له وه‌ختيگ شوونه‌واره‌يل تر بوينه‌سه ويرانه.. هه‌ولێر بنيات قه‌ڵاگه‌ێ نه‌ێد
شه‌فه‌ق نيوز/ له‌بان رويوه‌ر به‌رزاييگ ك ته‌نيا نزيكه‌ى 80 كم دويره له به‌ره‌ى جه‌نگ ك بويه‌سه هووكار ويرانكارى فريه‌يگ شوونه‌يل مێژوويى له شوونه‌يل جياجياى عراق، كارگه‌ره‌يل فريه‌يگ خه‌ريكن كار ئه‌را قورتاركردن باڵه‌خانه‌يگ مێژوويى ئه‌كه‌ن له‌ناونى ئه‌و هه‌مگه زه‌ره‌ده‌يله ك ره‌سيه‌سه شوونه‌واره‌يل.
تيميگ خه‌ريك كاركردنه ئه‌را بنياتنانه‌وه‌ى باقى شوونه‌يل ته‌مام نه‌كرياێ له قڵاى سه‌خت له هه‌ولێر پايته‌خت هه‌رێم كوردستان ك ريكخرياگ نه‌ته‌وه‌يل يه‌كگرتگ ئه‌را په‌روه‌رده‌و زانست و رووشنهويرى(يونسكۆ)تاريفى كرد وه كويه‌نترين شوونه‌واره‌يليگ ك جى ژيان ئنسانى بويه وه‌بى داوڕيان و مێژوو بڕيگ له به‌شه‌يلى بريه‌ێده‌و ئه‌را هه‌يشت هه‌زار ساڵ وه‌رجه ئيسه.
يه‌يش له‌وه‌ختيگ ريكخرياگ ترۆريستى داعش كار له‌بان هانداين خوه‌يكوشه‌يل و قه‌ناسه وه‌ده‌سه‌يلى ئه‌كا له موسڵ ئه‌را ته‌قينه‌وه‌و ده‌سڵاته‌يل له هه‌ولێر وه ئاگاداريه‌و هه‌وڵ دويره‌وخستن زه‌ره‌ده‌يل ئه‌يه‌ن.
له‌ى باوه‌ته‌و، دارا يه‌عقوبى سه‌رۆك پرووژه‌گه وت: ئيمه ته‌نيا ناخوازيم خاسسازى له قه‌ڵاگه بكه‌يم، به‌ڵكوو ئه‌خوازيم زينيگيه‌و بكه‌يم، ك نزيكه‌ى 14 شوونى ئه‌را گه‌شتياره‌يل ئاماده‌سه‌و فيشتريش ئه‌دێ، چوينكه ئى پلانه وه‌خت ئه‌كيشێد.
ده‌سڵاته‌يليش باس له‌وه ئه‌كه‌ن ك حكومه‌ت هه‌رێم تا راده‌يگ نه‌ف له سه‌قامگيريه ريژه‌يه‌گه‌ى وه‌رگرتگه له وه‌كارخستن 15 مليۆن دۆلار ئه‌را بنياتنانه‌وه‌ى قه‌ڵاگه‌ى هه‌ولێر.
دوياى ساڵه‌يليگيش له كار، باڵه‌خانه‌يل يه‌كه‌م ئه‌و قه‌ڵا قاپيه‌يلى واز كريا، له‌وانه‌يش دو مووزه‌خانه، ك يه‌كيگ له‌ليان تايبه‌ته وه كوچگه‌يل پيرووز و ئه‌واكه‌يش ئه‌را بافه‌مه‌نى.
سه‌رتيپ مسته‌فا سه‌رپه‌رشكار له‌بان مووزه‌خانه‌گه وت: ئيمه قاليه‌يليگ ديريم مێژوويان ئه‌چێده‌و ئه‌را نزيكه‌ى 100 تا 150 ساڵ وه‌رجه ئيسه ك له مه‌ردم و بازرگانه‌يل سه‌نريانه.
شوونه‌وارناسه‌يل شوونه‌واره‌يليگ كويه‌ن ده‌رخستنه وه‌ل بڕيگ كه‌ره‌سه‌يل تر و له‌وانه‌يش قازيفه‌يل تانك ك ئه‌چێده‌و ئه‌را ساڵ 2003 و ئه‌و سه‌رده‌ميشه ك سه‌دام حسێن په‌لاماره‌يلى ئه‌را كپه‌وكردن راپه‌رين 1991 كورد ده‌سوه‌پيكرد.
ئى مێژووه كه‌ڵه كريانه‌و كارگه‌ره‌يليش خه‌ريك كاركردنن ئه‌را خاسه‌وكردن شوونه‌يل قه‌ڵاگه له‌وه‌ر ئه‌وه‌گ وه‌جوانى دابنريه‌ن له‌و باڵه‌خانه‌يله ك مێژوو كويه‌نيگ ديرن.
له گووشه‌يگ تر له‌و شوونه‌واره، گه‌رماوييگ هه‌س نيشانه‌ى داوود وه‌پيه‌و دياره، ك يه‌يش شايه‌تيده‌ره له‌بان جاليه گه‌وراى يه‌هوودى ك له ناوچه‌گه ژيانه وه‌رجه كووچكردن ئه‌را ئسرائيل له ساڵه‌يل چل سه‌ده‌ى وه‌رين.
وه‌ل ئه‌وه‌يشا ماڵه‌يل تر چووڵكرياى له‌تى دياره له وه‌ختيگ ك حكومه‌ت دويا كه‌سيگ نيشته‌جى له‌و قه‌ڵا جيواز كرد له نزيكه‌ى ساڵ 2008 له‌وه‌ر ده‌سوه‌پيكردن كاره‌يل بنياتنانه‌وه‌و تازه‌كردنى.
ئمجا كاره‌يل خاسه‌وكردن ئه‌و قه‌ڵا په‌كى كه‌فت له‌شوون ئه‌وه‌گ به‌غدا ئه‌و بودجه كه‌مه‌و كرد ك ده‌وڵه‌ت ئه‌ياده‌ى حكومه‌ت هه‌رێم، ئه‌ويش له‌ساڵ 2014 وه‌بوونه‌ى ناكووكيه‌يل هه‌نارده‌ى نه‌فت.
وه‌لێ وه‌ل ئه‌وه‌يشا قه‌ڵاگه سه‌ردان فريه‌يگ گه‌شتياره‌يليش وه‌خوه‌يه‌و دى له‌ساى هووكاره‌يليگ و له‌وانه‌يش كه‌مى شوونه‌يل تر ك سه‌ردان بكريه‌ن له ناوچه‌يليگ جه‌نگ له‌ليه‌و نزيك بدێ.
رياز ركابى كارمه‌ند گشتى له به‌غدا وت: سه‌دان هه‌زار پارچه شوونه‌واره‌يل تر دزريانه و شوونه‌واره‌يل فريه‌يگ ويران كريانه له عراق و گشتيان وه بوونه‌ى خراوى بار ئاسايشى تويش ويرانه‌و دزى هاتنه.
ركابى هه‌ناى ته‌ماشاى ناوچه‌يگ بويچگ وازكرياێ ئه‌را گه‌شتيار كرد و له‌وانه‌يش دو مووزه‌خانه و شوونه‌يليگ ئه‌را تكت بڕين وت: ئه‌يه چشت جوانيگه، وه‌لئي له‌هه‌مان وه‌خت ئه‌گه‌ر چايخانه‌يگيش له‌ورا بوياتاد فريه خاستر بوى.
