شـه‌فــه‌ق نــیوز

شه‌فه‌ق/ خانمه‌ گورانیچڕ چۆپی، به‌شداری له‌ خول دويه‌م فستیڤاڵ كلتووری ده‌ریاچه‌ له‌ شار وان له‌ كوردستان توركیا كرد.

ئێحسان فه‌تاح وه‌ڕێه‌وبه‌ر كاره‌یل چۆپی وه‌ ئاژانس په‌یامنێر وت "له‌ 24 ته‌مموز/ یۆلیۆ 2011، وه‌ به‌شداری ده‌یان هه‌زار كه‌س ك‌‌ له‌ فستیڤاڵه‌گه‌ ئاماده‌بوين، گورانی پێشكه‌ش كرد".

وتیش "هه‌ر له‌ى فستیڤاڵه‌ ٣٦ په‌رله‌مانتار هه‌ڵوژرياگ BDP و ٩٦ سه‌رۆك شاره‌وانی شاره‌یل كوردستانی توركیا، ئاماده‌ی فستیفاڵه‌گه‌ بوين".

ئاشكرايشیه‌وكرد‌ "دويای ئه‌وه‌گ پێشكه‌شكار فستیفاڵه‌گه‌ حه‌كیم سه‌فگان وه‌شيوه‌یگ فره‌ جوان هونه‌رمه‌ند چۆپی بانگهێشت بان ته‌خت شانۆ كرد، له‌ ناو جه‌ماوه‌ر و  وه‌ جووش و خرووش فره‌يگ وه‌ چه‌پڵه‌ رێزان پێشوازی له‌ليكريا".

ئه‌وه‌يش خسته‌ روى "له‌ كووتایی به‌رنامه‌گه‌ چۆپی سه‌رسامی خوه‌ی نیشاندا ئه‌را عشق جه‌ماوه‌ر وان ئه‌را هونه‌ر كوردی و ئه‌را ئه‌و پێشكه‌فتنه‌ گه‌ورا ك‌ شار وان وه‌ خوه‌یه‌و‌ دیه‌سه‌ی له‌ سایه‌ی شاره‌وانی  كورده‌يل".

ئه‌وه‌يش ئاشكرا كرد "له‌ 10 ئه‌یلول/ سپتێمبه‌ر 2011 چۆپی به‌شداری له‌ فستیڤاڵيگ گه‌ورا له‌ شار كۆڵن له‌ ئه‌ڵمانیا ئه‌كا، چه‌وه‌ڕێ ئه‌كريه‌ێ زیاتر له‌ سه‌د هه‌زار كه‌س ئاماده‌ی ئه‌و فستیڤاڵه‌ بوون".