شـه‌فــه‌ق نــیوز

شه‌فه‌ق/ سه‌لوان مه‌جید، وه‌ڕێه‌ووه‌ر‌ كۆمپانیای‌ بابیلۆن میدیا ئاماژه‌ ئه‌را ئه‌وه ‌ئه‌كا، كۆمپانیاگه‌یان له‌ماوه‌ی‌ ئاینده‌ چه‌نه‌ها هونه‌رمه‌ند تێرێده‌ كوردستان‌و پرۆژه‌ی‌ دامه‌زرانن‌ كه‌ناڵێگ‌ ته‌له‌فزیۆنیش دیرن‌. وه‌ڕێه‌ووه‌‌ر‌ كۆمپانیای‌ بابیلۆن میدیا، وه‌ئاژانس‌ هه‌واڵی‌ ناوخۆ‌ وت، له‌ساڵ‌ 2006 له‌كوردستان ده‌س كردنه‌سه‌ ‌كاركردن‌، ئه‌و كاره‌یله‌‌گ كریانه‌ له‌ماوه‌ی‌ گوزه‌یشته‌ هاوردن‌ چه‌نه‌ها هونه‌رمه‌ند‌ فارس‌‌و عه‌ره‌ب‌ بوین‌و ئه‌وانه‌ی‌ ك له‌ ئاینده‌ هانه‌ ته‌ما بارنه‌یان ئه‌را كوردستان بڕیاره‌ له‌ساڵ‌ 2012 (ففتی‌ سێنت) بارن.

سه‌لوان مه‌جید وتیش‌:"هاوردن‌ هونه‌رمه‌ند، پویل‌ فره‌یگ چووده‌‌تى، ئه‌گه‌ر وه‌نموونه‌ باس دویا هونه‌رمه‌ند بكه‌یمن هاوردن‌ (گوگووش) بوى، ك گرێبه‌سه‌گه‌ی‌ (500.000) پانسه‌د هه‌زار دۆلار بوى بیجگه‌ له‌خه‌رج‌ ڕێ ‌‌و مه‌نینیان له‌كورستان".

سه‌باره‌ت وه‌وه‌گ‌ هونه‌رمه‌نده‌یل ناوخۆیی گلـله‌یی له‌لیان ‌كه‌ن، ك‌ كار ئه‌را ئه‌وان نیه‌كه‌ن‌و په‌نا ئه‌را بێگانه‌ ‌به‌ن وه‌ڕێه‌ووه‌‌ر‌ كۆمپانیای بابیلۆن میدیا وت‌:"هاوكاری‌ نه‌كردن‌ هونه‌رمه‌نده‌یل ناوخۆیی وه‌مانای‌ ئه‌وه‌ نیه‌ توانایی نه‌یرن، وه‌لی ئیمه‌ له‌سه‌ره‌تاوه‌ مه‌به‌سمان ئه‌وه‌بویه‌، ك‌ جوور ناوده‌وڵه‌تی‌ ده‌ربكه‌فین‌و دویاتر كاره‌گانمان بخه‌یمنه‌ ناوخۆ، چوینكه‌ فره‌تر‌ هونه‌رمه‌نده‌یل‌ ناوخوه‌ی كوردستان له‌لایه‌ن حكومه‌ته‌و‌ هاوكاری كریه‌ن‌".

وه‌ڕێه‌ووه‌‌ر‌ كۆمپاینای‌ بابیلۆن میدیا، ئه‌وه‌یش‌ خسته‌ڕوی، ئیسه‌ كار له‌بان فلیمیگ‌ ناوده‌وڵه‌تی‌ سینه‌مایی‌ ‌كه‌ن له‌باره‌ی كورد، قوناغی‌ سێیه‌م‌ كۆمپانیایش دامه‌زرانن‌ كه‌ناڵێگ‌ ئاسمانیه‌‌و ئیسه‌ خه‌ریك‌ ئاماده‌كردن‌ چه‌ن به‌رنامه‌یگ‌ ته‌له‌فزیۆنین‌و به‌رنامه‌ی‌ ئیبۆ شۆیش تێرنه‌ ستۆدیۆگانیان له‌هه‌رێم‌ كوردستان.

< پێشتر		دواتر >