شهفهق/ لهناو ماڵهیل ئهوساى كومهڵگاى كویهن وهتایبهت كومهڵگاى كوردهوارى خوهمان له سهدهیل وهرین،
ههوهجهیگ نرخدار وهناو ههزار پیشه وجوود داشت لهژیان خیزانهیل، ههزار پیشه وهو سهندووقه وتیانهى ك شوون ئهڵگرتن چشتهیل جویر( پویل، تهڵاو مجهوههرات، بهڵگهنامهى ڕهسمى...هتد)بوى، ئهویش وهك گهنجینهیگ مقهیهتیكهر له گومبوین و خراوبوین.
لهباوهت تاریخ سهندووق ههزار پیشه سهرچهوهیگ نیه وه تهواوى بهڵگهى راسى بهیگه دهس، وهلى تویهنیم بویشیم سهرهتاى وجوودى لهعراق ئهرا سهردهم كویهنیگ چوودهو. ئى سهندووقه پیكهاتگه لهشیوهیگ لاكیشهیى و لهخاسترین ساج و دار سهندهل دروس كریا، وهل ئهوهیشا نهقش ونیگار جوانیگیش لهقهى بوى، وهلى وه گوورهى گهوراو بویچگى سهندووقهگه جار لهیوا بوى ئهگهر گهوراتر بویاتاگ كهلپهل و جنگیش لهتى قایم كردیان، ئنجا فرهجار لهوهر فرووشتن له(هندستان)هوه هاوریا ئهرا بهغدا، ك وهپى وتیان(سهندووق هند)و دو دهسگ وهپیهو بوى ئهرا وهخت بهرزهوكردن یا جیوازكردنى لهشوونیگهو ئهرا شوونیگ تر، ههر لهناو ئهو سهندووقیشه شوونیگ بوى ئهرا شاردنهوهى چشت ومشت نهێنى.
ئى سهندووقه نهخش یا دهور فرهیگ داشتگه وه ژیان هاوسهرگیرى مهردمان فرهیگ، ئهویش جویر گهنجینهیگ خاس و قیمهتدار ك ژنهیل شانازى فرهیگ وهپیهو كردیان له ناو ژیان هاوسهرى و جویر دیارى ئهو سهندووق ههزار پیشه ئهڕایان سهنریا، وهو جووره تویهنیم بویشیم نهوهیل فرهیگ مقهیهتى لهلى كردیان و تائیسهیش له بهعزه ماڵهیلیگ ئهو سهندووقه هیمان ههر وجوود دیریگ ، وهتایبهت لهناو ماڵه كوردهیل كوردهوارى و جویر كلتووریگ ڕهسهن مقهیهتى لهلى كریاگه، ئنجا فرهجار ئهو سهندووقه جوور میراتیگ لهناو بنهماڵهو خیزان دهس وهدهس كریا لهوهر ئهوهك نهفهوتیهیگ و مقهیهتى لهلى بكریهیگ .
لهڕاسى سهندووق ههزار پیشه مایهى دڵخوهشى خیزانهیل فرهیگ بوى ك لهلاى بهعزه ژنهیلیگ جویر بانك مهركهزى ئیسه بوى و دڵنیا بوین لهوهك هویچ چشتیگ لهتى نیهفهوتیهیگ ، وهلى سهرپهرش یهكم ههمیشه ژنهیل گهورا ساڵ بوین و ههر لهوهر ئهوهیش كلیل ئهو سهندووقه نهیانه دهس كهسیگ تر و فرهجار كلیلهگهى كردیانه مل یا لهگیرفان زبوونهیلیان شاردیانهوهى نهوهك گوم بوود.
تویهنیم بویشیم سهندووق ههزار پیشه تاریخ دریژیگیش وهل مللهت كوردا دیریگ و ڕهسهنایهتى خوهى ئسپات كرد جویر كلتووریگ كوردهوارى و لهناو خیزانهیل كورد قهدر و حورمهت فرهیگ لهلى نریا و شوون شاردنهوهى چشتهیل نهێنى و ههوهجهدار بوى لهژیان كوردهوارى.
| < پێشتر | دواتر > |
|---|
