چیرووک باوگیگ لە بەغدا دویەت خوەی لە قات بانین خستیەسە خوار
ئی تاوانە کەفتە دادگای نەهیشتن تاوانەیل رەسافەی بەغداد، کە لەناو کاغەزەیل لێکۆڵینەوە دەرکەفتیە ئی پیاگە هەمیشە دەس بی بەزەیی لە دویەتەی وەشانیە، تا رەسیە کوشتنی.
داڵگ دویەتەگە وت: شویەگەم هەمیشە دەس لەی دویەتمانە وەشانیە، و لەی دویاییە چگە خوینیی.
دیاری کرد کە لە وەختیگ ئەو دویەتە هیمان مناڵ بویە لە لە ساڵ ٢٠١٣ شویەگەم جیاوە بویمە، و دویەتە لەلای خوەم بویە، تا تەمەنی رەسیە ٢٠ ساڵان چگ تا وەگەرد باوگ تاوانکاری بنیشێد.
رووژیگ لە رووژان تەلەفۆن ژەنگ دا، و چاو مردن دویەتەم وەپیم رەسی، و مەوقەی شووردنی شوین سزیان و شکەنجە لەقەی لاشەی دویەتەم دیم، تا سکاڵا لەبان باوگی توومار کردم.
باوەژن دویەتەگە، کە دویەم توومەتبارە لەی تاوانە وت: شویەگەی لە بان پاچینەی ماڵەگە دەڵەکی داگە و کەفتیەسە بان زەوی و گیانی لەدەسدا.
دادگا نووڕیە کاغەزەیل و لێکۆڵینەوەی رویداوەگە، کە چفیەیگ لەناو ماڵەگە پەیا کریاس و خوین قوربانیەگە وەپیەو بویە، و مەچک راسی و چەپی شکیاس، و تیوڵی کەوەو بویە، و دگانەیل وەردەمی شکیانە و لیوی دریاس، و شوین شکیان کوینەیگ و شوین پلاتین لە پای چەپی بویە، و شوین لەبان پای بویە، وە گەرم زەخم و پەنام لە شوینەیلیگ جیاجیا لە لەش دویەتەگە.
دادگا نووڕیە وینەیل فۆتۆگرافی، و شوین شکەنجە لە لەش دویەتەگە دیار بویە، و کڕ زەخم لەبان رانی بویە.
باوگە ئاشکرای تاوان خوەی کرد، کە فرە شکەنجەی دویەتەی داگە، چوینکە فرە وەگەردی چەنە و بەرچەنە کردگە.
لە رووژ تاوانەگە، باوگە وە دویەتە وایە کەم قسە وەردەم بکە، وەلێ هەر قسە کردگە، و یەیش دەس و پا لەلی وەشانیە، ئیجا لە قات بانین خستەی خوار، و لەڕی خەسەخانە گیانی لەدەسدا.
دادگا لەبان ئی تاوانە وەگەرد ئەو بەڵگەیان وەگورەی مادەی ٤٠٥ لە یاسای سزادان، بڕیار ١٥ ساڵ زیندانی لەبان باوگەگە دەرکرد.
