شـه‌فــه‌ق نــیوز

چرۆ فازڵ

ئایا قه‌د هویر له‌وه‌ كردیده‌سه‌و ك ئه‌و بوتڵ ئاوه‌ ك له‌ ماوه‌ی 10 خوله‌ك‌ خوه‌یده‌ی وفڕه‌ی ده‌ی تا ماوه‌ی نزیكه‌ی 10‌ملیون ساڵ مینیگه‌ی ؟

چوین ماده‌یلیگ جوورشیشه‌و پلاستیك وماده‌ ده‌سكرده‌گانترجوور ئه‌وانه‌ له‌ ژیرزه‌یویا له‌بان زه‌و‌ی شیه‌و نیه‌ون وله‌ناونیه‌چن وده‌یان ملیون ساڵ جوورخوه‌یان مینیگه‌یان ؛ یه‌ نموونه‌یگ ساده‌س ك ری خوه‌شكه‌ره‌ ئه‌ڕا شیوانن ژینگه‌گه‌مان . ئایم ته‌نیا ره‌گه‌زه‌ له‌ ناوگشت گیانداره‌یل ك توانای شیوانن ژینگه‌گه‌ی خوه‌ی وئه‌نجامداین گۆڕانكاری ریشه‌یی له‌تی دیری .

شاره‌ گه‌وراو قه‌ره‌باڵخه‌گان جوور نیویورك وجاكارتاو توكیو، وه‌رجله‌ ئه‌وه‌گ ئایم له‌تیان نیشته‌جا بوود ته‌نیا دارسان وپڕبوین له‌ گیاوگوڵ وخاشاك وباڵنده‌و شانه‌یل عه‌سه‌ڵ وگیانداره‌یلتر، وه‌لی هه‌روه‌ل ره‌سین ئایم دارسانه‌يل لاوریان وزه‌ویه‌گان ته‌خت كریان وبنایه‌یل گه‌ورا له‌تیان دروس كریاو شه‌قامه‌یلیان وه‌ قیروچه‌مه‌نتو داپوشریا ، وه‌جووریگ ك دی خاك توانای هه‌ناسه‌دان ودواره‌ زینگه‌وكردن گژوگیای نه‌مه‌ن له‌لایه‌ن ژینگه‌ییه‌وه‌ شاره‌ گه‌وراگان بوینه‌ ناوچه‌یل مردگ ك توانای ئه‌وه‌یان نه‌مه‌ن خوراك مه‌ردمه‌گه‌ی خوه‌یان ته‌ئمین بكه‌ن ، هه‌میش ئه‌وشاره‌یله‌ بوینه‌ كارگه‌یل گه‌ورای به‌رهه‌م هاوردن ژهره‌ كیمیاویه‌گان وئه‌وپاشمه‌نه‌یله‌ ك وه‌هویچ جووریگ شیه‌ونیه‌ون وجوورخوه‌یان مینیگه‌یان و وه‌ی جووره‌ دی نه‌ گژوگیاو نه‌یش باڵه‌نده‌وشانه‌ی زه‌رده‌واڵه‌گان ئه‌را دروس كردن عه‌سه‌ل توانای ژیان له‌تیان نه‌مه‌ن ؛ ئی حاڵه‌ته‌ له‌ گیانداره‌یلتربان زه‌وی بیجگه‌ ئایم روی نیه‌یگ ، چوینكه‌ ئه‌وان گونجیانه‌ وه‌ل ژینگه‌ی خوه‌یان وجه‌سه‌و پاشمه‌نه‌ی ئه‌ندامه‌یل له‌شیان له‌ زه‌وی شیه‌وبوود و بووگه‌ په‌ین ك خوراك گژوگیاس وزه‌یویش پڕپیت كه‌یگ . زانا ( ئالن ویزمان ) ك پسپۆرو شاره‌زا له‌ كاروبار ژینگه‌س پاره‌كه‌ كتاویگ بڵاوه‌وكرد وه‌ناو (جه‌هان وه‌بی ئیمه‌ ). له‌ی كتاوه‌ گریمانه‌ی ئه‌وه‌ دانریاگه‌ ئه‌گه‌رئایم كوتوپڕ له‌بان زه‌وی نه‌مینی چه‌ تیه‌یگه‌ سه‌رزه‌وی؛ ئه‌گه‌ر وه‌شیوه‌ی كوتوپڕئایم له‌بان زه‌وی نه‌مینی هه‌روه‌وجووره‌گ دانه‌ر كتاوه‌گه‌ ئویشیگ زه‌وی سرووشته‌گه‌ی ئه‌ڕای تیه‌یگه‌و . ئه‌ڕا نموونه‌ هه‌رته‌نیا له‌دویای چه‌ن رووژیگ له‌ نه‌مان مه‌ردم شار نیویورك ، ترومپه‌یل ده‌ركردن ئاوله‌ كاركه‌فن وتونیله‌یل ميترۆ پڕه‌و بوون له‌ ئاووماسی ، شه‌قامه‌يل قیرو چه‌مه‌نتوه‌گانیان شه‌ق به‌یگ وگژوگیا له‌وشه‌قه‌یله‌ سه‌رتیه‌رنه‌ ده‌یشت ؛ له‌ماوه‌ی بیس ساڵ بڕیگ له‌وگیایه‌یله‌ بوونه‌ دارو تیكه‌ چه‌مه‌نتوه‌گان شكنن و وه‌و جووره‌ روبه‌ڕیگ فراوان ئه‌را دروس كردن وگه‌شه‌كردن گژوگیا تیه‌یگه‌ دی . هه‌میش له‌شوین نه‌مه‌نن ئایمه‌یل ؛ ناوبازاڕو كویچه‌یل شاره‌یل پڕبوون له‌ ئاژه‌ڵه‌یل جیاجیا و دواره‌ ده‌س كه‌نه‌ زاوزی وفه‌ره‌وه‌ بوون و له‌ئه‌نجام واران وارین وله‌كاركه‌فتن ئاوڕه‌وه‌گان ، خه‌ڕگه‌یل په‌نه‌میه‌ن وبنه‌وای بنایه‌ به‌رزه‌گان شاره‌یل شه‌ق به‌ن وله‌ ماوه‌ی سه‌دساڵ رمیه‌ن ؛ ئمجا وه‌ی جووره‌ له‌شوین نزیكه‌ی ٥٠٠ ساڵ شار نیویورك چووگه‌ ئه‌ڕا جوخ جاران وسرووشته‌گه‌ی خوه‌ی وبیجگه‌ له‌ تیكه‌ شیشه‌ وپلاستیك هویچتر نیه‌مینی وه‌لی ئه‌و شیشه‌وپلاستیكه‌یله‌ تا ملیونان ساڵ هه‌رئه‌میننه‌وه‌ .

< پێشتر		دواتر >