شهفهق/ حسێن برا بویچگ
دژایهتیكردن پهروهردهو فهرههنگ و رووشنهویریه لهلاى بهعزه خیزانهیلیگ ك بوینهسه مایهى ههڕاجكردن گشت ههقهیل ماریفهت و پهروهردهیى لهوهر خاتر دهسكهفت دارایى و گردهوكردن ماڵ دونیا.
یهكیگ لهو مهسهلهیل گرنگ یا موهمه ك بایهسه باسى بكهیم، ئهویش مهسهلهى خوهندن و خوهنهواریه، ك وهداخهوه ئمڕوو مهردمان فرهیگ بوینهسه وهربهس لهوهردهم چگن مناڵهیلیان ئهرا خوهندنگا، یهیش لهوهختیگ ك لهى سهردهم پیشكهفتنه گشت تاكیگ ههوهجه وه ئهوه دیریگ ڕى راسهقینهو ڕووشن ئایندهى خوهى بوینیگهوهو نهكهفیگه گووشهى تیهریكى. ههرچهنى ئى سهردهمه ئهرا مهردمان تر یا وڵاتهیل تر گرنگى یا ئههمیهت تایبهت خوهى دیریگ و خوهنهوارى بنهڕهت گشت كار و كردهوهیگه، وهلى لهیوا دیاره لهى وڵات ئیمه پشت لهو نعمهت گهورا كریهیگ ك گشت ئاڵشتكارییگ لهبانى تیهیگه وجوود، چوینكه خوهنهوارى سهرچهوهى ماریفهت و زانست و رووشنهویریه.
فرهكهس لهیوا هویرهو كهن گوایا ساڵیگ یا دوساڵ خوهندن بهسه ئهرا ئهوهك ئادهمیزاد خوهى لهچنگ كیشهو سهختییگ قورتار بكا، یا بتویهنیك ناونیشان عیادهى دكتۆریگ یا ناونیشان ڕى و بانیگ وهپى بزانیگ ، لهڕاسى ئهیه دیاردهى ترسناك و كوشندهیگهو نهبایهد لهلى غافڵ بویمن.
لهى ڕویهوه یهكهمجار خیزان وهتایبهت دایگ وباوگ یهكهمین وهرپرسن لهوهردهم ئى دیاردهى ترسناكهو بایهسه گشت ههوڵ و تهقلایگ بارنه كار و رینیشاندهر و هاندهر مناڵهیلیان بوون تا بچنه وهر خوهندن و دویاڕووژ رووشنیگ داشتوون و لهناو گیژاو نهخوهنهوارى و نهفامى گیر نهكهن، وهل ئهوهیشا چین رووشنهویر و میدیاو ڕووژنامهیلیش ئشارهت وه زهروورهت ئى مهیدانه بكهن لهوهر خاتر بهرژهوهندى وڵات و كومهڵگاو خود ئهو مناڵهیله تا نهكهفنه دام بهدبهختیهوه.
لهى باوهتهوه ههوهجه وه ئهوه دیریم بچیمنه ناو فهزایگ ئهقڵانیهت و دویر له كیشمهكیش مهسهلهى نهخوهنهوارى، تا تویشمان نهوگه تویش مهردمانیگ نهفام و دویاكهفتگ و دویاخریش وه زهرهد وڵات و كومهڵگا تهواو بووگ. ئهڵڵاجهوى ها لهورا ك خودا چهو ئهدا بهنه كوورى ئهكا، كهسهیلیگ ههن لهیوا هویرهو كهن ك سهروهت و دارایى لهدونیا گشت چشتیگه ئهرا ئادهمیزاد، نهخهیر ئهیه فكرهى غهڵهتیگه، چوینكه گشت چشتیگ وه پویل سینیهیگ تهنیا زانست و ماریفهت نهوگ ك لهجههان وهرفراوان خوندنهوه سهرچهوه گریگ .
ئیسه لهى چهرخ تازه گهوراترین ئهرك و خهبات خیزانهیل ئهوهسه ڕیگر نهون لهوهردهم خوهندن مناڵهیلیان و شهم رووشنایى لهڕوییان نهكوشننهوه، چوینكه جویر ئهوهك ئشارهت وهپى كردیم مهردمانیگ ههن پویلپهرس و مناڵهیلیان كردنهسه قوربان فكرهى نادروس خوهیان و لهزانست و رووشنهویرى دویریانهو خستنهو تهنیا گوچانهگه نیه دهسیانهوهو ئهو توانا دیرن وهپاى خوهیان ڕى بكهن، وهنا وه ڕووژ رووشنایگ كوورن و پهى وه شمارهیگیش نیهوهن بخوهننهوهى. ئیسه لهناو هووزهیلیگ شمارهى نهخوهنهوارى رهسیهسه نزیكهى 60% و لهچوار مناڵ یهكیگیان خهریك خوهندنهو شایهت له ئایندهیش ڕوى له زیایى بكا، وهتایبهت دویهتهیلیانیش 90% نهخوهنهوار و ناڕووشنهویرن و هیمان ههر لهبان داب ونهریت كویهن دویاكهفتگ وهلیانا مامڵه كریهیگ و خوندندگا لهوهرچهویان كریاسه زندانیگ راسهقینهو نیهیلن وههویچ جووریگ بچنه قهرهى. ئایا ئهیه ماناى نهفامى و دویاكهفتن نیه؟ لهراسى ئى دیارده كارهسات گهورایگ لهلى كهفتهسهوهو چارهسهریشى تهنیا ئهقڵه.
| < پێشتر | دواتر > |
|---|
