شهفهق/ جهماڵ ئهركهوازى
فره وهداخهوه ، ئمڕوو دوینیم لهكوومهڵگایهیل فرهیگ وهتایبهت كوومهڵگاى كوردهوارى خوهمان دیاردهیگ بویهسه باوجویر هووكاریگ ئهرا وهدهسهاوردن دارایى زیاتر . ئیمهى موسڵمان جویر ئهوهك پهیڕهو دین پاك ئسلام كهیم و شوناسنامهمان لهتى نویسیاگه موسڵمان ، دى بایهسه مقهیهت ئهو چشتهیله بویمن ك زهرهد وهئاخرهتمان رهسنن . ئمجا نهك ههر موسڵمان بهڵكوو دینهیل تریش ریگرن لهوهردهم وهكارهاوردن چشت ناپهسهن .
ئمڕوو كهسهیلیگ لهوهر خاتر جهمهوكردن سهرمایهو داهات زیاتر ، دوینید ڕیهیل جووراو جوور و ناشهرعى گرتنهسهوهر ، وهتایبهت ئهوانهك خاوهن پویل یا دهولهمهنن یا سهرمایهیگ لهژیردهس خوهیان دیرن و توان وهههر جووریگ بووگ جویر شیركوڵانن لهبان ئاگر بایگه ههڵچین و پف بكا . ئهویش وهگوورهى ئهوهك مهردمانیگ ههن ڕووژانه لهلیان ژنهفیم ئویشن (پویل ، پویل تیهریگ )و دى خوهیان گیل و نهفام كهن لهئاست حهڵاڵ و حهرامیهگهى . ئمجا لهڕى فایز (ربا)هوه ماڵ و سامان نهنه یهكهوه ، ك یهیش لهقورئان پیرووز لهچهن سورهو ئایهتیگ وهئاشكرا ئشارهت وه حهرامكردنى كریاگهو لهوانهیش (بهقهره / ئایهت 275،276 )و (ئال عومران/ 130 )و (روم/ 39) ك خوداوهند كهریم لهعنهت ریبا خوهرهیل كردگهو بیجگه ئهوهیش حهرامكریاگه لهگشت كتاوهیل ئاسمانى . پویل فایز زهرهد فرهیگیش رهسنیگه كوومهڵگا ، ك هووكاریگیشه ئهرا بهرزهبوین نرخ و لهههمان وهخت دارایى و گردهوكردن پویل تهنیا كهفیگه دهس چینیگ له كوومهڵگاو زهرهد رهسنیگه فهیر و نهدار .
ههر لهى باوهتهوه ، ئویشن لهزهمانهى زوى پیاویگ وهفایز (ربا) ماڵ و موڵك فرهیگ جهمهو كردویگ و بڕیار داویگ ئهو باقى عومرهگهى وهژیان خوهشیگ بووهیگه سهر ، دارایهگهیشى لهو وهخته نزیكهى 300ههزار دینار بویاگ ك تویهنستیاگ ژیان خوهش وهپى بووهیگه سهر ، وهلى لهناكاو (ئزرایل)سڵام خودا لهلى هاتگه گیانى بكیشیگ ، پیاوهگه لهههیوهت گیانیا دهسكردهسه هاوار و گیرستن و داواى موڵهت كردویگ له ئزرایل ك ئامادهس 100ههزار دینار بهیگ و تهنیا 3 رووژ موڵهتى بهیگ ، وهلى ئزرایل قهبوولى نهكرد و پیاوهگه وت : 200ههزار دینار دهم تهنیا 2 رووژ موڵهتم بیه ، ئزرایل ههر قهبوول نهكرد و پیاویش ناچار بوى و ، وته ئزرایل گشت دارایهگهم 300ههزار دیناره دهمهى پید تهنیا ئهوهنهى نویسانن یهك جومله موڵهتم بیه ، ئزرایل موڵهتى دا ، ئمجا پیاوهگه نویسا (من تواسم یهك رووژ عومرم وه 300ههزار دینار بسینم ، وهلى نهفرووشتنهى ، ئیوه قهدر عومردان بگرن لهوهر ئهوهك نه ئهڕا سهندن و نهیش ئهڕا فرووشتن)ه .
ئهیهسه مهسهلهى فایز و دهرهنجامهیلى ك ئمڕوو سارتاپاى كوومهڵگا پووشاگهو هویر ئاخرهت خریاسه كنار . لهوهر ئهوهك نه ئهوهك پویلهگه دهیگه فایز نهف وهرگریگ لهئاخرهت ، نهیش ئهوهك پویلهگه وهرگریگ لهسزاى حهشر قورتارى بووگ . وهل ئهوهیشا فرهجار لهباوگ و باپیرهیلمانیش ژنهفتیمنهو ئویشن (حهرام ... حهڵالهگهیش فهوتنیگ ) .
| < پێشتر | دواتر > |
|---|
