شهفهق/ له سهردانيگی ئهرا شار كهركوك، هونهرمهند گهورای كورد مهزههر خالقی وت: "هايمنه تهما
میوزیك ناوچهی كهركوك و گهرمیان زینگهو بكهیمن". ئاماژه وهوهيش كرد ك شار كهركوك فره كاڵچهره و لهڕوی هونهرهوه جوور نهفتهگهی دهوڵهمهنه.
هونهرمهند مهزههر خالقی ئاشكرا كرد؛ ماوهی فرهيگ بی سهردان شار كهركوك نهكردويم، دووس داشتم له نزیكهو جاريگتر چهوم بكهفێده پی، وهلی خوهشبهختانه جاری كهركوك هالهبان بنهڕهت خوهی. بايهته له گشت بواريگ كار ئهرای بكهیمن، چوينكه كهركوك زوڵمليكرياگ بويهو سهروهت و سامانهگهی ئهرا مهردمانيگتر بويه، نهك ئهرا مهردم شارهگه خوهی، وهلی بايهته وهيهكهوژیان و هاوبهشی داشتويمن ، ئهو كهركوكهگ جاران بهدبهخت بويه بايهته له بهرژهوهندی گشت نهتهوهیلی بوود و هیچ مهراميگ تایبهت لهتی نهود ، چوينكه خاك خزمهت ئهخوازێ و ئهو كهسهیله ك لهتی ژيهن بايهت وهراوهر وه یهكتری وهخشين داشتوون تا بتويهنن لهو خاكه بههرهمهند بوون".
وتیش: "ئهرك ئيمهو گشت ئهو كهسهیلهيشهسه ك وهل مللهت كورد تاريخ ديرن، لهڕوی هونهر و فهرههنگهوه كار ئهرای بكهیمن و بتويهنیمن بهشيگ لهو وهرپرسیاريهتییه وهربگریمن ئهرا ئهوهگ خزمهت بوار فهرههنگی ئهدهب و میوزیك مللهتهگهمان بكهیمن وهتایبهتی شار كهركوك".
هونهرمهند ئاماژه ئهرا ئهوهيشكرد ك: "شار كهركوك جوور نهفتهگهی دهوڵهمهنه. وهوخاتره ك فره كاڵچهره، تويهنريهێ كاريگ كولتووری ههمهلایهنه بكريهێد و بهرنامهيش ئهرا ئهو كار كولتوورییه ديريمن". وتیش: "شارستانیهت له كهركوك زیاتره، چوينكه بنهڕهت هونهری لهی شاره زیاتر بويه له شارهيلتر كوردستان، وهگورهی ئهوهگ بنهڕهت میوزیك له شار كهركوكهوه سهرههڵداگه، نهك له شارهيلتر، وهيخاتره یهكيگ له ئامانجهيلمان ئهوهسه ك بتويهنیمن پشتگيری له كهركوك بكهیمن و بتويهنیمن میوزیك ناوچهگه زینگهوبكهیمن، نهك تهنيا ئهرا نهوهی گوزهيشته، بهڵكم ئهرا نهوهی ئايندهيش، ئهرا ئهوهگ نهوهی ئاينده بزانێ كولتوور ئهی ناوچه چهنيگ دهوڵهمهنه لهڕوی هونهرییهوه، ههروهوجوورهگ لهڕوی نهفتهو دهوڵهمهنه ".
| < پێشتر | دواتر > |
|---|
