهى سهبر بهیمنه خوهمان و دوشمن لهخاكمان خاوهن سهڵتهنهت بوود؟ تاكهى دهوریش فهلسهفهى خود خهڵهتانن بویمن و خوهمان وه قهوڵ و قسهى بى ئهنجام و بى بنهما بخهڵهتنیم؟ لهیوا بزانم ئیمهى كورد فره لهههق خوهمان فره داوهزیمنهو مهسهلهى جیوهجیكردن ماددهى(140)یش فره دریژه كیشاو تائیسهیش نهڕهسیمنهسه هویچ ئهنجام دڵخوهشكهریگ .
دبلۆماسیهت كورد لهمهیدانهیل فرهیگهو گام خاسیگ ناگه، یهیش جى دهسخوهشیه، وهلى دڵنهرمى و سووزدارى وهل داگیركهر و ناههقیلا دهرفهتداینه ئهرا وازیكردن وه چارهنویس و ههقهیل رهواى مللهتهگهمان.
جهماڵ ئهركهوازى
| < پێشتر | دواتر > |
|---|
