شـه‌فــه‌ق نــیوز

شه‌فه‌ق/ بڕیاره‌ ك شار سلێمانى له‌ سه‌ره‌تاى مانگ ته‌ممووز هاتى باوش ئه‌را پیشانگاى شیوه‌كارى "وه‌یه‌كه‌و ژیان"

واز بكا ك پیشانگایگ هاوبه‌شه‌ ئه‌را هونه‌رمه‌نده‌یل شیوه‌كار به‌غدا ودیاله‌ و كه‌ركووك و گه‌رمیان و خانه‌قین، وه‌ ده‌یان تابلۆى 22 هونه‌رمه‌ند شیوه‌كار.

هونه‌رمه‌ند ساڵح نه‌جاڕ خاوه‌ن هویر (فكره‌)ى ئى پیشانگا له‌ قسه‌یلى ئه‌را شه‌فه‌ق وت ك:"یه‌كم قوناغ ئى پرۆژه‌ ك هه‌ریه‌ك له‌ به‌ڕێوه‌به‌رایه‌تى گشتى ڕووشنهویرى و هونه‌ر له‌ سلێمانى و گه‌رمیان ئه‌ركى كیشان، له‌ ڕووژ 16 حوزه‌یران له‌ شار كه‌لار وازكریا، وه‌ به‌شدارى كردن 22 هونه‌رمه‌ند له‌ به‌غدا و كه‌ركووك و دیاله‌ و خانه‌قین و كه‌لار و كفرى و دووزخورماتوو و بیباز".

نه‌جاڕ زیاتریش وت ك:"پیشانگاگه‌ له‌ ژیر ناونیشان (وه‌یه‌كه‌وژیان)ـه‌ و 70 تابلۆ گردویده‌ خوه‌یه‌و، له‌وه‌ر ئه‌وه‌ هاتیه‌ ك جه‌خت بكریه‌ید له‌ بان برایه‌تى و یه‌كسانى له‌ ناوبه‌ین گشت پیكهاته‌یل ملله‌ت عیراق و له‌ بان ئه‌وه‌یشه‌ ك هونه‌ر په‌یامیگ ئنسانیه‌ ئه‌را له‌یه‌كترى نزیكه‌وكردن مه‌ردم وه‌ گشت ڕا و ئه‌راى چوینه‌یل و هویر و باوه‌ڕ و زووانه‌یل جیاجیایان".

نه‌جاڕ ئه‌وه‌یشه‌ ڕووشنه‌وكرد ك:"پیشانگاگه‌ له‌ قوناغ یه‌كمى، پیشوازى خاسیگ له‌لى كریا له‌ لایه‌نه‌یل ڕه‌سمى و جه‌ماوه‌ریه‌و، و چه‌وه‌ڕى ئه‌وه‌یشه‌ كه‌یمن ك سه‌ركه‌فتن زیاتریگ وه‌ده‌س باریم له‌ قوناغ دویم پرۆژه‌گه‌ له‌ شار سلێمانى".

له‌ باوه‌ت دیاریترین هونه‌رمه‌نده‌یل شیوه‌كاریگ له‌ى پیشانگا به‌شدارى كردنه‌، نه‌جاڕ وت:"شماره‌یگ هونه‌رمه‌ند ناودار له‌ى پیشانگا به‌شدارى كردنه‌، دیاریترینیان هونه‌رمه‌ند ناوده‌وڵه‌تى جه‌عفه‌ر كاكه‌یى له‌ خانه‌قین و هونه‌رمه‌ند هادى ماهود له‌ به‌غدا و هونه‌رمه‌ند صالح القیسى له‌ باقووبه‌، ئه‌وه‌ بیجگه‌ هونه‌رمه‌ند موسه‌ننا بوهرزى".

< پێشتر		دواتر >