شـه‌فــه‌ق نــیوز

مه‌يموون حه‌يوانيگ چوارپاسه‌و سه‌ر وه‌گرووپ گيانله‌وه‌ره‌يل شيرده‌ره‌ ، مه‌يموونه‌يل ده‌س وپايان دريژه‌و

زوورم مه‌يموونه‌يل دوی ديرن و له‌ليانيش هه‌س لويتيان پانه‌و مه‌يموونيش هه‌س لويت باريك . مه‌يموونه‌يل بويچگ تويه‌نن وه‌خاسی بهه‌يوان و بچنه‌ بان دارودره‌خته‌يل و زوورميانيش له‌بان داره‌يل ژيه‌ن ، چوينكه‌ وه‌ ده‌س وپايه‌يليان لقه‌يل داره‌گه‌ گرن .

مه‌يموونه‌يل تويه‌نن وه‌پايه‌يل و ده‌سه‌يل دريژيان وه‌ئاسانی جموجويل بكه‌ن ، له‌ليانيش هه‌س له‌وه‌ختيگ جيواز خوه‌يان كه‌ن وه‌ دوی خوه‌يان كه‌نه‌ دارا تا بتويه‌نن مقه‌يه‌تی هاوسه‌نگی خوه‌يان بكه‌ن له‌وه‌خت بازداينيان له‌ی دار ئه‌را ئه‌و دار . مه‌يموونه‌يل وه‌ك ئاده‌ميزاد چه‌ويان ها له‌نواوه‌ ، ئه‌ويش يارمه‌تيده‌ر خاسيگه‌ ئه‌ڕايان له‌وه‌خت بازداين و پيچه‌وكردنيان تا له‌و شوونه‌ ك مه‌به‌سيانه‌ ئارام بگرن . وه‌ل ئه‌وه‌يشا تويه‌نن ره‌نگه‌يل بناسن ، ئه‌ويش يارمه‌تييان ده‌يگ له‌وه‌ختيگ گه‌ردنه‌ شوون خواردنا . وه‌ختيگ مه‌يموونه‌يل بويچگ له‌بان زه‌وی بوون وه‌هه‌ر چوار په‌ليان هه‌يوان . مه‌يموونه‌يل ده‌سيان له‌ قوله‌يليان دريژتره‌ . قه‌يريگ له‌ مه‌يموونه‌يل ، ئه‌را نموونه‌ : بابينانه‌يل زياتر له‌بان زه‌وی ژيه‌ن ، چوينكه‌ ئه‌وانه‌ كيش يا وه‌زنيان قورسه‌و نيه‌تويه‌نن وه‌خاسی له‌ناو داره‌يل بازبازان بكه‌ن ، ئمجا له‌وه‌ر دڵنيايی به‌عزه‌جاريگ په‌نا به‌نه‌ وه‌ر حه‌يوانه‌يل تر . (ئه‌نتيلۆپه‌ر) جووره‌ ئاسكيگه‌ ، له‌ بابينانه‌يل فره‌تر ژنه‌فن و هس بووكردنيانيش له‌وان خاستره‌ ، ئمجا فره‌جار خوه‌يان له‌و ئاسكه‌يله‌ نزيكه‌و كه‌ن ، چوينكه‌ ئه‌و ئاسكه‌يله‌ فره‌ ئاگادارن و زوی هس وه‌مه‌ترسی كه‌ن . ئمجا ئاسكه‌يل وه‌سه‌به‌ب هس بووكردنيانه‌وه‌ ، هس وه‌ نزيكه‌وبوين دوشمنه‌يليان كه‌ن ، يه‌ بيجگه‌ ئه‌وه‌ك چه‌وه‌يليانيش فره‌ تيژه‌ ، هه‌ر له‌وه‌ر ئه‌وه‌يش ئه‌و ئاسكه‌يله‌ جوير پاسه‌وان يا مقه‌يه‌تيكه‌رن ئه‌را بابيانه‌يل . مه‌يموونه‌يل به‌چكه‌ كه‌ن ، وه‌لی ته‌نيا يه‌ك به‌چكه‌ ، هه‌ر له‌وه‌ختيگ به‌چكه‌گه‌ په‌يا بووگ يه‌كسه‌ر باوه‌ش كه‌يگه‌ دايگيا ، ئمجا ئه‌و به‌چكه‌يله‌ تا دگان درارن شير دايگيان مژن و دوياخر ده‌سكه‌نه‌ خواردن چشته‌يل تر ، به‌شيگ فره‌يش له‌ به‌چكه‌ مه‌يموونه‌يل تا عومريان بووگه‌ دو ساڵانيش هه‌ر له‌دايگيان دويره‌و نيه‌كه‌فن ، ئمجا دوياخر هس وه ئه‌وه‌ كه‌ن ك دڵنيان و دی وه‌ئازادی گه‌ردن . مه‌يموونه‌يل وه‌ك خيزانيگ گه‌ورا وه‌يه‌كه‌وه‌ ژيه‌ن و له‌په‌ياكردن ره‌فيقايه‌تييش زيره‌كن ، وه‌ل ئه‌وه‌يشا يارمه‌تی يه‌كتری ده‌ن له‌پاكه‌وكردن پووس يه‌كتری ، وه‌ل ئه‌وه‌يشا له‌گشت وه‌خت وسه‌عاتيگ ده‌نگ جياواز ديرن ، ئه‌را نموونه‌ وه‌ختی ميوه‌يگ دويننه‌وه‌ جووره‌ ده‌نگ تايبه‌تيگ له‌ليانه‌و تيه‌يگ ، وه‌ختيگيش ده‌مه‌قاڵ كه‌ن ده‌نگ فره‌ جياوازتريگ له‌ليانه‌و ده‌رچووگ . هه‌رچی مه‌يموونه‌ ك له‌بان زه‌وی ژيه‌يگ بايه‌سه‌ مقه‌يه‌تی خوه‌يان بكه‌ن له‌ شير و پڵنگ و پڵنگ خاڵدار ، ئمجا به‌عزه‌جاريگيش سه‌رووكه‌يليان ده‌سه‌وتاقم دروسكه‌ن و گشتيان وه‌يه‌كه‌وه‌ په‌لامار حه‌يوانه‌يل دڕنده‌ ده‌ن .

< پێشتر		دواتر >