شهفهق/ دیدار تایبهت
و گیان داهێنانى دروس كردن و هیشتنهى لهحزهیل سهرسوڕمان بكهیده ڕهسمهیلیگ ك ئهوسا و ئیسهیش ناو بهغدا ههڵگرتنه.
ئى ڕاوچى پیشهسازه ك ڕهسمهیل راوكهید وهرجلهوهگ له دوڕیانهیل ژیان بڕفیهن، له ساڵ 1949 له بهغدا پهیا بوى و كاروانهگهى وهل چهو كامیراوه له ساڵ 1962 هو دهس وهپى كرد و هیمان وهردهوامه، ههرچهنى ك زهمانه و خهم نهنه ڕواڵ گرته یا (لهقته)یلهوه تا بكهنهیانه دهریایگ پڕشهپۆل ڕویچهیل ڕاسى.
چهن پیشانگا یا مهعرهزیگ ڕهسمهیل فۆتۆگرافى و گرافیكى داشتیه و لهوانهیش:
خانیهیل شوونهیل – بهغدا- سهنتهر هونهرهیل 1991
بانزهیل شهوق – بهغدا – 1992
ڕهسمهیلیگ عیراقى – پاریس – پهیمانگاى جههان عهرهبى
ڕووژهیل شارهیل عیراقى – ئۆهایۆ – ئهمریكا – 2001
له سهرهتاى گفت و گوویگ وهل ماڵپهڕ شهفهق هونهرمهند فوئاد شاكر ئویشى :" كارهگانم ك پڕن له سهرسوڕمان هونهرمهند و ههست كردنى وه گهرمى ژیان و جوانیهگهى كهمه دیارى ئهرا تهماشاكهر".
لهباوهت ئهزموونه فۆتۆگرافیهگهى شاكر ئویشى :" ئهزموونهگهم له ساڵ 1962 هوه دهسكرده پى وهختى هیمان 13 ساڵان بویم و لهوراوه كاروانهگهم وهل ڕهسمگرتنهو دهس كردهپى، له چهن ستۆدیۆیگ وه ڕهنگكردن ڕهسمهیل و ڕاسهوكردنیان وهختى هیمان ڕهسمگرتن ڕهنگامه نهوى و سیه و چهرمگ بوى، و لهشوون ئهوه وهرهو دونیاى ڕووشنهویرى چویم و من ڕهسمگر فۆتۆگرافى پیشهییگم ك چهو كامیراگهم له دونیاى واقعیهت سهفهر كردیاد و مهیدانهگهم ئاسۆى واز بوى (یهعنى فۆتۆگراف زنى)و یهیشه هیشتهم وهرهو دونیاى ڕووژنامهنویسى بچم ههرچهنى ك ئى پیشه پیشهى مهینهتى و شهكهتیه" زیاتریش ئویشى :" له ساڵ 1975 تا ساڵ 1977 له ڕووژنامهى الجمهوریه كاركردم ك ئهوسا بهربڵاو بوى و له سهرهتا وهك ڕهسمگر بویم و دویاخر بویمه بهرپرس بهش ڕهسمگرتن".
له باوهت فهلسهفهت كار هونهرى خوهى، شاكر ئویشى :" فره له ڕهسمگرهیل مینهى ڕهسمهیلیان له شوونهیل دویر دویر كهن و وهى خاتره سهفهركهن، وهلى من ئهوه دوینم ك ڕهسمهگان هانه چواردهورد، له گشت دوڕیانهگان ژیان، له شوونهیل گشتى ، له كویچهیل مللى و له جادهیل ، ههر له شوونهگهى خوهد و ههوهجهد وه سهفهر نیه، ئهگهر ڕهسم جوانى بتواید یا ڕهسمهیلیگتر، له لاى منهو گرنگى ڕهسمهگه هاله شهوق، ههمیشه شوق له گشت چشتى گرنگتره ئهرا هونهرمهند فۆتۆگرافهر و خوهى ئارهزوو و داواكارى ڕهسمگره".
له باوهت نزیكهو بوین و دیدار له ناونى ڕهسمهگانى و ئهو جههانه ك غائب توعمه فهرمان له ڕۆمانهگانى ڕهسمیان گرتیه، فوئاد شاكر ئویشى :" من و غائب توعمه فهرمان له یهك شار ژیایمن ك ناوى بهغدایه ك تاریخیگ چڕ و پڕ وه ڕویداگهیل پادشا و میرهیلدیرى، له كویچهو بازاڕهیلى ژیایمن و له ماڵهیل تاریكیهو دهرچیمن و نهزانستیمن ك وهڕاسى ئیمه داهێنان یا مهوهبه دیریمن، غائب توعمه فهرمان ڕهسم فرهیگ له ژیان عیراقیهیل گرت له سهردهم تاریكیگ و منیش لهى واقع تیهڵه وه ههمان دیدگا و وهههمان ئحساس كار كردم ك له خهیاڵ ئهو ڕۆمان نویس گهورا بوى،و ههردگمان جههانیگ ڕهسمكردیمن وهو جوورهگ بایهسه ڕهسم بكریهید، جههانیگ پڕ چشتهیل هاودژ و ئارهزووهیل دویاخریاى و تویهنستیمن یه گشتى وه دیدگایگ خوڵقێنهر یا (خلاق) وهل جیاوازى زهمان نیشان بیهیمن، تویهنستیمن واقع وه وردهكاریه شرین و تیهڵهگانیهوه ڕهسم بگریمن ك ههست و وژدان لهرزنى".
فوئاد شاكر زیاتریش وت :" فره چیمه فكر ڕۆمان (دارخورما و هاوسایهیل) ك غائب توعمه فهرمان پیشبینى ڕویدایهیل ئایندهیى عیراق لهتى كرد ، لهیرا غائب كهفته نواى زهمان خوهى له ڕهسمگرتن ئهو ڕویدایهیله ك عیراق له ساڵهیل بیس و سى لهتى ژیاد و ئیمڕوویش زهمانه خوهى دوبارهوه كهید، چوینكه عیراقیهیل له ههمان بارووهزع ژیهن، چوینكه ئیسهیش پشتیان چهمیاس و خاتریان شكیاس و چهوهڕى ههق خوهیان كهن له ژیانیگ ئازاد و كهرامهتدار".
له باوهت ئهزموونهگهى وهل ڕهسمگرتن وه تهكنۆڵۆجیاى نوو فوئاد شاكر ئویشى :" وه كامیراى هونهرى ڕهسمهیل فرهیگ گرتم و ئیمڕوو كامیراى دیجیتاڵ وهكار تیهرم، ئهوسا ڕهسمهگه له مهیدانهگهى بردیام ئهرا تاقیگا یا مختبر و كارهیل فرهیگ ئهنجام دام، لهلیان له واشنتۆن نمایش كریان و له لیانیش له مانگ ده له تۆكیۆ نمایش كریهن، و زویتر كارهگانم نیشان فۆتۆگرافهیل یابانى دام و مایهى خوهشهاتنیان بوى و مكیسم كردن ئهرا ئهوهگ پیشانگایگ له یابان نمایش بكهم".
له باوهت نزیكترین كارهیل له دڵى؛ فوئاد شاكر ئویشى :" ههر كاریگ له كارهگانم كوتیگه له دڵم".
له باوهت ئهو ماده ك ئهرا كارهگانى ههڵوژنید شاكر ئویشى :" وهل وردهكاریهگان ژیانهو وه بى لایهنى تهواویگ مامڵهت كهم و من مهیل وهرهو واقعیهت دیرم ههرچهنى ك له گشت تهكنۆڵوجیاگان ڕهسمگرتن ئاشنایى دیرم ، چوینكه هونهرمهند بایهسه ڕهسمهگه له واقع وه زووریگ خوڵقێنهر یا (خلاق) ههڵكهنید و ئهرك ڕهسمگر ئهوهسه وه گشت ئهمانتیگهو وهل واقعهو مامڵهت بكهید و منیش ئى كاره كردم و ئهرا جههان گشتى نهقڵى كردم وهو شیوه ك بایهسه بوینیدهى".
| < پێشتر | دواتر > |
|---|
