شهفهق/ شهرهفهدین جهبارى
چوارم ڕاپۆرت (گشتلاگر)یگ وه 54 لاپهڕه دهركرد ك وردهكاریهیل فرهیگ لهباوهت كار لیژنهگه و ئهركهیلى و ئهو تهگهرهیله لهتى بوى، ك ڕى له كاركردنى گردنه.
چهوهڕى ئهوهیشه كریا، یا بایهت بوى، ك گشت لایهنهیل پهیوهندیدار وه دهستوور و پیشكهفتن ئۆپهراسیۆن سیاسى له عیراق، وه شیوهیگ جددى تهماشاى ئهو خاڵهیله بكردیان، ك له ڕاپۆرتهگه هاتنه، و وه شیوهیگ جددى و وهرپرسیارانه وهلیهو مامهڵهت بكردیان، ههریهك وهگوورهى توانا و دهسڵاتهیل و ئهركهیل خوهیان ئهرا چارهسهركردن گیروگرفت و كیشهیل و حهساوكتاوكردن وهل لایهنهیل كهمتهرخهم و ئهو كهسهیله ك بوینهسه هووكار پهكخستن دهستوور و پشتگووشخستن مافهیل ڕهواى خاوهن مافهیل.
وهلى ئهوه دوینیمن، ك تا ئیسه هویچ ههڵوێست یا قسهیگ ڕهسمى له لایهنهیل پهیوهندیدارهو دهرنهچویه، وهتایبهتى له دهستهیل و دهزگایهیل حكوومهت عیراق، ك بهش فرهى ئهركهگه ها گهردنیان، وهگوورهى ئهوهگ له ڕاپۆرتهگه هاتیه، وهلى نق له هویچ لایهنیگهو نههاتیه و یهیشه مایهى پرسیار و گومان داشتنه.
ئهو پرسیار جهوههرى و سهرهكیه ك لهیرا خوهى نیشان دهید، ئهوهسه ك ئایا ڕاپۆرت چوارم، وهك ئهو ڕاپۆرتهیل وهرین، ههر لهیوا ڕهد بوود، و كهس جوواوى نیهید؟، یا كهس تهكلیف خوهى نیهكهید ئى خاڵهیله بیهیده یهكا ك بڕیگیان بڕگهیل جورئهتدار و پیشهیى بوین و بارووهزعهگه گشتى ڕووشنهوكرد و ههرلایهنیگ خسته وهردهم وهرپرسیارى نیشتمانى خوهى؟ ئایا ئى مادده ك مادهیگه نهخشهى ڕیگهیگ مهعقوول هاتى ئهرا چارهسهركردن كێشهیگ ك وهخت و ههوڵ و ئهرك و ئارهق و خوین فره له ڕووڵهیل ئى نیشتمانه بردیه، ههر وه ئهسیرى قسهى سهرزووان و وتارهیل و كیشمهكیشهیل لایهنهیل سیاسى مینید؟
نیهتوام لهى وتار كوڵه زیاتر باسهگه دریژهو بكهم و باس ماددهى 140 بكهم ك ماددهیگ عیراقیه له لایهن جیوهجیكردنهو، و ههنگامهیلیشى ڕهسیهسه دویرترین ئاواییهیل له قویلایى زهلكاوهیل (اهوار)، و ئیمهى نیشتهجاى ناوچهیل داوڕیاى گشتى له سینه حوفز كردیمنه، و لهیرا له گشت كاروهدهسهیل له گشت پلهیلیان و ئهوانهگ خهم دهستوور ها دڵیان و مینهى جیوهجیكردن ههق كهن، داواكهم ئى ڕاپۆرته وه وردى بخوهننهو و ههڵوێستیگ نیشان بیهن ك ههڵوێستیگ وهرپرسیارانه بوود و وهرهو چارهسهر ڕیشهیى و جوواو داین ئهوهگ لهتى هاتیه بچوود ك كوومهڵهیگ ڕاسى و پیشنیار و داواكاریه ئهرا ڕزگاركردن ماددهیگ له دهستوور ك پهناگهى قانوونى و ئاشتیانهیگه ئهرا فره له عیراقیهیل وه گشت ڕهنگهیلیانهو.
| < پێشتر | دواتر > |
|---|
