شهفهق/ شارهزایهیل سهربازى لهجههان لهبان ئهو خاڵه كووكن ك وجوود ههر بنكه(قاعده)یگ سهربازى ئهمریكا لهجههان ، هووكار
ستراتیجى خوهى دیریگ و ههر لهخوهیهوه لههویچ وڵاتیگ بنكهى سهربازى واز نهكردگه وهبى سهبهب . ئمڕوو لهجههان ، ئهمریكا له(130)وڵات بنكهى سهربازى دیریگ ك شمارهى سهربازهیلى لهدهیشت مهرز وڵاتهگهى ههزارهها سهرباز و شارهزاى كارهیل سهربازیه .
تاریخ دروسبوین ئهو بنكهیل سهربازیه وهشیوهیگ گشتى دابهش كریهیگ لهبان دو قوناغ و سهردهم جیاواز ، ك پیكهاتنه لهقوناغ دویاى رمیان دیوار بهرلین له دهوروهر كووتاییهاتن جهنگ سهرد لهناونى سۆڤێت و ئهمریكا لهساڵ (1989) . لهو وهختهوه ئهمریكا لهوڵاتهیل ئۆرپاى خوهرههڵات و قهیریگ تر لهوڵاتهیل ئاسیا نزیكهى (35) بنكهى سهربازى دامهزران ، ك ئهویش وهگوورهى ریككهفتن وهل ئهو وڵاتهیلا ك بنكهیل سهربازى لهتیان دروسكرد . قوناغ دویم دامهزرانن بنكهیل سهربازى ئهمریكا چووگهوه ئهرا وهخت رویداگهیل تیرۆرستى بان واشنتۆن و نیۆیۆرك له 11 / 9 / 2001 ك ئهویش قوناغ تازهیگ لهشوون خوهى هاورد لهڕوى چوینیهتى و چهنایهتیهوه . وهشیوهى گشتى عومر قهیریگ لهو بنكهیل سهربازیه رهسیگه (50) ساڵ وهتایبهت ئهوانهك له یابان و ئهڵمانیاو كۆریاى باشوورن ، ك ئهرك و كارهیل ههر یهكیگ لهو بنكهیل سهربازیه مینیگه بان وهزع سیاسى ئهو وڵاتهیله .
ئامانج له وازكردن ئهو بنكهیل سهربازیه وهگوورهى لهیهكهوداین و شیهوكردن شارهزایهیل سهربازى ، پیكهاتگه له ئهنجامداین كردهوهى سهربازى و مهشق سهربازى هاوبهش وهل هیزهیل سهربازى ئهو وڵاتهیله ك بنكهى سهربازى ئهمریكا لهتیان وجوود دیریگ و بیجگه ئهوهیش مقهیهتیكردن ئاشتى لهو وڵاتهیله ك كیشهو گرفت دیرن ، ئهیه بیجگه بنبڕكردن تیرۆرسهیل و لهناوبردن گرووپهیل تیرۆرستى و چهسپانن ئارامى و ئاسایش . وهل ئهوهیشا نیهوگ ئهوهیش فهرامووش بكهیم ك ئامانج سهرهكى و فره گرینگ یاموهم له دروسكردن ئهو بنكهیل سهربازى ئهمریكا بیگومان مقهیهتیكردن بهرژهوهندیهیل ئهمریكاس لهگشت جههان .
شمارهى ئهو بنكهیل سهربازیه ئیسه ك لهعراق وجوود دیرن پیكهاتگه له (75) بنكه ، زوورم ئهوانهیش ها لهسهربازگایهیل كویهن و ئهوساى رژیم بهعس . شمارهى سهربازهیل ئهمریكى لهو بنكهیلیشه رهسیگه (140) ههزار سهرباز ، ك بیجگه (5) بنكهى سهرهكى ، ئهو هیزهیله له (70) بنكهى تر گردهو بوینه ، وهلى وهگوورهى ریككهفتنیگ لهناونى واشنتۆن و بهغدا بایهسه ئهو هیزهیله لهكووتایى ساڵ 2011 عراق بیلنه جى ، ئمجا لهشوون دهرچگن ئهو هیزهیلیشه ئهگهر یا ئحتمال ئهوه ههس چهن بنكهیگ ئهمریكا بمینیگهوه . ئهیه بیجگه كوهیت و سعودیهو شوونهیل تر ك بنكهى سهربازى ئهمریكا لهتیان وجوود دیریگ . كوهیت تیم یا فرقهى 3ى هیزهیل ئهمریكا گردهسه خوهى و چهنهها هووكار سهربازى وهك تووپ و تهیارهى هێلیكۆبتهر و زیاتر له (80) تهیارهى سهربازى لهسهربازگهى (الدوحه)ى كوهیت وجوود دیریگ ك هیزهیل ئهمریكا لهشوون جهنگ دویم كهنداو یا خهلیج لهو وڵاته نیشتهجى بوین . سعودیهیش پهنج ههزار سهرباز لهتى وجوود دیریگ ك پیكهاتنه له هیزهیل مارینز و هیز ئاسمانى.
