شـه‌فــه‌ق نــیوز

شه‌فه‌ق/ ناسلی بە وروژێنەرترین قوتابییەكانی هەڵكەوت زاهیر دەناسرێتەوە، ئەو تەنیا مانگێگە كلیپی گۆرانی (بەقسەم كە)ـی لەكەناڵەكان بڵاوكردۆتەوە، بەڵام

راگەیاندنەكان پێشئەوەی گوێیان لەدەنگی ناسلی بێت، گرنگیەكی زۆریان پێداوە و تائێستا زۆرترین هەواڵی لەسەر بڵاو كراوەتەوە.

لەناو كچە قوتابییەكانی هەڵكەوت زاهیردا، تەنیا ناسلی خەڵكی هەولێرە، كە لەساڵی 1989 لەشاری هەولێر لەدایكبووە و لەتەمەنی منداڵیدا لەگەڵ خانەوادەكەی خۆی كوردستانیان جێهێشتوە و ئێستا لەوڵاتی سوید نیشتەجێن، بەڵام روخساری ئەو لەكچە كورد ناچێ، باڵابەرز و ڕەشتارە و چاو سەوزە، لەگەڵ ئەوەشدا زۆر وروژێنەرە، كە تەنیا یەك مانگ لەدەركەوتنیدا لەهەموو شوێنێكی كوردستاندا باسی لێوە دەكرێ، هەر لەبەر ئەوەشە هەڵكەوت زاهیر گرنگیەكی زۆرتری پێداوە، یەكێك لەو گرنگیانەش، گۆرانییەكی بۆ شارەكەی ناسلی دروست كردووە، كە هەولێرە.

"نانا كوڕە سەیری تۆ ناكەم. گەر هەولێریی نەبی.. لاچۆ من شووت پێناكەم". ئەوە بەشێكە لەتێكستی گۆرانییەكە، كە ناسلی دیسانەوە بەشێوەیەكی زۆر وروژێنەر لەگۆرانییەكەدا خۆی دەرخستوە، هونەرمەند هەڵكەوت زاهیر كە دانەری تێكست و میلۆدیی گۆرانییەكەیە دەڵێت "دیارە ژیان بەسەربردن لەهەر جێگایەك خاترانێك لەلات دروست دەكات، بەكارهێنانی ناوی هەولێر لەخۆشەویستی منە بۆ شاری هەولێر و دانیشتوانەكەی، دواتر هونەرمەند ناسلی خەڵكی هەولێرە و وەك تەنزێك بۆ بەكارهێنانی ڕەگەزی بەرانبەری، كوڕە هەولێریمان بەكارهێنا، تێكستەكەم نووسی، دواتر میلۆدیم بۆی دانا، بێگومان ناسلی خۆشی پێی خۆش بوو". هەڵكەوت زاهیر ئاماژەی بۆ ئەوەشكرد، پێشتر بیرۆكەی دروستكردنی گۆرانییەكی لەم شێوەی هەبووە، دەڵێت "هەندێجار كار پێش وەخت لەبیری مرۆڤ ئامادە دەبێ، هەندێجاریش كارەكتەری هونەرمەندەكە بیرۆكە دروست دەكات، بۆ نموونە كارەكتەری (دەشنێ) هەمیشە خۆلقێنەری باشە بۆ كارەكانی من، چونكە بۆ خۆی پڕە لەفەنتازیا".

پاش نیوەڕۆی ڕۆژی 25/6/2010 لە نافورە تازەكەی دەڵالخانەی بازاڕی شاری هەولێر، خەڵكێكی زۆر كۆببوونەوە و بازنەیەكی فراوانیان دروستكردبوو، ئەوە ناسلی بووە، لەناو بازنەی خەڵكەكەدا بە قات و پانتۆڵێكی سپی، دانسی دەكرد و گۆرانی "نانا كوڕە سەیری تۆ ناكەم. گەر هەولێریی نەبی.. لاچۆ من شووت پێناكەم"ـی كلیپ دەكرد، ئەو لەناو ئاپورەی خەڵك و لەبەرچاوی سەدان پیاو كە وەك خۆی دەڵێ "دەتگۆ زێڕەك كەتیە، ئەو هەموو عالەمە خڕببوونەوە". لەگەڵ گۆرانییە (هەولێریی)ـەكەیدا خۆی بادەدا، ئەو ڕۆژە ناسلی وەك یەكەمین كچی كورد ناوی خۆی تۆماركرد، كە لەناو بازاڕی هەولێر و تێكەڵ بەخەڵكانێكی سادە و دوور لەهونەر، گۆرانی گوت و دانسی كرد، لەو بارەیەوە ناسلی دەڵێت "سەرەتا كەمێك شەرمم كرد، دواتر راهاتم، كە تەواوبووم بەزەحمەت توانیم بچمە ناو سەیارەكە، خەڵكە زۆر زۆر بوون، هاتنە پێشەوە وێنەم لەگەڵ بگرن و دەیانویست قسەم لەگەڵ بكەن، لەكاتی كلیپكردندا كە گوێیان لە وشە و میلۆدیی گۆرانییەكە بوو، زۆر خۆشحاڵ بوون".

عوسمان قادر تەمەن 28 ساڵە و لەبازاڕی دەڵاڵخانە قاتی پیاوان دەفرۆشێت، ئەو لەكاتی وێنەگرتنی كلیپەكەی ناسلی لەوێ بووە و دەڵێت "خۆی كچەكە زۆر جوان بوو، دانس و گۆرانییەكەش جوان بوون، وەڵڵا هەموو شتێكی ئەو كچە جوان بوو، هەر لەبەرئەوەش خەڵكەكە لێی كۆببوونەوە، شتێكی زۆر جوان و سەیر بوو، چونكە لەكوردستان رووینەداوە لەناو بازاڕی هەولێر كچێك گۆرانی بڵێ و لەگەڵ خەڵكەكە تێكەڵ بێت و دانس بكات، لەهونەری كوردیدا قەت شتی وا رووینەداوە، زۆر حەزدەكەم جارێكی دی ئەو كچە ببینمەوە و پێی بڵێم: بەڕاستی ئازای، حەق وایە ئەو نافورە بەناوی ئەو كچە بكرێ".

بێوار عەبدوڵڵا، 23 ساڵ، لەنافورە نوێكەی دەڵالخانە ئاوی خواردنەوە دەفرۆشێت و ئەویش دەڵێت "سەرەتا وامانزانی ئەو كچە ئینگلیزە، بەڵام كە گۆرانییەكەی گوت، ئینجا زانیمان كوردە، زۆر جوان دانسی دەكرد، ڕاستی هەموو ماندووبوونی ئەو ڕۆژی خۆم لەبیرچوو"، ئەو گەنجە كە زۆر حەزی كردووە وێنەی لەگەڵ بگرێ، بەڵام نەیتوانیوە، دەڵێ "خەڵك زۆر كۆبووەوە، نەیانهێشت لێی نزیك ببمەوە، بەڵام ئافەرین بۆ ئەو كچە، لەناو ئەو هەمووە پیاودا شەرمی نەكرد، هەم ئیشەكەی خۆی كرد و هەمیش دڵی ئێمەی خۆشكرد، وابزانم دەیگوت: كوڕی هەولێری تامیان خۆشە".

مام رەسووڵی 58 ساڵ، تەنیا لە دوورەوە دانسەكەی ناسلی بینیوە، دەڵێ لەبەر هات و هاواری خەڵك گوێم لەگۆرانییەكە نەبوو، بەڵام كچەكە زۆر خوێن شیرین و بێشەرم بوو، مام رەسول ئەوەشی گوت "مادام ئەو كچە خەڵكی هەولێرە و كوڕێكی هەولێریشی دەوێت، من دوو كوڕی بێژنم ماوە، یەكێكیان حەلاقە و ئەویتریان قوتابییە، كامەی دەوێت پیرۆزی بێ و مارەبڕیان دەكەم".

ئەم هەنگاوەی ناسلی لەكۆمەڵگای كوردیدا ئاسان نییە، بەتایبەتی ئەو لەناو بازاڕێكدا سەمای كردووە كە خەڵكانی كاسب و تەمەن جیاوازی تێدایە، هەر بۆیە كە لە بەساڵاچوویەكی بازاڕەكەمان پرسی، ئەو كچەت بینی، رات چی بوو؟ بە توڕەییەوە گوتی "من قسە لەسەر مەوزوعێكی وا ناكەم، جاران هەولێر وانەبوو، ئێستا هەموو سنورەكی تێپەڕاندووە".

تەنیا دیمەنێك لەكلیپی ئەو گۆرانییە لەماڵپەڕی فەیسبووك بڵاوبۆتەوە و زیاتر لە 700 كوڕ دیكۆمێنتیان بۆی نووسیوە، كوڕێك بەناوی ئاریان فوئاد دیكۆمێنێكی بۆ ناسلی ناردووە و نووسیویەتی "سڵاو ناسلی خان. ئەگەر ئەتو شانازی دەكەی شوو بەكوڕێكی هەولێری بكەی، من حازرم بەقوربان، هەولێری ئەسلم، لەبەرخاتری هەولێر جوابم دەوە". لەوەڵامی ئەو پرسیارەی ئایا ناسلی لەواقیعدا دڵی بەكوڕێكی هەولێرییەوەیە، ناسلی بەپێكەنینەوە گوتی "تائێستا نا، بەڵام هەموو خەڵكی كوردستانم خۆش دەوێت و بەتایبەت خەڵكی شارەكەی خۆمم زۆر خۆش دەوێت، من منداڵی ئەو هەولێرەم".

ئەو هەنگاوە لەلایەن ناسلیەوە، بە پشتیوان و هاندانی مامۆستاكەی بووە، كە هەڵكەوت زاهیرە و تێكست و ئاوازی گۆرانییەكەشی داناوە، هەڵكەوت زاهیر دەڵێت "بۆ ئەو گۆرانییە زۆر دەستخۆشیم بۆ هاتووە و خۆشەویستیم بۆ خەڵكی هەولێر هەیە، خۆشحاڵم بتوانم دڵی گەنجانی هەولێر خۆش بكەم و ڕازیان بكەم، چونكە من لەشارەكەیان و لەخەڵكەكەی زۆر ڕازیم"














سڤيل

< پێشتر		دواتر >